នារី​រោងចក្រ​កាត់ដេរ​ម្នាក់​ស្លាប់ និង​ ២៧ ​នាក់​សន្លប់​សង្ស័យ​ពុល​ថ្នាំ
Posted On : June, 2, 2017 | By Thak Sreyleak

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ប្រភព ៖ ភ្នំពេញបុស្តិ៍

ក្រុមសមត្ថកិច្ចបានកំពុងធ្វើការស្រាវជ្រាវស្វែងរកពីមូលហេតុដែលបានបណ្ដាលឲ្យកម្មការិនីម្នាក់ស្លាប់ និង ២៧ នាក់ទៀតបានដួលសន្លប់កាលពីរសៀលថ្ងៃពុធដោយសង្ស័យបណ្ដាលមកពីពុលថ្នាំជ្រលក់ក្រណាត់។ យោងតាមនគរបាលមូលដ្ឋានដែលបានថ្លែងឲ្យដឹងកាលពីម្សិលមិញ។

លោក តឹប ប៊ុនថេន នាយនគរបាលប៉ុស្តិ៍សង្កាត់ក្រាំងពង្របានប្រាប់កាសែតភ្នំពេញប៉ុស្តិ៍ពីម្សិលមិញថាកម្មការិនីរងគ្រោះឈ្មោះ ខាត់ សាមើល អាយុ ៤៣ ឆ្នាំបម្រើការងារផ្នែកដេរនៅក្នុងរោងចក្រកាត់ដេរអាកាសសិត (Accasette Garment Co; Ltd) ដែលមានទីតាំងស្ថិតនៅសួនវឌ្ឍនៈ ២ ក្នុងខណ្ឌដង្កោ រាជធានីភ្នំពេញ។

លោកបានបញ្ជាក់ថាតាមការអះអាងជនរងគ្រោះបានស្លាប់ពេលដឹកទៅដល់គ្លីនិកឯកជនមួយនៅខណ្ឌពោធិ៍សែនជ័យ។

ក្រោយទទួលដំណឹងថាជនរងគ្រោះបានស្លាប់កម្មការិនីផ្សេងទៀតមានអារម្មណ៍តក់ស្លុតហើយក៏បានដួលសន្លប់ជាបន្តបន្ទាប់ ២៧ នាក់។ ភ្លាមៗនោះទាំងខាងតំណាងរោងចក្រ និងអាជ្ញាធរមូលដ្ឋានបានចេញជួយអន្តរាគមន៍នាំជនរងគ្រោះទាំងនោះទៅកាន់មន្ទីរព្យាបាលជំងឺទូទៅ និងសម្ភព ហ៊ាងមុន្នីវុធដើម្បីជួយសង្គ្រោះ។

លោកថ្លែងថា៖ «តាមការសន្និដ្ឋានក្នុងជំហានដំបូងរបស់អាជ្ញាធរមូលដ្ឋានយើងខ្ញុំកម្មការិនីដែលរងគ្រោះដល់ជីវិតនោះទំនងជាបណ្ដាលមកពីមានបញ្ហាជំងឺផ្លូវដង្ហើមដែលបង្កឡើងដោយការស្រូបក្លិនគីមីពុលដែលជាប់នឹងក្រណាត់ ហើយកម្មការិនីដែលដួលសន្លប់ផ្សេងទៀតអាចបណ្ដាលមកពីអារម្មណ៍ភ័យតក់ស្លុត។ ប៉ុន្តែករណីនេះក្រុមមន្ត្រីជំនាញមកពីក្រសួងការងារកំពុងធ្វើការស្រាវជ្រាវ»។

លោក សោម អូន ប្រធានសភាសម្ព័ន្ធសហជីពជាតិកម្ពុជាបាននិយាយថាសពកម្មការិនីរងគ្រោះត្រូវបានក្រុមគ្រួសារនាំយកទៅធ្វើបុណ្យនៅឯស្រុកកំណើតដែលស្ថិតនៅក្នុងស្រុកកណ្ដាលស្ទឹង ខេត្តកណ្ដាល។

លោកនិយាយថា៖ «ខ្ញុំអាចសន្និដ្ឋានបានថាករណីស្លាប់របស់កម្មការិនីឈ្មោះ ខាត់ សាមើល គឺជាករណីគ្រោះថ្នាក់ការងារដែលជាការទទួលខុសត្រូវទាំងស្រុងរបស់បេឡាជាតិរបបសន្តិសុខសង្គម»។ លោក ចេវ ប៊ុនរិទ្ធ អ្នកនាំពាក្យ ប.ស.ស នៃក្រសួងសង្គមកិច្ចមិនអាចទាក់ទងបានទេម្សិលមិញ។

ទោះជាបែបណាក្ដីក្រសួងការងារ និងបណ្ដុះបណ្ដាលវិជ្ជាជីវៈបានចេញមុខទទួលដោះស្រាយបញ្ហាខាងលើនេះដល់ក្រុមគ្រួសារជនរងគ្រោះទៅតាមគោលរបបសន្តិសុខសង្គមរបស់បេឡាជាតិរបបសន្តិសុខសង្គម៕

Urban Voice Cambodia

Urban Voice Cambodia