City Park សាងសង់​ខុនដូ​លំដាប់​ផ្កាយ​៥​នៅ​បឹងកេងកង​១
Posted On : January, 24, 2015 | By សំឡេងទីក្រុង

ដោយ ស៊ីវ ម៉េង, ភ្នំពេញបុស្តិ៍ុ,​ ថ្ងៃទី ២៤ មករា ២០១៥

បន្ទាប់ពី​មើល​ឃើញ​ទីផ្សារ​ខុនដូ​នៅ​កម្ពុជា កាន់តែ​មាន​សញ្ញា​វិជ្ជមាន ដោយសារ​កត្តា​សេដ្ឋកិច្ច និង​លក្ខខណ្ឌ​ធម្មជាតិ​របស់​ប្រទេស​កម្ពុជា​មាន​អំណោយផល​ល្អ​នោះ​ក្រុមហ៊ុន City Park Development Plc កាលពី​ពេល​ថ្មីៗ​នេះ​បាន​សម្រេច​បោះទុន​វិនិយោគ​ចំនួន​៣៦​លាន​ដុល្លារអាមេរិក ដើម្បី​សាងសង់​ខុនដូ​មួយ​មាន​កម្ពស់ ​២៥ ​ជាន់ នៅក្នុង​សង្កាត់​បឹងកេងកង ​១ រាជធានី​ភ្នំពេញ។

អ្នកនាង Ting Hsu ជំនួយការ​នាយក​គ្រប់គ្រង​ទូទៅ​ក្រុមហ៊ុន City Park Development Plc បាន​ប្រាប់​ថា បន្ទាប់ពី​បាន​ធ្វើ​ដំណើរ​មក​កម្សាន្ត​នៅ​ប្រទេស​កម្ពុជា​កាលពី​ឆ្នាំ​មុន​ថ្នាក់​ដឹកនាំ​ក្រុមហ៊ុន City Park Development Plc បាន​មើល​ឃើញ​ថា ទីផ្សារ​អចលនទ្រព្យ​នៅ​កម្ពុជា​មាន​ភាព​ល្អប្រសើរ​យ៉ាងខ្លាំង ជា​ហេតុ​ធ្វើឲ្យ​ក្រុមហ៊ុន​សម្រេច​ចិត្ត​មក​បោះទុន​វិនិយោគ​សាងសង់​ខុនដូ City Park នេះ​ឡើង។ ខុនដូ​នេះ​បាន​ចាប់ផ្តើម​បើក​ការដ្ឋាន​សាងសង់​កាលពី​ដើម​ខែ​មករា​នេះ ដោយ​គ្រោង​នឹង​បញ្ចប់​ការ​សាងសង់​នៅ​ចុង​ឆ្នាំ​ ២០១៧​។ City Park មាន​កម្ពស់​២៥​ជាន់ និង​មាន​ចំណត​រថយន្ត​នៅ​ក្រោម​ដី​ ៣​ ជាន់​។

អ្នកនាង Ting Hsu មាន​ប្រសាសន៍​ថា៖ «គិត​ចាប់ពី​ពេល​បើក​ដំណើរការ​លក់​រហូត​មក​ទល់​ពេល​នេះ​យើង​លក់​ផ្ទះ​ក្នុង​គម្រោង​ខុនដូ City Park អស់​ប្រហែល​៦០​ភាគរយ​ហើយ នៅក្នុង​ចំណោម​ផ្ទះ​សរុប​ចំនួន​១៣០​យូនីត»។

អ្នកនាង​បន្ត​ថា​៖​«បឹងកេងកង​១ ជា​សង្កាត់​លេខ​១ នៅ​កណ្តាល​រាជធានី​ភ្នំពេញ ដែល​មាន​ភាព​ងាយស្រួល​សម្រាប់​ការ​រស់នៅ និង​មាន​សុវត្ថិភាព​ល្អ ទើប​យើង​មក​វិនិយោគ​នៅ​ទី​នេះ។ ការ​សាងសង់​របស់​យើង​មិនមែន​គិត​តែ​ប្រាក់​ចំណេញ​នោះ​ទេ តែ​យើង​ក៏​ចង់​បាន​កិត្តិយស​សម្រាប់​ក្រុមហ៊ុន​ផង​ដែរ​»។

City Park សាងសង់​លើ​ផ្ទៃដី​ទំហំ​១១៣០​ម៉ែត្រការ៉េ ស្ថិត​តាម​បណ្តោយ​ផ្លូវ​លេខ ​៣៥២ ក្នុង​សង្កាត់​បឹងកេងកង ​១ ខណ្ឌ​ចំការមន រាជធានី​ភ្នំពេញ។ ខុនដូ​នេះ​មាន​ផ្ទះ​ចាប់ពី​១​បន្ទប់​គេង រហូត​ដល់​៤​បន្ទប់​គេង និង​លក់​ក្នុង​តម្លៃ​ខុសៗ​គ្នា​ទៅ​តាម​ជាន់​នីមួយៗ​ ដូចជា ផ្ទះ​នៅ​ជាន់​ទី​១២ លក់​ក្នុង​តម្លៃ ​៣៥០០​ ដុល្លារ​ក្នុង​១​ម៉ែត្រការ៉េ ហើយ​ចាប់ពី​ជាន់​ទី ​១២​ ចុះ​ដល់​ជាន់​ទី​៥​តម្លៃ​ធ្លាក់​ចុះ ​១០០ ​ដុល្លារ​ក្នុង ​១ ​ម៉ែត្រការ៉េ​គ្រប់​ជាន់​នីមួយៗ​។ ចាប់ពី​ជាន់​ទី​ ១២​ ឡើង​ដល់​ជាន់​ទី​ ២១ តម្លៃ​ផ្ទះ​កើនឡើង​ ១០០​ ដុល្លារ​ក្នុង​មួយ​ម៉ែត្រការ៉េ​រៀងរាល់​ជាន់​នីមួយៗ​ពី​តម្លៃ​គោល​៣៥០០​ដុល្លារ។ ចំណែក​ជាន់​ទី ​២២​ ដល់​ជាន់​ទី ​២៥ គឺជា​ កន្លែង​សាធារណៈ​សម្រាប់​រៀបចំ​ពិធី​ជប់លៀង អាង​ហែលទឹក កន្លែង​ហាត់ប្រាណ ស៉្បា Sky Bar និង​សួនច្បារ​សាធារណៈ។ នៅ​ជាន់​ទី​ ១ ជា​កន្លែង​ឡប់ប៊ី និង​ចាប់ពី​ជាន់​ទី​ ២​ ដល់​ទី ​៤ ជា​ទីតាំង​ការិយាល័យ​សម្រាប់​លក់​។

អ្នកនាង​បន្ត​ថា ផ្ទះ​នីមួយៗ​ក្នុង​ខុនដូ City Park ត្រូវ​បាន​ឌីហ្សាញ និង​តុបតែង​លម្អ​ដោយ​ក្រុមហ៊ុន​ផ្ទាល់ ពិសេស​ក្រុមហ៊ុន​នឹង​បំពាក់​សម្ភារ​បរិក្ខារ​ប្រើប្រាស់​ម៉ាក​ល្បីៗ​ជូន​អតិថិជន​ផង​ដែរ​។

អ្នកនាង​បន្ថែម​ថា ស្ថាបត្យករ​រចនា​ប្លង់ City Park បាន​រចនា​អគារ​នេះ​យ៉ាង​ពិសេស ដើម្បី​អាច​ស្រូប​យក​ពន្លឺ​ព្រះ​អាទិត្យ​ពី​ខាង​ក្រៅ ហើយ​នៅ​គ្រប់​ជាន់​សុទ្ធតែ​មាន​ដាំ​ដើមឈើ​ដើម្បី​ផ្តល់​បរិស្ថាន​បៃតង​សម្រាប់​អគារ​។ ផ្ទះ​នីមួយៗ​មាន​កម្ពស់​ ៣,៦ ​ម៉ែត្រ ខណៈ​ផ្ទះ​ដែល​មាន​៤​បន្ទប់​គេង នឹង​មាន​កម្ពស់​រហូត​ដល់ ​៧​ ម៉ែត្រ ព្រោះ​ផ្ទះ​ដែល​មាន​ ៤ ​បន្ទប់​គេង​មាន​ជាន់​ឡៅតឿ​ផង​ដែរ​។

អ្នកនាង Ting Hsu បាន​អះអាង​ថា​៖ «​ដោយសារ​កម្ពុជា​មាន​អំណោយផល​ពី​ធម្មជាតិ មិន​មាន​ខ្យល់ព្យុះ និង​រញ្ជួយដី​ដូច​នៅ​តៃវ៉ាន់​ទើប​យើង​មក​វិនិយោគ​នៅ​ទី​នេះ។ បើ​ទោះបី​ជា​កម្ពុជា​មិន​មាន​ខ្យល់​ព្យុះ និង​រញ្ជួយដី​ក្តី ក៏​វិស្វករ និង​ស្ថាបត្យករ​សាងសង់​អគារ​នេះ​បាន​បុកគ្រឹះ​ធំៗ និង​រៀបចំ​ប្រព័ន្ធ​បង្ការ​ការ​រញ្ជួយដី​ផង​ដែរ»។

អ្នកនាង​បាន​បន្ត​ថា​៖ ​«​ខុនដូ​នេះ​នឹង​ត្រូវ​រចនា​យ៉ាង​ប្រណីត ដោយ​មាន​បំពាក់​នូវ​សម្ភារ​បរិក្ខារ​ទំនើប​លំដាប់​សណ្ឋាគារ​ផ្កាយ​ប្រាំ ព្រោះ​អតិថិជន​គោលដៅ​របស់​យើង​គឺជា​អ្នក​មាន​ប្រាក់​ច្រើន ហេតុនេះ​ទើប​យើង​មិន​លក់​បន្ទប់​នៅ​សល់​ ៤០​ ភាគរយ ​ទៅឲ្យ​អតិថិជន​ផ្តេសផ្តាស​ឡើយ ដោយ​យើង​ចង់​បាន​អតិថិជន​លំដាប់​ខ្ពស់ និង​មាន​កិត្តិយស​មក​រស់នៅ​ទី​នេះ​»​។

លោក ប៉ូ អ៊ាវគង់ ប្រធាន​គ្រប់គ្រង​ទូទៅ​នៃ​ក្រុមហ៊ុន អេស៊ា រៀលអេស្ទេត បាន​និយាយ​ថា បើ​និយាយ​ពី​អាផាតមិន ជួល​នៅ​តំបន់​បឹងកេងកង​១ គឺ​មាន​អត្រា​ប្រើប្រាស់​ចន្លោះ​ពី​ ៨០ ទៅ ​៩៥​ ភាគរយ ព្រោះ​តំបន់​បឹងកេងកង​ ១ នៅ​តែ​មាន​ប្រជាប្រិយភាព និង​ជា​គោលដៅ​របស់​អ្នកវិនិយោគ​បរទេស​។

លោក​បាន​បន្ត​ថា បើ​ទោះបី​មាន​អាផាតមិន ច្រើន​នៅ​តំបន់​នេះ​ច្រើន​ហើយ​ក៏ដោយ ក៏​តំបន់​នេះ​នៅ​តែ​មាន​តម្រូវការ​ខុនដូ​ថ្មីៗ និង​អាផាតមិន​ថ្មីៗ​បន្ថែម​ទៀត​ដែរ ព្រោះ​តំបន់​បឹងកេងកង​ ១ នៅ​តែ​មាន​តម្រូវការ​ខ្ពស់ និង​មាន​សក្តានុពល​នៅ​ឡើយ​។

លោក​មាន​ប្រសាសន៍​ថា​៖​«តម្លៃ​ផ្ទះ​ដែល​ក្រុមហ៊ុន City Park Development Plc លក់​ចេញ​វា​ជា​កំណត់ត្រា​ថ្មី​មួយ​ដែល​មិន​ធ្លាប់​មាន​នៅ​កម្ពុជា​ព្រោះ​តម្លៃ​របស់​ខុនដូ City Park លើស​គម្រោង​ផ្សេងៗ​ក្នុង​រង្វង់ ​១៥ ​ទៅ ​២០ ​ភាគរយ ខណៈ​ពេល​នេះ​យើង​មិន​ទាន់​បាន​ឃើញ​គុណភាព​នៃ​ការ​ឌីហ្សាញ​របស់​គាត់​បែប​ណា​នៅ​ឡើយ​ទេ»។

លោក គុយ វ៉ាត អគ្គនាយក​ក្រុមហ៊ុន វីត្រាស់ គ្រុប បាន​បដិសេធ​ដោយ​មិន​អត្ថាធិប្បាយ​ច្រើន​ទេ​លោក​គ្រាន់តែ​ថ្លែង​យ៉ាង​ខ្លី​ថា​៖ «​បើ​តាម​របាយការណ៍​សិក្សា​របស់​ក្រុមហ៊ុន Century21 Cambodia ដែល​ទើប​ចេញ​ផ្សាយ​កាលពី​ពេល​ថ្មីៗ​នេះ​បាន​ឲ្យ​ដឹង​ថា ចំនួន​នៃ​ការ​ផ្គត់ផ្គង់​ហាក់​លើស​ពី​តម្រូវការ​ទៅ​ហើយ​នា​ពេល​នេះ​»៕

Urban Voice Cambodia

Urban Voice Cambodia