រដ្ឋាភិបាល​ផ្តល់​ការ​អនុគ្រោះ​គម្រោង​ផ្ទះ​តម្លៃ​ទាប
Posted On : August, 24, 2017 | By Thak Sreyleak

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ប្រភព ៖ ភ្នំពេញបុស្តិ៍

រដ្ឋាភិបាលកាលពីថ្ងៃចន្ទបានសម្រេចផ្តល់គោលនយោបាយលើកទឹកចិត្តដល់ក្រុមហ៊ុនឯកជនដែលអភិវឌ្ឍគម្រោងសាងសង់លំនៅឋានតម្លៃសមរម្យដើម្បីជំរុញការអភិវឌ្ឍគម្រោងនេះនៅកម្ពុជា។

គោលនយោបាយលើកទឹកចិត្តទាំងនោះរួមមាន ការផ្តល់អនុគ្រោះផ្នែកសារពើពន្ធ ដូចជាពន្ធប្រថាប់ត្រា ពន្ធលើប្រាក់ចំណេញ ពន្ធលើអចលនទ្រព្យ អាករលើតម្លៃបន្ថែម និងការសម្រួលនូវនីតិវិធីក្នុងការទទួលបានអាជ្ញាប័ណ្ណសាងសង់ជាដើម។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុដែលចេញផ្សាយកាលពីម្សិលមិញ។

គោលនយោបាយនោះក៏បានបញ្ជាក់ពីអាទិភាពរបស់រដ្ឋាភិបាលថានឹងជួយកសាងប្រព័ន្ធហេដ្ឋារចនាសម្ព័ន្ធដូចជាផ្លូវ បណ្តាញទឹក ភ្លើង សាលារៀន និងមន្ទីរពេទ្យដើម្បីភ្ជាប់ឆ្ពោះទៅតំបន់អភិវឌ្ឍន៍លំនៅឋានតម្លៃសមរម្យនោះដែរ។

សេចក្តីប្រកាសព័ត៌មានរបស់ក្រសួងសេដ្ឋកិច្ចឲ្យដឹងថា៖ «តាមការប៉ាន់ស្មាន ទៅដល់ឆ្នាំ ២០៣០ កម្ពុជាមានតម្រូវការលំនៅឋានថ្មីប្រមាណជាង៨ម៉ឺនខ្នងបន្ថែមទៀតជាមធ្យមជារៀងរាល់ឆ្នាំ ដោយមិនរាប់បញ្ចូលកង្វះលំនៅឋាននាពេលបច្ចុប្បន្នទេ»។

សេចក្តីប្រកាសព័ត៌មានបញ្ជាក់ថា ប្រាក់ឈ្នួលអប្បបរមាកម្មករ និយោជិត និងប្រាក់បៀវត្សរ៍មន្ត្រីរាជការ គ្រូបង្រៀនទាហាន និងប៉ូលិស មានការកើនឡើង ដូច្នេះការគិតគូរអំពីគម្រោងអភិវឌ្ឍន៍លំនៅឋានតម្លៃសមរម្យជាអាទិភាពមួយរបស់រដ្ឋាភិបាល ដើម្បីឲ្យប្រជាជនមានលទ្ធភាពទិញផ្ទះបាន។

ការជូនដំណឹងនេះមិនបានបញ្ជាក់លម្អិតពីកាលបរិច្ឆេទថា ការផ្តល់គោលនយោបាយលើកទឹកចិត្តនេះនឹងចាប់ផ្តើមមានប្រសិទ្ធភាពអនុវត្តនាពេលណានោះទេ ហើយក៏មិនបានបញ្ជាក់ពីអត្រាពន្ធកម្រិតណាដែលត្រូវបានរដ្ឋាភិបាលផ្តល់ការអនុគ្រោះនោះដែរ។

មន្ត្រីរដ្ឋាភិបាលមួយរូបដែលសុំមិនបញ្ចេញឈ្មោះ បានឲ្យដឹងកាលពីម្សិលមិញថា គោលនយោបាយលើកទឹកចិត្តដែលទើបនឹងសម្រេចនេះនឹងដាក់ឲ្យអនុវត្តក្នុងពេលឆាប់ៗ ខណៈបច្ចុប្បន្នមានក្រុមហ៊ុនឯកជនពីរបានដាក់សំណើអភិវឌ្ឍន៍គម្រោងនេះរួចហើយ។ មន្ត្រីរូបនោះបានបន្ថែមថា ការផ្តល់ការអនុគ្រោះពន្ធមិនបានកំណត់ជាក់លាក់នោះទេ គឺអាស្រ័យលើការវាយតម្លៃពីឥទ្ធិពលនៃការជួយសង្គមរបស់គម្រោងដែលស្នើសុំជាក់ស្តែង។

គិតមកទល់ពេលនេះមានគម្រោងសាងសង់ផ្ទះតម្លៃទាបយ៉ាងហោចពីរត្រូវបានក្រុមហ៊ុនឯកជនលើកឡើងដើម្បីសុំកិច្ចសហការពីខាងរដ្ឋាភិបាល។

គម្រោងដំបូងគេត្រូវបានផ្តួចផ្តើមដោយក្រុមហ៊ុន Worldbridge Land ដែលគ្រោងសាងសង់ផ្ទះសរុប ២ ២៩៧ ខ្នងលើផ្ទៃដីសរុប ៤៥ ហិកតា នៅភូមិទួលក្រសាំង ខេត្តកណ្តាល ចម្ងាយប្រមាណ ៨ គីឡូម៉ែត្រពីក្រុងតាខ្មៅ។ ផ្ទះនេះមានតម្លៃចន្លោះពី ២៥ ០០០ ដុល្លារ ដល់ ៣០ ០០០ ដុល្លារ។

កាលពីខែមីនា ក្រុមហ៊ុន Bun Ches Groups Co ក៏បានចុះអនុស្សរណៈនៃការយោគយល់គ្នាជាមួយស្ថាប័នរដ្ឋាភិបាលដើម្បីដំណើរការគម្រោងសាងសង់ផ្ទះតម្លៃទាបនេះនៅភូមិ ស្លែងដីដុះ ស្រុកពញ្ញាឮ ខេត្តកណ្តាល ដោយគ្រោងចំណាយទឹកប្រាក់ប្រមាណ ៨៨ លានដុល្លារ។ គម្រោងនេះនឹងមានផ្ទះសរុប ៥៣៤០ ខ្នង ដែលគ្រោងដាក់លក់ក្នុងតម្លៃចន្លោះពី ២៣ ៥០០ ដុល្លារ ដល់ ២៤ ៨០០ ដុល្លារក្នុងមួយខ្នង។

លោក សៀ រិទ្ធី ប្រធានក្រុមហ៊ុន Worldbridge Land កាលពីម្សិលមិញបានចាត់ទុកការសម្រេចរបស់រដ្ឋាភិបាលនេះជាការបើកភ្លើងខៀវដើម្បីជំរុញល្បឿនអភិវឌ្ឍន៍គម្រោងលំនៅឋានតម្លៃទាបនៅកម្ពុជា។

លោកបានបញ្ជាក់ថា៖«បើរដ្ឋាភិបាលផ្តល់ការលើកទឹកចិត្តបែបនេះវាជាដំណឹងល្អ អ៊ីចឹងគម្រោងនេះនឹងទៅមុខហើយ ព្រោះថាបើមានការលើកទឹកចិត្តនេះ ខ្ញុំអាចរួចដើម»៕

Related Posts

Urban Voice Cambodia

Urban Voice Cambodia