The Mekong Royal ចាប់ផ្តើម​គម្រោង​អភិវឌ្ឍន៍​លំនៅឋាន​ជំហាន ទី១
Posted On : February, 9, 2015 | By សំឡេងទីក្រុង

ប្រភព៖​ www.PostKhmer.Com, Sat, 7 February 2015, 

ដោយ​សម្លឹង​ឃើញ​កំណើន​សេដ្ឋកិច្ច និង​ការ​រីក​ចម្រើន​របស់​វិស័យ​អចលន​ទ្រព្យ​នៅ​កម្ពុជា​កំពុង​មាន​ភាព​ល្អ​ ប្រសើរ​នោះ ក្រុមហ៊ុន The Mekong Phnom Penh Development Cooperation, Ltd កាល​ពី​ពេល​កន្លង​មក​បាន​សម្រេច​ចិត្ត​បោះ​ទុន​ជា​ច្រើន​លាន​ដុល្លារ​ដើម្បី ​អភិវឌ្ឍ​លំនៅឋាន​លើ​ផ្ទៃ​ដី ១៣ ហិកតា។

កញ្ញា ចេវ សុឃុន ប្រធាន​ផ្នែក​ទីផ្សារ​នៃ​បុរី The Mekong Royal បាន​និយាយ​ថា ដោយ​យល់​ឃើញ​ថា រាជធានី​ភ្នំពេញ​កាន់​តែ​រីក​ធំ ហើយ​តម្រូវការ​លំនៅឋាន​ថ្មី​ក៏​កំពុង​កើន​ឡើង​ជា​លំដាប់​នោះ ទើប​ម្ចាស់​បុរី The Mekong Royal សម្រេច​ចិត្ត​វិនិយោគ​សាង​សង់​បុរី​នេះ​ឡើង។

កញ្ញា​បាន​បន្ត​ថា ការ​អភិវឌ្ឍ​បុរី​នេះ​នឹង​ធ្វើ​ឡើង​ជា​ជំហានៗ ដោយ​ជំហាន ទី១ មាន​ផ្ទៃ​ដី​ប្រមាណ ១៣ ហិកតា ចំណែក​ជំហាន ទី២ ដែល​មាន​ផ្ទៃ​ដី​ធំ​ជាង​គម្រោង ទី១ នឹង​ចាប់​ផ្តើម​នា​ពេល​ឆាប់ៗ​នេះ​ផង​ដែរ។

បុរី The Mekong Royal មាន​ទីតាំង​នៅ​តាម​បណ្តោយ​ផ្លូវ​ជាតិ​លេខ ៦ ស្ថិត​ក្នុង សង្កាត់​ព្រែក​លៀប ខណ្ឌ​ជ្រោយចង្វារ រាជធានី​ភ្នំពេញ និង​មាន​ចម្ងាយ​ពី​ស្ពាន​ជ្រោយចង្វារ ប្រមាណ ៥ គីឡូម៉ែត្រ។

កញ្ញា សុឃុន បាន​ថ្លែង​ថា៖ «រហូត​មក​ទល់​ពេល​នេះ​យើង​បាន​លក់​ផ្ទះ​នៅ​ក្នុង​គម្រោង The Mekong Royal បាន​ជាង ៦០ ភាគរយ​ហើយ។ ការ​លក់​លំនៅ​ឋាន​នៅ​ក្នុង​គម្រោង The Mekong Royal កំពុង​ទទួល​ជោគ​ជ័យ ដោយ​សារ​ការ​អភិវឌ្ឍ​របស់​ក្រុមហ៊ុន​បាន​ផ្តោត​ជា​សំខាន់​ទៅ​លើ​ការ​កសាង​ ហេដ្ឋា​រចនា​សម្ព័ន្ធ​មួយ​ចំនួន​ដូច​ជា មាន​ផ្លូវ​ចេញ​ចូល​ធំ​ទូលាយ មាន​សួនច្បារ និង​ភ្លើង​លម្អ ពិសេស​មាន​កន្លែង​ហាត់​ប្រាណ និង​មាន​អាង​ហែល​ទឹក ទៀត​ផង»។

កញ្ញា​បាន​បន្ត​ថា៖ «ដោយ​សារ​មាន​ទន្លេ​នៅ​ព័ទ្ធ​ជុំវិញ​បាន​ញ៉ាំង​ឲ្យ​លំនៅឋាន​នៅ​ក្នុង​បុរី The Mekong Royal មាន​ខ្យល់​អាកាស​ត្រជាក់​ស្រួល ហើយ​ទីនោះ​ក៏​ស្ថិត​នៅ​ជាប់​ផ្លូវ​ធំ​ទៅ​កាន់​បណ្តា​ខេត្ត​ថែម​ទៀត​ផង»។

Content image - Phnom Penh Post

បច្ចុប្បន្ន​នេះ The Mekong Royal កំពុង​អភិវឌ្ឍ​ផ្ទះ​បួន​ប្រភេទ​មាន​ដូច​ជា ផ្ទះ​ល្វែង វីឡា​ឃីង វីឡា​ឃ្វីន និង​វីឡា​កូនកាត់ ដោយ​លក់​ក្នុង​តម្លៃ​ចាប់​ពី ៧០ ០០០ ដល់​ជាង ១ លាន​ដុល្លារ​អាមេរិក។

ប្រធាន​ផ្នែក​ទីផ្សារ​ខាង​លើ​បាន​ឲ្យ​ដឹង​ទៀត​ថា គិត​ចាប់​ពី​ពេល​បើក​ដំណើរ​ការ​រហូត​មក​ទល់​ពេល​នេះ ក្រុមហ៊ុន​សង់​ផ្ទះ​សម្រេច​បាន​ប្រមាណ ៣០ ភាគរយ​ហើយ​នៃ​ផ្ទះ​សរុប​ចំនួន​ជាង ៤០០ ខ្នង។ តាម​ផែនការ​ក្រុម​ហ៊ុន​នឹង​អនុញ្ញាត​ឲ្យ​ម្ចាស់​ផ្ទះ​ចូល​ស្នាក់​នៅ​ក្រោយ​ រយៈ​ពេល ២២ ខែ​នៃ​ការ​ចុះ​កុងត្រា​ទិញ លក់។

ទាក់​ទង​នឹង​ការ​បង់​ប្រាក់​ប្រធាន​ផ្នែក​ទីផ្សារ​នៃ​បុរី​ខាង​លើ​បាន​ ថ្លែង​ថា ក្រុម​ហ៊ុន​បាន​ផ្តល់​ជូន​អតិថិជន​នូវ​ជម្រើស​ចំនួន​បី គឺ​ការ​បង់​ប្រាក់​ផ្តាច់ ការ​បង់​ជា​ដំណាក់​កាល និង​ការ​បង់​រំលស់​ទៅ​តាម​លទ្ធភាព និង​ចំណង់​ចំណូល​ចិត្ត​របស់​អតិថិជន។

លោក ច្រឹក សុខនីម អគ្គ​នាយក​ក្រុមហ៊ុន Century21 VTrust បាន​ថ្លែង​ថា ព្រែក​លៀប ជា​កន្លែង​ល្អ​សម្រាប់​ការ​អភិវឌ្ឍ​លំនៅឋាន ខណៈ​បច្ចុប្បន្ន​មាន​ប្រជាជន​កាន់​តែ​ច្រើន​បាន​ទៅ​រស់​នៅ​ទីនោះ​។ ការ​អភិវឌ្ឍ​លំនៅឋាន​នៅ​ទីនោះ​កំពុង​ទទួល​ជោគ​ជ័យ​ខ្លាំង លើក​លែង​តែ​សំណង់​ខុនដូ​ប៉ុណ្ណោះ​ដែល​កំពុង​ជួប​ឧបសគ្គ​ខ្លះ​ដោយ​សារ​តែ​ការ ​ផ្គត់ផ្គង់​លើស​តម្រូវការ​ប្រមាណ ៣០ ភាគរយ។

លោក​បាន​បន្ត​ថា ក្រុមហ៊ុន​អភិវឌ្ឍន៍​លំនៅឋាន​ដូច​ជា​ផ្ទះ​ល្វែង វីឡា​ភ្លោះ ដែល​មាន​តម្លៃ​ចន្លោះ​ពី ១០​-២០ ម៉ឺន​ដុល្លារ កំពុង​ទទួល​ជោគជ័យ ខណៈ​អ្នក​អភិវឌ្ឍន៍​វីឡា​បែប​ប្រណីតៗ​ការ​លក់​ហាក់​មាន​ភាព​យឺត​យ៉ាវ​ បន្តិច។

លោក​ថ្លែង​ថា៖ «ការ​អភិវឌ្ឍ​លំនៅឋាន​ផ្តោត​សម្រាប់​ប្រជាជន​វណ្ណៈ​កណ្តាល​នា​ពេល​ បច្ចុប្បន្ន​នេះ គឺ​ងាយ​នឹង​ទទួល​ជោគ​ជ័យ​ជាង​គេ ប្រសិន​បើ​ទីតាំង​សម្រាប់​អភិវឌ្ឍ​នោះ​នៅ​ក្នុង​ទីក្រុង ឬ​មិន​ចេញ​ឆ្ងាយ​ពី​ទីក្រុង»។

លោក គាត សូនី អគ្គ​នាយក​ក្រុមហ៊ុន STO Real Estate & Construction Co,Ltd បាន​ប្រាប់​ថា ក្រុម​ហ៊ុន​អភិវឌ្ឍន៍​លំនៅ​ឋាន​នៅ​តាម​បណ្តោយ​ផ្លូវ​ជាតិ​លេខ ៦ ភាគ​ច្រើន​សុទ្ធ​តែ​ទទួល​ជោគជ័យ ព្រោះ​តំបន់​នេះ​មាន​គេ​ចាប់​អារម្មណ៍​ច្រើន​ជាង​តំបន់​នៅ​ក្នុង ខណ្ឌ​ដង្កោ ដោយ​សារ​តំបន់​នេះ​មិន​មាន​ខ្យល់​ក្តៅ​ហួត​ហែង និង​មិន​សូវ​មាន​ផ្សែង​ចេញ​ពី​រោងចក្រ​នោះ​ទេ ពោល​គឺ​ជា​តំបន់​ដែល​មាន​បរិស្ថាន និង​មាន​ខ្យល់​អាកាស​ត្រជាក់​ព្រោះ​វា​នៅ​ជិត​ទន្លេ។

លោក​បាន​ថ្លែង​ថា៖ «ភាព​ជោគជ័យ​នៃ​គម្រោង​អភិវឌ្ឍន៍​លំនៅឋាន​ណា​មួយ​វា​អាស្រ័យ​លើ​ទីតាំង គុណភាព​សំណង់ ការ​ឌីហ្សាញ និង​កេរ្តិ៍​ឈ្មោះ​របស់​ក្រុម​ហ៊ុន​អភិវឌ្ឍន៍»៕

Urban Voice Cambodia

Urban Voice Cambodia