19-5-009

តម្រូវ​ការ​ប្រើ​ប្រាស់​ផ្សារ​ទំនើប​​ កើន​ឡើង​នៅ​រាជធានី​ភ្នំពេញ

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ប្រភព ៖ ភ្នំពេញបុស្តិ៍

តម្រូវការប្រើប្រាស់ផ្សារទំនើបនានានៅរាជធានីភ្នំពេញបានកើនឡើង៣ភាគរយ ក្នុងត្រីមាសទី១ ឆ្នាំនេះធៀបទៅនឹងរយៈពេលដូចគ្នាកាលពីឆ្នាំមុន។ នេះបើយោងតាមការសិក្សារបស់ក្រុមហ៊ុន ប៊ុណ្ណា រៀលធីគ្រុប។

យោងតាមលទ្ធផលបឋមនៃការសិក្សារបស់ក្រុមហ៊ុនប៊ុណ្ណា ដែលបានបញ្ចប់កាលពីពេលថ្មីៗនេះបានរកឃើញថា តម្រូវការប្រើប្រាស់ផ្សារទំនើប បានកើនឡើងពី ៧៩ ភាគរយ កាលពីត្រីមាសទី ១ ឆ្នាំមុន ដល់ ៨២ ភាគរយ នៅដំណាច់ត្រីមាសទី ១ ឆ្នាំនេះ ផ្ទុយទៅវិញទំហំផ្សារទំនើបដែលនៅសល់បានកើនឡើងពី ២១ ដល់ ២៦ ភាគរយ ក្នុងរយៈពេលដូចគ្នានេះ ដោយសារការផ្គត់ផ្គង់កើនឡើងខ្លាំង។

ការសិក្សាដដែលបានរកឃើញថា ចំនួនផ្សារទំនើបនៅរាជធានីភ្នំពេញមានចំនួន៣៤គម្រោងក្នុងនោះគម្រោងកម្រិតA មានចំនួន១២គម្រោង គម្រោងកម្រិត B មានចំនួន ១០ គម្រោង និងគម្រោងកម្រិត C មានចំនួន ២ គម្រោង។

លោក ប៉ែន សុខគា នាយកផ្នែកវាយតម្លៃនៃក្រុមហ៊ុនប៊ុណ្ណា រៀលធីគ្រុប បានថ្លែងឲ្យដឹងថា ៖ «កំណើននៃតម្រូវការប្រើប្រាស់ផ្សារទំនើបដោយសារកត្តាមួយចំនួនដូចជា កំណើនប្រជាសាស្ត្រ កំណើនប្រាក់ចំណូលរបស់ប្រជាពលរដ្ឋ លក្ខខណ្ឌនៃការទិញទំនិញ និងការបញ្ចុះអត្រាការប្រាក់របស់មីក្រូហិរញ្ញវត្ថុកំពុងជះឥទ្ឋិពលដល់ដំណើរការនេះ»។

លោកបន្តថា ៖ «ការបន្ថយអត្រាការប្រាក់របស់រដ្ឋាភិបាល អាចជួយឲ្យប្រជាពលរដ្ឋអាចលៃលករកប្រាក់ចំណាយបាន ហើយការទិញបង់រំលស់កាន់តែងាយស្រួលក៏កំពុងជំរុញកំណើននៃការលក់ផងដែរ»។

នាយកប្រតិបត្តិផ្សារទំនើបរតនាផ្លាហ្សាលោក ជ សាំង បានឲ្យដឹងថា តម្រូវការប្រើប្រាស់តូចបានកើនឡើងនៅឆ្នាំនេះ ដោយអត្រាប្រើប្រាស់សរុបបានកើនឡើងរហូតដល់ ៩៥ ភាគរយ នាឆ្នាំនេះ ដោយសារការកើនឡើងរបស់អតិថិជននៅទីក្រុងភ្នំពេញ ដែលនិយមមកលេងកម្សាន្ត និងញុំាអាហារនៅតាមភោជនីយដ្ឋាននានាក្នុងផ្សារទំនើបនេះ។

លោកបន្តថា ៖ «ខ្ញុំសង្កេតឃើញកម្លាំងទិញ ពីប្រជាពលរដ្ឋនៅតែរក្សាសភាពទ្រឹង ព្រោះផ្សារទំនើបភាគច្រើនលក់ដាច់ជាងគេ លើផ្នែកចំណីអាហារ និងការកម្សាន្ត»។

តាមគម្រោងផ្សារទំនើបធំៗចំនួនពីរទៀត នឹងបើកដំណើរការនៅឆ្នាំនេះ គឺផ្សារទំនើបក្នុងអគារ Exchange Square និងផ្សារទំនើប Parkson Mall ស្ថិតនៅតាមមហាវិថីសហព័ន្ឋរុស្ស៊ី។

អ្នកនាង អាន សុធីតា នាយិកាក្រុមហ៊ុនអចលនទ្រព្យលំដាប់ពិភពលោក CBRE Cambodia បានថ្លែងថា ទោះបីជាមានការផ្គត់ផ្គង់ផ្សារទំនើបថ្មីៗក្តី ប៉ុន្តែដោយសារតម្រូវការកើនឡើងបានធ្វើឲ្យការផ្គត់ផ្គង់ និងតម្រូវការ មានភាពសមតុល្យនឹងគ្នា ហើយនិន្នាការដើរផ្សាររបស់ប្រជាពលរដ្ឋខ្មែរបាននិងកំពុងផ្លាស់ប្តូរ ដែលពីមុនពួកគេនិយមដើរផ្សារតាមបែបប្រពៃណី មកពេញនិយមក្នុងការដើរផ្សារទំនើប និងផ្សារមានស្តង់ដារអន្តរជាតិ ចាប់តាំងពីមានវត្តមានផ្សារទំនើប EAON ចូលមកដល់។

អ្នកនាងបន្តថា ៖ «ជាមួយនឹងការកើនឡើងនូវការផ្គត់ផ្គង់នេះ នៅខែមិថុនាខាងមុខផ្សារទំនើបក្នុងគម្រោង Exchange Square នឹងបើកដំណើរការដែលជាផ្សារទំនើបលំដាប់អន្តរជាតិមួយទៀតនៅទីក្រុងភ្នំពេញ»។

អ្នកនាងបន្តថា ៖ «ផ្សារទំនើបនេះនឹងលក់ផលិតផលល្បីៗដែលមានប៊្រេនដ៍ពីផ្សារ AEON Mall និងប៊្រេនដ៍នាំចូលថ្មីៗបន្ថែមទៀត ព្រោះកម្លាំងទិញរបស់ប្រជាពលរដ្ឋខ្មែរមានការកើនឡើង»។

ផ្សារទំនើបក្នុងគម្រោង Exchange Square មានទំហំសរុប ៨ ០០០ ម៉ែត្រការ៉េ និងលក់ផលិតផលចម្រុះដូចជា សម្លៀកបំពាក់ រោងភាពយន្ត ផលិតផលអាហារ និងភេសជ្ជៈជាដើម។ «រហូតមកទល់ពេលនេះ ស្តង់ក្នុងផ្សារទំនើបនេះ បានទទួលការកក់អស់ ៦៥ ភាគរយហើយ និងអគារការិយាល័យក្នុងគម្រោងនេះដែលមានទំហំ ២៨ ០០០ ម៉ែត្រការ៉េ ក៏ទទួលបានការកក់អស់ ៥៥ ភាគរយផងដែរ» នេះបើតាមការបញ្ជាក់របស់អ្នកនាង សុធីតា។

អ្នកនាង សុធីតា បានបន្តថា ៖ «កម្ពុជានៅមានតម្រូវការផ្សារទំនើបបន្ថែមទៀត ដោយសារទំហំផ្សារទំនើបនៅរាជធានីភ្នំពេញ នៅទាបនៅឡើយធៀបជាមួយប្រទេសថៃ»៕

Leave a Reply