18-7-005

អគារ​ប៊ុលឌិង​ ​នឹង​ត្រូវ​វាយកម្ទេច​ចោល​នៅ​ថ្ងៃ​នេះ

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ប្រភព ៖ ភ្នំពេញបុស្តិ៍

ក្រុមការងារម៉ៅការវាយកម្ទេចអគារប៊ុលឌិងបានកំណត់ថានឹងចាប់ផ្តើមវាយកម្ទេចនៅក្នុងថ្ងៃនេះបន្ទាប់ពីក្រសួងរៀបចំដែនដីបានប្រកាសកាលពីថ្ងៃសៅរ៍ថាប្រជាពលរដ្ឋទាំងអស់ដែលរស់នៅក្នុងអគារចាស់ទ្រុឌទ្រោមនេះបានចាកចេញពីបរិវេណអគារនេះអស់ហើយ។

លោក សេង ឡូត អ្នកនាំពាក្យក្រសួងដែនដីបានឲ្យដឹងថាប្រជាពលរដ្ឋទាំង ៤៩២ គ្រួសារដែលរស់នៅក្នុងអគារនេះបានយល់ព្រមលក់ចំណែកផ្ទះរបស់ខ្លួនរួចរាល់ហើយដែលបានបើកផ្លូវសម្រាប់ក្រុមហ៊ុនជប៉ុន Arakawa អាចចាប់ផ្តើមធ្វើការរុះរើវាយកម្ទេចអគារចាស់នេះចោលបានដែលក្រុមហ៊ុនម៉ៅការក្នុងស្រុកជាអ្នករ៉ាប់រងលើកិច្ចការវាយកម្ទេចនេះ។

ក្រសួងដែនដីបានឲ្យដឹងថាទាំងអស់មានប្រជាពលរដ្ឋចំនួន ៤៩៣ គ្រួសារដែលរស់នៅក្នុងអគារប៊ុលឌិងនេះ ប៉ុន្តែលោក ឡូត បញ្ជាក់ថាមានផ្ទះមួយបន្ទប់គឺគេទុកចោលមិនមានមនុស្សរស់នៅទេ។

លោកបានបន្ថែមថាប្រជាពលរដ្ឋដែលរស់នៅជិតខាង និងអ្នកលក់ដូរនៅក្បែរនោះគឺមិនមានការគំរាមកំហែងពីការវាយកម្ទេចនេះទេ ពីព្រោះមិនមានពាក់ព័ន្ធជាមួយនឹងការប្រើប្រាស់គ្រឿងផ្ទុះនោះទេគឺមានប្រើតែម៉ាស៊ីនអេស្កាវ៉ារទ័រប៉ុណ្ណោះ។

លោកថ្លែងថា៖ « ក្រុមហ៊ុនមានឯកទេសត្រឹមត្រូវហើយនឹងធានាសុវត្ថិភាពដល់ប្រជាជនដែលរស់នៅជុំវិញហើយយើងនឹងធ្វើការជាមួយអាជ្ញាធរមូលដ្ឋាន»។

អគារប៊ុលឌិងនេះនឹងត្រូវជំនួសមកវិញដោយអគារថ្មីមួយដែលមានកម្ពស់ ២១ ជាន់ដែលការប្រើប្រាស់អគារថ្មីនេះនឹងមានលក្ខណៈចម្រុះ ហើយថវិកាចំណាយសាងសង់អស់ប្រហែល ៧០ លានដុល្លារ។

កាលពីថ្ងៃសុក្រកន្លងទៅអង្គការសិល្បៈខ្មែរអមតៈដែលមានក្រុមសិល្បករ និងសិស្សបាននាំគ្នាមកថតរូបទុកជាអនុស្សាវរីយ៍នៅតាមជណ្តើរក្នុងអគារប៊ុលឌិងដែលមានវ័យចំណាស់ចាស់ទ្រុឌទ្រោមនេះ។

នាយកប្រតិបត្តិក្រុមអង្គការលោក ភ្លើន ព្រីម បាននិយាយថាក្រុមលោកចង់ថតរូបឲ្យដូចអ្វីដែលលោកធ្លាប់បានថតកាលពីឆ្នាំ ២០០៥ ថា វាខុសប្លែកប៉ុនណាហើយវាជារូបថតចុងក្រោយមុនគេកម្ទេចអគារនេះចោល។

លោកបន្តថា៖ «រឿងមួយទៀតគឺថានៅពេលដែលយើងចាប់ផ្តើមបង្រៀន និងបណ្តុះបណ្តាលសិស្សនៅក្នុងទីក្រុងភ្នំពេញ អគារប៊ុលឌិងសនេះ គឺជាចំណុចចាប់ផ្តើមដំបូងរបស់យើង»៕

Leave a Reply