UNDP ជំរុញកម្ពុជាកែច្នៃសំរាមដើម្បីបរិស្ថាននិងសេដ្ឋកិច្ច
Posted On : November, 16, 2018 | By សំឡេងទីក្រុង

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

កម្មវិធី​អភិវឌ្ឍន៍​អង្គការ​​សហប្រជាជាតិ​ហៅ​កាត់​ថា UNDP បាន​ជំរុញ​ដល់​ប្រទេស​កម្ពុជា​ក្នុង​ការ​កែ​ច្នៃ​សំរាម​យក​មក​ប្រើ​ប្រាស់​ឡើង​វិញ ដើម្បី​កាត់​បន្ថយ​ការ​ប្រើប្រាស់​ធនធាន​ធម្មជាតិ​ដ៏​ច្រើន​លើស​លប់ និង​ជួយ​ថែ​រក្សា​ដល់​បរិស្ថាន​សកល​លោក​ផង​ដែរ។

ថ្លែង​ប្រាប់​ក្រុម​អ្នក​សារព័ត៌មាន​បន្ទាប់​ពី​បើក​វេទិកា​ទស្សន​ទាន សេដ្ឋកិច្ច​ចក្រា ជា​ដំណោះ​ស្រាយ​ថ្មី​សម្រាប់​ការ​គ្រប់គ្រង​សំណល់​រឹង​នៅ​ព្រឹក​នេះ​ នាយក​ប្រចាំ​ប្រទេស​នៃ​UNDP ប្រចាំ​កម្ពុជា​លោក នីក ប៊ែរេសហ្វត មាន​ប្រសាសន៍​ថា ការ​កែ​ច្នៃ​កាក​សំណល់​ឲ្យ​ទៅ​ជា​ប្រភព​ថាមពល​កើត​ឡើង​វិញ​នេះ​មាន​សារសំខាន់​ណាស់​ដល់​ការ​អភិវឌ្ឍន៍​ដែល​មាន​ចិរភាព និង​បរិស្ថាន​ដល់​មនុស្ស​ជំនាន់​ក្រោយ​របស់​កម្ពុជា។

នាយក​ប្រចាំ​ប្រទេស​នៃ​UNDP ប្រចាំ​កម្ពុជា​លោក នីក ប៊ែរេសហ្វត ផ្ដល់បទសម្ភាសន៍ក្រោយកិច្ចប្រជុំថ្នាក់ជាតិ ស្ដីពី ដំណើរឆ្ពោះទៅរកសេដ្ឋកិច្ចចក្រា៖ ដំណោះស្រាយគ្រប់គ្រងសំណល់រឹងប្រកបដោយភាពច្នៃប្រឌិត ថ្ងៃទី១៤ ខែវិច្ឆិកា ឆ្នាំ២០១៨។ (រូបភាព៖ ហ៊ី ឆាយ)

លោក​ថា៖ « វា​ត្រូវ​ចំណាយ​លុយ​ច្រើន​ណាស់​ក្នុង​ការ​គ្រប់​គ្រង​ដី​ចាក់​សំរាម ហើយ​ពេល​ដែល​ដី​ចាក់​សំរាម​នោះ​កាន់​តែ​ធំ​ឡើង​វា​គ្រោះថ្នាក់​ណាស់​នៅ​ពេល​សំរាម​ទាំង​នោះ​ត្រូវ​បាន​ហូរ​ចូល​ទៅ​ក្នុង​ទឹក ហើយ​ពេល​នោះ​ហើយ​ការ​សម្អាត​កាន់​តែ​មាន​តម្លៃ​កាន់​ថ្លៃ​ក្នុង​ការ​សម្អាត។ វា​គ្រោះថ្នាក់​ណាស់! ជា​ពិសេស​ទៅ​កាន់​ក្មេង​ៗ និង​អ្នក​ងាយ​រងគ្រោះ។ អ្នក​រក​ស៊ី​ និង​រដ្ឋាភិបាល​ត្រូវ​តែ​ពិនិត្យ​មើល​ពី​រឿង​នេះ​ចាប់​ផ្ដើម​ពី​ឥឡូវ ក្នុង​ការ​កាត់​បន្ថយ ​កាក​សំណល់ និង​កែច្នៃ​មក​ប្រើ​ឡើងវិញ ដើម្បី​សន្សំ​សំចៃ ដោយ​យើង​អាច​ប្រើ​ប្រាស់​មធ្យោបាយ​នេះ » ។

វិធាន​ការ​ថ្មី​របស់ ​UNDP ដែល​លើក​ឡើង​​នេះ​គឺ​ធ្វើ​យ៉ាងណា​ទៅ​រក​ប្រភព​ថាមពល​កកើត​ឡើង​វិញ​ ដែល​នឹង​ជួយ​កសាង​នូវ​មូលដ្ឋាន​សេដ្ឋកិច្ច ធនធាន​ធម្មជាតិ និង​ធន​ធាន​សង្គម។

អគ្គលេខាធិការ​រង​នៃ​អគ្គលេខាធិការដ្ឋាន ក្រុម​ប្រឹក្សា​ជាតិ​អភិវឌ្ឍន៍​ប្រកប​ដោយ​ចិរភាព​លោក ឯ វុទ្ឍី មាន​ប្រសាសន៍​ថា​ វេទិកា​នៅ​ថ្ងៃ​នេះ​គឺ​ជា​ចំណុច​ចាប់​ផ្ដើម​របស់​កម្ពុជា​ក្នុង​ការ​បោះ​ជំហាន​ចូល​ក្នុង​ការ​អភិវឌ្ឍន៍​មួយ​ដែល​ប្រកប​ដោយ​ចិរភាព និង​បរិស្ថាន​ស្អាត។

អគ្គលេខាធិការ​រង​នៃ​អគ្គលេខាធិការដ្ឋាន ក្រុម​ប្រឹក្សា​ជាតិ​អភិវឌ្ឍន៍​ប្រកប​ដោយ​ចិរភាព​លោក ឯ វុទ្ឍី ផ្ដល់បទសម្ភាសន៍ក្រោយកិច្ចប្រជុំថ្នាក់ជាតិ ស្ដីពី ដំណើរឆ្ពោះទៅរកសេដ្ឋកិច្ចចក្រា៖ ដំណោះស្រាយគ្រប់គ្រងសំណល់រឹងប្រកបដោយភាពច្នៃប្រឌិត ថ្ងៃទី១៤ ខែវិច្ឆិកា ឆ្នាំ២០១៨។ (រូបភាព៖ ហ៊ី ឆាយ)

លោកថា៖ « កាល​ណា​យើង​ផ្លាស់​ចេញ​ពី​ធម្មតា ទៅ​ជា​ការ​ប្រើ​ប្រាស់​សំរាម​ឡើង​វិញ​នោះ គឺ​យើង​អាច​គ្រប់​គ្រង​សំណល់​បាន​ល្អ សំណល់​ដែល​ពី​មុន​នៅ​ពាសវាលពាសកាល​យើង​អាច​យក​មក​ច្នៃ​វា​បាន។ មួយ​ទៀត​វា​មិន​សំដៅ​លើ​ផលិត​កម្ម​មួយ​ទេ​វា​ក៏​សំដៅ​លើ​ការ​ប្រើប្រាស់​ដែរ។ អញ្ចឹង​ឥរិយាបថ​របស់​យើង​ម្នាក់ៗ​ ក៏​ត្រូវ​ចេះ​ច្នៃ​សំរាម​មក​ប្រើ​ឡើង​វិញ​ផង​ដែរ ចំពោះ​ទំនិញ​ដែល​មិន​ប៉ះពាល់​ដល់​បរិស្ថាន។ គឺ​វា​ផ្លាស់​ប្តូរ​រយៈពេល​ប្រើ​ប្រាស់​របស់​អ្នក​ប្រើប្រាស់​ផង​ដែរ អញ្ចឹង​ទាំង​អ្នក​ប្រើ​ប្រាស់ អ្នក​ផលិត​គឺ​ប្រែប្រួល​ទាំង​អស់ »។

ប្រធាន​គម្រោង​ធ្យូង​អនាម័យ SGF កម្ពុជា​ដែល​ជា​ក្រុម​ហ៊ុន​ផលិត​ធ្យូង​ចេញ​ពី​កាក​សំណល់​សំរាម​ លោក ហ្វ្រាន់​ឆេសខូ ការ៉ឈឺ មាន​ប្រសាសន៍​ថា ការ​កែច្នៃ​ផលិតផល​ដែល​អាច​ផលិត​ឡើង​វិញ​នេះ​វា​មាន​សារៈសំខាន់​ដល់​បរិស្ថាន និង​ចំណេញ​ថវិកា​ផង​ដែរ។

លោក​មាន​ប្រសាសន៍​ថា៖ «ខ្ញុំអាច​ប្រាប់​អ្នក​បាន​ពី​ចំនួន​ដែល​សំណល់​សរីរាង្គ​ដែល​យើង​កែ​ច្នៃ​ឡើង​វិញ​ជា​រៀងរាល់​ខែ ដែល​មាន​ចំនួន​ប្រមាណ ១៥០​តោន វា​ច្រើន​ណាស់ ​វា​ប្រហែល​ត្រូវ​ការ​ឡាន​ដឹក​សំរាម​១២​ដើម្បី​ដឹក​នូវ​ចំនួន​នេះ។  ហើយ​ចំនួន​នេះ​ពួក​យើង​ផលិត​បាន​ធ្យូង​ប្រមាណ​១០០ ដល់​១១០​តោន​សម្រាប់​ប្រជាជន​កម្ពុជា» ។

​ក្រសួង​បរិស្ថាន​បាន​ឲ្យ​ដឹង​ថា ការ​ចោល​សំណល់​រឹង​នៅ​ទីលាន​ចាក់​សំរាម​ក្នុង​ទី​ក្រុង​ទាំង​អស់​នៃ​ប្រទេស​កម្ពុជា​បាន​កើន​ឡើង​យ៉ាង​ឆាប់​រហ័ស​ពី​៣១៨ ០០០ (បី​សែន​មួយ​ម៉ឺន​ប្រាំបី​ពាន់) តោន​ក្នុង​១ឆ្នាំ​២០១៤ មក​ដល់​ ១លាន​៥សែន​តោន​ក្នុង​មួយ​ឆ្នាំ នា​ឆ្នាំ​២០១៧ ខណៈ​រាជធានី​ភ្នំពេញ​មាន​ប្រមាណ​ជាង​ ២ ៣០០តោន​ជា​រៀង​រាល់​ថ្ងៃ​៕

ប្រភព៖ VOD 

Urban Voice Cambodia

Urban Voice Cambodia