កម្មករ​ក្រុម​ហ៊ុន ស៊ីនទ្រី សម្រេច​បន្ត​ធ្វើ​កូដកម្ម​មិន​ប្រមូល​សំរាម

ដោយ ភ្នំពេញប៉ុស្ដិ៍ ថ្ងៃទី ១៧ ខែធ្នូ ឆ្នាំ ២០១៤

ភ្នំពេញៈ កម្មករ​ប្រមូល​សំរាម​នៃ​ក្រុមហ៊ុន​ស៊ីន​ទ្រី អះអាង​ថា នឹង​បន្ត​ធ្វើ​កូដកម្ម មិន​ប្រមូល​សំរាម​ក្នុង​ទីក្រុង​ភ្នំពេញ​បន្ត​ទៀត​នៅ​ថ្ងៃ​ពុធ ដោយ​សារ​ការ​ចរចា​ពី​ការ​ដំឡើង​ប្រាក់​ឈ្មួល​និង​លក្ខខណ្ឌ​ការងារ​មួយ​ចំនួន​ពី​ម្សិល​មិញ​មិន​ត្រូវ​រ៉ូវ​គ្នា។

ការ​ធ្វើ​កូដកម្ម​របស់​ក្រុមហ៊ុន​ស៊ីន​ទ្រី បី​ថ្ងៃ​ជាប់​គ្នា​នេះ បាន​ធ្វើ​ឲ្យ​រាជធានី​ភ្នំពេញ​ជា​បេះដូង​នៃ​ព្រះ​រាជា​ណាចក្រ​កម្ពុជា ក្លាយ​ជា​ទីក្រុង​ដ៏​កខ្វក់​និង​មាន​ក្លិន​ដ៏​ស្អុយ និង​ធ្វើ​ឲ្យ​ប៉ះពាល់​ធ្ងន់​ធ្ងរ​ដល់​សោភណភាព​ទីក្រុង និង​សុខុមាល​ភាព​របស់​ប្រជា​ពលរដ្ឋ ពិសេស​កុមារ​តូច។

តំណាង​កម្មករ​ក្រុមហ៊ុន​ស៊ីន​ទ្រី លោក ប្រាក់ សុខា លើក​ឡើង​ថា៖ «នៅ​ពេល​ដែល​វិបត្តិ​សំរាម និង​កាក​សំណល់​ផ្សេងៗ កក​ស្ទះ​ពេញ​ទីក្រុង​ទើប​គេ​អាច​ដឹង​បាន​ថា កម្មករ​ប្រមូល​សំរាម​មាន​សារៈ​សំខាន់។ ប៉ុន្តែ ជា​ធម្មតា​ជន​ទូទៅ​បាន​មើល​ស្រាល​និង​មិន​ឲ្យ​តម្លៃ​ពួក​យើង​ទេ»។

លោក​បន្ត​ថា សម្រាប់​កម្មករ​បោស​សម្អាត​ទទួល​បាន​ប្រាក់​ឈ្នួល​ត្រឹម​តែ ៩០ ដុល្លារ​ក្នុង ១ ខែ ហើយ​កម្មករ​បោស​និង​កើប​ទទួល​បាន ១០៥ ដុល្លារ​ក្នុង ១ ខែ​សម្រាប់​អ្នក​ធ្វើ​ការ​វេន​ថ្ងៃ​និង​អ្នក​វេន​យប់​ទទួល​បាន ១២០ ដុល្លារ​ក្នុង ១ ខែ។ ដោយ​ឡែក​អ្នក​បើកបរ​និង​ជាង​ជួស​ជុល​រថយន្ត​បាន​ត្រឹម ១៣០ ដុល្លារ ក្នុង ១ ខែ។

លោក​បញ្ជាក់​ថា៖ «ពួក​យើង​ធ្វើ​ការ ១ ថ្ងៃ​រហូត​ជាង ១០ ម៉ោង​ប្រឈម​ទៅ​នឹង​ជំងឺ​ឆ្លង​នានា គ្រោះ​ថ្នាក់​ចរាចរណ៍ និង​ការ​ប្រមាថ​ពី​អស់​លោក​អ្នក​មាន​ប្រាក់​ដែល​ស្រវឹង​ស្រា​មក​បង្ក​រឿង​ស្ទើរ​រាល់​ថៃ្ង»។

លោក​បញ្ជាក់​ថា ការ​ចរចា​ពេញ ១ ថ្ងៃ អង្គារ ភាគី​កម្មករ​សុំ​ដំឡើង​ប្រាក់​ខែ​គោល​ដល់​កម្មករ​បោស​កើប ១៥០ ដុល្លារ និង ២៥០ ដុល្លារ​សម្រាប់​ជាង​ជួស​ជុល​រថយន្ត​និង​អ្នក​បើក​បរ ប៉ុន្តែ​ខាង​ក្រុមហ៊ុន​បដិសេធ និង​យល់​ព្រម​ដំឡើង​ត្រឹម ១៥ ដុល្លារ​លើ​ប្រាក់​ខែ​គោល​ចាស់​សម្រាប់​កម្មករ​បោស​កើប​និង ៣៥ ដុល្លារ សម្រាប់​ជាង​និង​អ្នក​បើកបរ។ ប៉ុន្តែ​ការ​ចរចា​នេះ​មិន​ត្រូវ​គ្នា​ទេ បើ​ទោះ​កម្មករ​បោស​សម្អាត​យល់​ព្រម​ទទួល​យក​ការ​ដំឡើង ១០ ដុល្លារ លើ​ប្រាក់​ខែ​គោល​ចាស់​ក្នុង ខែ​ធ្នូ នេះ​ក្តី។

លោក​អះអាង​ថា៖ «ដោយ​ការ​ចរចា​មិន​ត្រូវ​គ្នា កម្មករ​បាន​សម្រេច​ឯកភាព​គ្នា​ថា​នឹង​បន្ត​ធ្វើ​កូដកម្ម​មិន​ធ្វើ​ការ​នៅ​ព្រឹក​ថ្ងៃ​ពុធ​នេះ​ជា​បន្ត​ទៀត»។

អ្នក​ស្រី ចាន់ យូអេង អាយុ ៥៤​ឆ្នាំ នៅ​ម្តុំ​ផ្សារ​គីឡូម៉ែត្រ​លេខ ៦ បាន​ប្រាប់​ថា គាត់​បាន​បង់​ថ្លៃ​អនាម័យ ២០០ រៀល​ក្នុង ១ ថ្ងៃ និង បង់​ថ្លៃ​សំរាម ៥ ដុល្លារ​ក្នុង ១ ខែ ឲ្យ​ក្រុមហ៊ុន​ប៉ុន្តែ​ហេតុ​អ្វី បាន​ជា​ក្រុមហ៊ុន​មិន​ចាត់​វិធានការ​ប្រមូល​សំរាម​យក​ទៅ​ចោល។

គាត់​បន្ត​ថា៖ «សំរាម​នៅ​ផ្សារ​នេះ​កក​ស្ទះ​គរ​ដូចជា​ភ្នំ​ស្ទើរ​លិច​ដំបូល​ផ្សារ​ទៅ​ហើយ មាន​រុយ​និង​ដង្ហូវ​ទៀត​ផង»។

គាត់​ព្រមាន​ថា​នឹង «ឈប់​បង់​ថ្លៃ​សំរាម» ទៀត​ហើយ បើ​គ្មាន​អ្នក​ប្រមូល​សំរាម​ទេ​នោះ។

កាល​ពី​ម្សិល​មិញ លោក ងួន ស៊ីភេង ប្រធាន​ការិយាល័យ​ប្រតិបត្តិការ​និង​រដ្ឋបាល​នៃ​ក្រុម​ហ៊ុន​ស៊ីន​ទ្រី មិន​អាច​ទាក់ទង​សុំ​ការ​ពន្យល់​ពី​បញ្ហា​នេះ​បាន​ទេ។

សំរាម​និង​កាក​សំណល់​នានា​ក្នុង​ទីក្រុង​ភ្នំពេញ ត្រូវ​បាន​រាយការណ៍​ថា មាន​ជាង ២ ពាន់​តោន​ក្នុង​ថ្ងៃៗ ហេតុ​ដូច្នេះ​ការ​អាក់​ខាន​មិន​បាន​ប្រមូល​ដឹក​ចេញ​ទៅ​ក្រៅ​ក្រុង បាន​បង្ក​ឲ្យ​មាន​ផល​ប៉ះពាល់​យ៉ាង​ធ្ងន់​ធ្ងរ​ដល់​សោភណភាព​ទីក្រុង និង​សុខុមាល​ភាព​ប្រជា​ពលរដ្ឋ។

លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​ភ្នំពេញ​បាន​ថ្លែង​ថា ក្រុម​កម្មករ​បាន​យក​ប្រជា​ពលរដ្ឋ​និង​មន្ត្រី​រាជការ​ក្នុង​ទីក្រុង​ភ្នំពេញ​ទាំង​មូល​ធ្វើ​ជា​ចំណាប់​ខ្មាំង ដោយ​ទុក​សំរាម​នៅ​គរ​ដូច​ភ្នំ​ដើម្បី​ដាក់​សម្ពាធ​លើ​ក្រុម​ហ៊ុន។

លោក​ថ្លែង​ថា៖ «ក្នុង​នាម​អាជ្ញាធរ​យើង​អំពាវនាវ​ដល់​ភាគី​ទាំង​ពីរ គឺ​ក្រុម​ហ៊ុន​និង​កម្មករ​ធ្វើ​ការ​ចរចា​រក​ដំណោះ​ស្រាយ​ឲ្យ​បាន​ឆាប់​បំផុត ដោយ​កុំ​យក​សំរាម​មក​ធ្វើ​ជា​ឧបករណ៍​ក្នុង​ការ​ចាប់​ជំរិត​ពលរដ្ឋ​ក្នុង​ទីក្រុង​និង​កុំ​ទុក​សំរាម​ឲ្យ​ប៉ះពាល់​ដល់​បរិស្ថាន​សាធារណៈ​និង សុខុមាលភាព​ពលរដ្ឋ​ទូទៅ»។

លោក​បន្ត​ថា សាលា​រាជធានី​បាន​ចាត់​ឲ្យ​តាម​សាលា​ខណ្ឌ​ចាត់​កម្លាំង​សណ្ដាប់​ធ្នាប់​ធ្វើ​ការ​ប្រមូល​សំរាម​និង​ប្រើ​រថយន្ត​ក្នុង​អង្គភាព​ដឹក​សំរាម​ចេញ​ជា​បន្ទាន់​ដើម្បី​ការពារ​បរិស្ថាន៕

Leave a Reply