មន្រ្តីជំនាញកម្ពុជា-ជប៉ុនចុះត្រួតពិនិត្យស្ថានភាពទ្រុឌទ្រោមស្ពានជ្រោយចង្វារចាស់​

មន្រ្តីជំនាញកម្ពុជា-ជប៉ុនចុះត្រួតពិនិត្យស្ថានភាពទ្រុឌទ្រោមស្ពានជ្រោយចង្វារចាស់​

On

ដោយ៖​ ទូច សុខា​ | ថ្ងៃអង្គារ ទី17 កុម្ភៈ 2015 | VOD

ស្ពានមិត្តភាពកម្ពុជា-ជប៉ុន ឬស្ពានជ្រោយចង្វារចាស់ត្រូវបានផ្អាកមិនឲ្យធ្វើចរាចរណ៍នៅថ្ងៃអង្គារនេះ ដើម្បីឲ្យមន្ត្រីជំនាញរបស់កម្ពុជា និងជប៉ុន ចុះទៅធ្វើការសិក្សាពីភាពស្ថានភាពទ្រុឌទ្រោមរបស់ស្ពានដែលមានអាយុជិត៥០ឆ្នាំមួយនេះ ។

ការចុះត្រួតពិនិត្យនេះធ្វើឡើង បន្ទាប់ពីអាជ្ញាធរកាលពីចុងខែមករាកន្លងទៅបានរកឃើញថា កំណល់នៃទម្រស្ពានជ្រោយចង្វារមិត្តភាពកម្ពុជា-ជប៉ុនបានប្រេះដោយសារតែភាពទ្រុឌទ្រោម ។ ក្រោយមកមានការប្រជុំរវាងមន្ត្រីក្រសួងសាធារណការ និងដឹកជញ្ជូន មន្ត្រីសាលារាជធានីភ្នំពេញ និងក្រុមវិស្វករបច្ចេកទេសនៃប្រទេសជប៉ុនដើម្បីរៀបចំជួសជុលស្ពាននេះ ។

មន្ត្រីជំនាញនាយកដ្ឋានផ្លូវថ្នល់នៃក្រសួងសាធារណការ និងដឹកជញ្ជូន ដែលបានចុះទៅពិនិត្យស្ពានជ្រោយចង្វារនៅព្រឹកនេះនិយាយក្នុងលក្ខខណ្ឌមិនបញ្ចេញឈ្មោះឲ្យដឹងថា មន្រ្តីជំនាញទាំងពីរក្រុមសហការគ្នាសិក្សាពីកម្រាស់កម្រាលរបស់ស្ពាន ចំនួនយានយន្តដែលឆ្លងកាន់ស្ពាន និងភាពធន់របស់សសរស្ពាន ។ មន្ត្រីជំនាញរូបនោះឲ្យដឹងទៀតថា ក្នុងការចុះត្រួតពិនិត្យនេះ ក៏មានការប្រើកូនយន្តហោះបញ្ជា(drone)ថត និងសិក្សាពីទ្រង់ទ្រាយស្ពានទាំងមូល ដើម្បីឲ្យដឹងថាលទ្ធភាពទ្រទម្ងន់របស់ស្ពាននេះនៅបានកម្រិតណា ។

លោកបន្តថា «មានមួយក្រុមទៀតគេចុះសិក្សារកភាពធន់របស់សរសរគ្រឹះស្ពាន…សសរស្ពានក្នុងទឹក គេចុះរកហ្នឹងដើម្បីឲ្យដឹងថាតើបេតុងហ្នឹងពុកផុយ មានប្រេះស្រាំ ប្រេះហ្នឹង មានប្រេះបណ្តោយ ប្រេះទទឹងអីអញ្ចឹង»

មន្ត្រីជំនាញរូបនេះឲ្យដឹងដែរថា ភាគីជប៉ុនដែលកំពុងធ្វើការសិក្សានិយាយប្រាប់គាត់ថា លទ្ធផលនៃការសិក្សាអាចនឹងត្រូវបញ្ចេញឲ្យដឹងក្នុងរយៈពេល១ខែបន្ទាប់ពីថ្ងៃសិក្សា ។ លោកថា ភាគីជប៉ុនត្រូវការយកសំណាករបស់ស្ពាន់ទៅពិសោធជាមុនសិន ។

មន្ត្រីដដែលនោះឲ្យដឹងទៀតថា ភាគីជប៉ុននឹងអាចធ្វើការផ្លាស់ប្តូរបង្កាន់ដៃស្ពាន បង្គោលភ្លើង និងកម្រាលកៅស៊ូនៅលើស្ពាន បើការសិក្សារកឃើញថា របស់ទាំងនេះមានភាពចាស់ទ្រុឌទ្រោម ។

ក្នុងការចុះទៅត្រួតពិនិត្យនៅថ្ងៃអង្គារនេះបានតម្រូវឲ្យមាន ការបិទចរាចរណ៍លើស្ពានចាប់ពីម៉ោង៨ព្រឹកដល់ម៉ោង៥ល្ងាច ដែលតម្រូវឲ្យអ្នកធ្វើដំណើរទៅប្រើប្រាស់ស្ពានថ្មីតែមួយ ធ្វើឲ្យមានការកកស្ទះចរាចរណ៍ជាខ្លាំង ។

គួរបញ្ជាក់ថា ស្ពានជ្រោយចង្វារ ឬស្ពានមិត្តភាពកម្ពុជា-ជប៉ុន ត្រូវបានសាងសង់ឡើងកាលពីឆ្នាំ១៩៦៦ ក្រោមជំនួយរបស់រដ្ឋាភិបាលជប៉ុន ប៉ុន្តែអំឡុងដើមទសវត្សរ៍ឆ្នាំ៧០ ស្ពាននេះត្រូវបានកាត់ផ្តាច់ក្នុងសម័យសាធារណរដ្ឋខ្មែរ ដែលគ្រប់គ្រងដោយរបបលោក លន់ នល់ ។ រហូតដល់ឆ្នាំ១៩៩៥ ស្ពាននេះត្រូវបានរាជរដ្ឋាភិបាលជប៉ុនជួសជុលតភ្ជាប់ឲ្យដំណើរការវិញរហូតដល់បច្ចុប្បន្ន ៕

បុគ្គលិក​មណ្ឌល​សុខភាព​ខណ្ឌ​៧​មករា នៅ​តែ​មិន​ស្ងប់​ចិត្ត

បុគ្គលិក​មណ្ឌល​សុខភាព​ខណ្ឌ​៧​មករា នៅ​តែ​មិន​ស្ងប់​ចិត្ត

On

ដោយ ឆាយ ច័ន្ទនីដា, ថ្ងៃទី ១៧​ កុម្ភៈ ២០១៥, ប្រភព Phnom Penh Post

ភ្នំពេញៈ បុគ្គលិក​ប្រមាណ​ជាង ១០០ នាក់​នៃ​មន្ទីរពេទ្យ​បង្អែក​រាជធានី​ភ្នំពេញ និង​មណ្ឌល​សុខភាព ខណ្ឌ​៧​មករា ដែល​មាន​ទីតាំង​នៅ​កណ្តាល​រាជធានី ជួប​ប្រជុំ​គ្នា​ជា​លើក​ដំបូង​ជាមួយ​ប្រធាន​មន្ទីរ ទាក់ទិន​នឹង​ការ​បារម្ភ​របស់​ពួកគេ​លើ​ការ​ដោះដូរ​អគារ​ឲ្យ​ឯកជន ដោយសារ​ការ​បិទ​ប្រកាស​ថ្មីៗ​នេះ​ថា អគារ​ផ្នែក​ខាង​មុខ​នៃ​មន្ទីរពេទ្យ​បាន​បាត់​ប្លង់​កម្មសិទ្ធិ​ទៅ​ហើយ។

កិច្ច​ប្រជុំ​កាលពី​ម្សិល​មិញ កើត​ឡើង ក្រោយ​ការ​ប្តឹង​តវ៉ា ទៅ​រដ្ឋសភា កាលពី​ថ្ងៃ ទី៦ ខែ​កុម្ភៈ របស់​បុគ្គលិក​ពេទ្យ​ដែល​អះអាង​ថា មាន​សរុប​ប្រមាណ ៣០០ នាក់​បាន​ដាក់​បណ្តឹង​ទៅ​គណៈ​កម្មការ​អង្កេត បោស​សម្អាត និង​ប្រឆាំង​អំពើ​ពុក​រលួយ (គណៈកម្មការ ទី១០) ស្នើ​សុំ​ឲ្យ​មាន​ការ​ស៊ើប​អង្កេត ទាក់​ទិន​នឹង​ការ​ប្រកាស​របស់​មន្ទីរ​រៀបចំ​ដែនដី​រាជធានី ចុះ​ថ្ងៃ ៨ មករា ថា ប្លង់​មន្ទីរពេទ្យ​បាន​បាត់។

បុគ្គលិក​ពេទ្យ​បាន​បារម្ភ​ពី​ភាព​មិន​ប្រក្រតី​នៃ​បញ្ហា​អគារ​មន្ទីរពេទ្យ​រដ្ឋ​ដែល​កន្លង​មក ពួកគេ​ត្រូវ​បាន​មន្ទីរ​សុខាភិបាល តម្រូវ​ឲ្យ​រើ​ទៅ​ធ្វើការ​នៅ​អគារ​មួយ​នៅ​ផ្នែក​ខាង​ក្រោយ​នៃ​អគារ​មន្ទីរពេទ្យ​ក្រុង ដែល​ស្ថិត​លើ​ផ្លូវ​ឆេកូ​ស្លូវ៉ាគី ឬ​ផ្លូវ​លេខ ១៦៩ សង្កាត់​វាលវង់។ ពួកគេ​ធ្លាប់​បាន​តវ៉ា​កាល​ពី ខែ​វិច្ឆិកា ទាក់ទង​នឹង​ការ​ផ្លាស់​ប្តូរ​អគារ​ធ្វើ​ការ​របស់​គេ​ផង​ដែរ។

លោក​វេជ្ជបណ្ឌិត អ៊ួង មេសា ជា​អ្នក​តវ៉ា​ម្នាក់ មាន​ប្រសាសន៍​ថា កិច្ច​ប្រជុំ​ជាមួយ​លោក សុខ សុគន្ធ ប្រធាន​មន្ទីរ​សុខាភិបាល​រាជធានី​មិន​បាន​ធ្វើ​ឲ្យ​បុគ្គលិក​ស្ងប់​ចិត្ត​ទេ ហើយ​ការ​បក​ស្រាយ​ពី​ប្លង់​កម្មសិទ្ធិ ឬ​ការ​ធានា​ថា មន្ទីរពេទ្យ​នឹង​មិន​អាច​មាន​ការ​ដោះដូរ នោះ​មិន​មាន​ភាព​ច្បាស់​លាស់​នោះ​ឡើយ។

លោក​ថ្លែង​ថា៖ «ប្រធាន​មន្ទីរ​បកស្រាយ​អត់​ចំ។ យើង​ចង់​ឲ្យ​មាន​ប្លង់​រួម​សម្រាប់​អគារ​ទាំង​មុខ​និង​អគារ​ក្រោយ។ តែ​គាត់​មិន​បញ្ជាក់​ជាមួយ​យើង​បាន»។

ប៉ុន្តែ​លោក​ថា កិច្ច​ប្រជុំ​នេះ ដែល​លោក​ប្រធាន​មន្ទីរ​ថា ជា​ការ​ណែនាំ​បុគ្គលិក​មន្ទីរពេទ្យ ឲ្យ​ខិតខំ​ធ្វើ​តែ​ការងារ និង​អនុវត្ត​តាម​លក្ខនិ្តកៈ​មន្ត្រី​រាជការ​នោះ គឺជា «ការ​គំរាម​កំហែង​បុគ្គលិក​មិន​ឲ្យ​តវ៉ា​ដែល​យើង​មិន​អាច​ទទួល​យក​បាន​ឡើយ។ យើង​បារម្ភ​ខ្លាច​មាន​ការ​ដោះ​ដូរ​អគារ​មន្ទីរពេទ្យ»។

លោក សុខ សុគន្ធ ប្រធាន​មន្ទីរ​សុខាភិបាល​មាន​ប្រសាសន៍​ប្រាប់​អ្នក​ព័ត៌មាន​ក្រោយ​កិច្ច​ប្រជុំ​ថា លោក​មក​ប្រជុំ​ជាមួយ​បុគ្គលិក​មន្ទីរពេទ្យ​គឺ​ដើម្បី​ណែនាំ​នូវ​ក្រម​សីលធម៌​របស់​គ្រូពេទ្យ និង​ឲ្យ​គោរព​នូវ​លក្ខន្តិកៈ​មន្ត្រី​រាជការ​តែ​ប៉ុណ្ណោះ ឯ​រឿង​ធ្វើ​ប្លង់​មន្ទីរពេទ្យ​ជា​ករណី​របស់​ក្រសួង​សុខាភិបាល និង​ក្រសួង​សេដ្ឋកិច្ច និង​ហិរញ្ញវត្ថុ។

ឆ្លើយ​សំណួរ​ទាក់ទង​នឹង​ការ​ដោះ​ដូរ​ផ្ទេរ​ឲ្យ​ឯកជន​ឬ​យ៉ាង​ណា? លោក​ថា ៖ «រាល់​នីតិវិធី​នៃ​ការ​ដោះដូរ គឺ​នីតិវិធី​ក្រៅ​ពី​នេះ គឺជា​នីតិវិធី​របស់​ក្រសួង​សេដ្ឋកិច្ច។ យើង​មិន​អាច​ថា ខ្ញុំ​ឬ​មន្ត្រី​សុខាភិបាល​ណា​មួយ​ធ្វើ​រួច​ទេ។ ភារកិច្ច​របស់​យើង គឺ​ព្យាបាល​ជំងឺ​ប្រជា​ពលរដ្ឋ អនុវត្ត​ទៅ​តាម​ក្រម​សីលធម៌ …

គ​ណៈកម្ម​ការ​ផ្សារ​អូឫស្សី និងមន្ត្រី​សុខាភិបាលរាជធានីចុះ​អប់រំ​​អាជីវ​ករ​លក់​ចំណីអាហារ​តាម​ដង​ផ្លូវ​ និង​ក្នុង​ផ្សារ

គ​ណៈកម្ម​ការ​ផ្សារ​អូឫស្សី និងមន្ត្រី​សុខាភិបាលរាជធានីចុះ​អប់រំ​​អាជីវ​ករ​លក់​ចំណីអាហារ​តាម​ដង​ផ្លូវ​ និង​ក្នុង​ផ្សារ

On

ដោយផ្កាយព្រឹក, កោះសន្តិភាព, ថ្ងៃអាទិត្យ ទី១៧ ខែកុម្ភៈ ឆ្នាំ២០១៥

រាជ​ធានី​ភ្នំពេញ​ ៖ នៅថ្ងៃ​ទី ១៧ កុម្ភៈ ២០១៥ ចាប់​ពីម៉ោង៩ និង​៣០​នាទី​ដល់​ម៉ោង១១ព្រឹក​ គ​ណៈកម្ម​ការ​ផ្សារ​អូឫស្សី បាន​សហការ​ជាមួយ​មន្ត្រី​សុខាភិបាលរាជធានី​ភ្នំពេញ ចុះ​អប់រំ​ណែនាំ ផ្សព្វផ្សាយ និងចែក​ជូន​សារ របស់​មន្ទីរ​សុខាភិបាល​រាជធានី​ភ្នំពេញ ជូន​ដល់​អ្នកលក់​ចំណីអាហារតាម​ដងផ្លូវ និងក្នុង​បរិវេណ​ផ្សារដើម្បី​រក្សា​បាន​នូវ​សុវត្ថិភាពចំណីអាហារ សុខុមាលភាពជូន​អាជីវករ ប្រជាពលរដ្ឋ ដោយ​ធ្វើ​យ៉ាងណា​រក្សា​​ឱ្យ​បាន​នូវ​ភាព​ស្អាត, ​ទុកដាក់​ចំណីអាហារ​ឆៅ និងឆ្អិន​ដោយឡែក​ពី​គ្នា, ​​ចម្អិន​អាហារ​ឱ្យ​បាន​ឆ្អិន​ល្អ, ​​ទុកដាក់​អាហារ​នៅ​សីតុណ្ហភាពសុវត្ថិភាព, ប្រើប្រាស់​ទឹក​ស្អាត និងទំនិញមានគុណ​ភាពល្អ, កន្លែង​លាង និងតាំង​លក់​ផុត​ពី​ដី ត្រូវ​ពាក់​អៀម ស្រោមដៃ មួក ត្រូវ​តាំង​អាហារ​មាន​គម្រប ឬក្នុង​ទូ ត្រូវ​ចូលរួម​ប្រមូល ញែក វេច​ខ្ចប់ ទុកដាក់​កាក​សំណល់​ឱ្យ​បាន​ត្រឹមត្រូវ៕

ផ្លូវ​៣៣៦​ខាង​ជើង​ផ្សារ​ដើម.​គកក​ស្ទះ​ចរាចរណ៍​ដោយ​សារ​អាជីរ​វករ​លក់​ដូរបិទផ្លូវ​ ប្រធាន​ផ្សារ​អត់​ខ្វល់​

ផ្លូវ​៣៣៦​ខាង​ជើង​ផ្សារ​ដើម.​គកក​ស្ទះ​ចរាចរណ៍​ដោយ​សារ​អាជីរ​វករ​លក់​ដូរបិទផ្លូវ​ ប្រធាន​ផ្សារ​អត់​ខ្វល់​

On

ដោយផ្កាយព្រឹក, កោះសន្តិភាព, ថ្ងៃអាទិត្យ ទី១៧ ខែកុម្ភៈ ឆ្នាំ២០១៥

រាជ​ធានី​ភ្នំពេញ​ ៖ តាម​សេចក្តី​រាយការណ៍​ពី​អ្នក​ឆ្លើយ​ឆ្លង​ព័ត៌​មាន​បាន​ឱ្យ​ដឹង​ថា បន្ទាប់​ពី​សាលា​ខណ្ឌ​ទួល​គោក​បើក​ភ្លើង​ខៀវ​​ ​​​​ផ្លូវ​៣៣៦​ខាង​ជើង​ផ្សារ​ដើម.​គ ក្នុង​សង្កាត់​ផ្សារ​ដើម​គ ត្រូវ​បាន​អាជីវ​ករ​​នាំ​គ្នា​មក​លក់​បិទ​ទាំង​ស្រុង​តែ​ម្តង​​ ធ្វើ​ឱ្យ​មានការ​កក​ស្ទះ​ចរាចរណ៍​មិន​អាច​ធ្វើ​ដំណើរ​បាន​​។

​ផ្លូវ​ម៉ៅ​សេ​ទុង​​កែង​ផ្លូវ​៣៣៦​​ មាន​ការ​កក​ស្ទះ​តាំង​ពី​ម៉ោង​៦ព្រឹក​រហូត​ដល់​​រសៀល​​នេះធ្វើ​ឱ្យ​ប្រជា​ពលរដ្ឋ​ដែល​ធ្វើ​ដំណើរ​តាម​ផ្លូវ​​រអ៊ូរទាំ​យ៉ាង​ខ្លាំង​។ ការ​មក​លក់​ដូរ​លើ​ផ្លូវ​នេះ​ គឺ​ប្រធាន​ផ្សារ​​យក​មួយ​កន្លែង​៥.០០០​រៀល​ ថ្លៃ​សន្តិ​សុខ​១.០០០​រៀល​ ដោយ​លក់​ដូរ​រាប់​រយ​កន្លែង​បង្ក​ការ​កក​ស្ទះយ៉ាង​ខ្លាំង​​ តែ​ប្រធាន​ផ្សារ​អត់​ខ្វល់​ជួយ​រៀប​ចំ​សណ្តាប់​ធ្នាប់​ទេ គិត​តែ​ពី​ដើរ​ប្រមូល​លុយ៕

សាលាក្រុងភ្នំពេញចេញបំរាមឱ្យប្រជាពលរដ្ឋប្រុងប្រយ័ត្ន ក្នុងឱកាសបុណ្យចូលឆ្នាំចិន-វៀតណាម

On

ប្រភព Fresh News, ថ្ងៃទី ១៧ កុម្ភៈ ២០១៥

(ភ្នំពេញ)៖ សាលារាជធានីភ្នំពេញ នៅថ្ងៃទី១៧ ខែកុម្ភៈ ឆ្នាំ២០១៥នេះ បានចេញបំរាមចំនួន៧ចំណុច សម្រាប់ឱ្យប្រជាពលរដ្ឋអ​នុវត្តចំពោះ អំឡុងចូលឆ្នាំចិន​-វៀតណាម ដែលធ្វើឡើងចាប់ពីថ្ងៃស្អែកទី១៨ រហូតដល់ ២១ ខែកុម្ភៈ ឆ្នាំ២០១៥ ខាងមុខនេះ ។ បំរាមទាំងនេះរួមមានដូចជា មិនឱ្យអុចផាវ កាំជ្រួច ឬបង្កសម្លេងផ្ទុះ មិនឱ្យមានការលេងល្បែងស៊ីសង មិនឱ្យមានការហែក្បួនផ្សេងៗ គ្រប់ស្ថាប័នត្រូវរៀបចំ​សណ្តាប់ធ្នាប់រៀងៗខ្លួន ដើម្បីទប់ស្កាត់អគ្គិភ័យជាយថាហេតុ។

សូមអានលិខិតទាំងស្រុងរបស់សាលារាជធានីដូចខាងក្រោម៖

MSP-0388

អាជ្ញាធរ​រាជធានី​ភ្នំពេញ ណែនាំ​ជំរុញ​ឲ្យ​មន្ត្រី​ការពារ​ដី​រដ្ឋ ការ​លប់​បឹង និង​ទប់ស្កាត់​សំណង់​គ្មាន​ច្បាប់​

អាជ្ញាធរ​រាជធានី​ភ្នំពេញ ណែនាំ​ជំរុញ​ឲ្យ​មន្ត្រី​ការពារ​ដី​រដ្ឋ ការ​លប់​បឹង និង​ទប់ស្កាត់​សំណង់​គ្មាន​ច្បាប់​

On

ប្រភព CEN| ថ្ងៃទី 17 កុម្ភៈ 2015, ម៉ោង 08:19:AM) | ដោយ: លី សិលា

ភ្នំពេញ: ក្នុងពេល​ដែល​បឹង​រដ្ឋ​ជាច្រើន​កន្លែង នៅ​ភ្នំពេញ រួមមាន បឹងកក់ បឹងទំពុន បឹង​ស្នោរ និង​បឹង​នៅ​ជ្រោយចង្វារ ជាដើម ត្រូវបាន​គេ​ចាក់ដី​លុប​អស់​ទៅ​ហើយ​នោះ នៅពេលនេះ អាជ្ញាធរ​រាជធានី​ភ្នំពេញ បានប្រកាស​ជំរុញ​ទៅកាន់​មន្ត្រី​នៃ​មន្ទីរ​រៀបចំ​ដែនដី​នគរូបនីយកម្ម សំណង់ និង​សូរិយោដី រាជធានី​ភ្នំពេញ ឲ្យ​ការពារ​ដី​រដ្ឋ ប្រឆាំង​ការ​លប់​បឹង និង​ត្រូវ​ទប់ស្កាត់​សំណង់​គ្មាន​ច្បាប់​។​

​ក្នុង​ហ្វេ​សប៊ុក​របស់​សាលា​រាជធានី​ភ្នំពេញ បាន​ផ្សព្វផ្សាយ​ថា អភិបាលរង​រាជធានី​ភ្នំពេញ លោក ជ្រាង សុផាន់ បាន​ធ្វើ​ការណែនាំ និង​ជំរុញ​អោយ​មន្ត្រី​នៃ​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី រាជធានី​ភ្នំពេញ​ទាំងអស់ ត្រូវ​ប្តេជ្ញាចិត្ត​ក្នុង​កិច្ចការពារ​ដី​រដ្ឋ ការ​លប់​បឹង​រដ្ឋ និង​ទប់ស្កាត់​សំណង់​គ្មាន​ច្បាប់ អោយបាន​នៅក្នុង​រាជធានី​ភ្នំពេញ​។

​លោក ជ្រាង សុផាន់ បាន​ជំរុញ​ដូចនេះ ក្នុងឱកាស​បើក​សន្និបាត​បូកសរុប​លទ្ធផល​ការងារ ឆ្នាំ​២០១៤ និង​ទិសដៅ​ការងារ ឆ្នាំ​២០១៥​របស់​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី រាជធានី​ភ្នំពេញ កាលពី​ព្រឹក​ថ្ងៃទី​១៦ ខែ​កុម្ភៈ ឆ្នាំ​២០១៥​។​

​លោក​អភិបាលរង បន្តថា មន្ត្រី​របស់​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី រាជធានី​ភ្នំពេញ ជា​មន្ត្រី​របស់​រដ្ឋ ដូច្នេះ​ទេ ត្រូវ​បំពេញ​ការងារ​ក្នុង​ដែន​សមត្ថកិច្ច​របស់​ខ្លួន អោយបាន​ល្អ ពិសេស​លើ​ការផ្តល់សេវា​ជូន​ប្រជាពលរដ្ឋ​។ ការផ្តល់សេវា​ជូន​ប្រជាពលរដ្ឋ​បាន​ល្អប្រសើរ និង​ទាន់​ពេលវេលា វា​ស្មើនឹង​ការកាត់បន្ថយ​ភាពក្រីក្រ ជូន​ប្រជាពលរដ្ឋ​ផងដែរ​។

​លោក​អភិបាលរង បាន​បន្តថា រាល់​ការបំពេញ​ការងារ​ជូន​ប្រជាពលរដ្ឋ មន្ត្រី​យើង​ទាំងអស់ ត្រូវតែ​អព្យាក្រិត មិន​លំអៀង ហើយក៏​មិន​ត្រូវ​យក​សិទ្ធិអំណាច ឥទ្ធិពល​របស់​ខ្លួន ទៅ​ជម្រិត​ទា​ប្រាក់​ពី​ប្រជាពលរដ្ឋ ដើម្បី​ផលប្រយោជន៍​របស់​ខ្លួន ធ្វើអោយប៉ះពាល់​ដល់​ភាពថ្លៃថ្នូរ​របស់​មន្ត្រីរាជកា​រ​របស់​រដ្ឋ​នោះ​ទេ​៕​