BOOYOUNG TOWN នឹង​ចាប់​ផ្តើម​សាង​សង់​នៅ​ឆ្នាំ​ក្រោយ

ប្រភព៖ www.postkhmer.com, Sat, 20 December 2014,

គម្រោង​បង្កើត​មជ្ឈមណ្ឌល​ពាណិជ្ជ​កម្ម និង​លំនៅឋាន​ប្រកប​ដោយ​មហិច្ឆតា Booyoung Town ដែល​គ្រោង​ចំណាយ​ទុន​វិនិយោគ ១,១ ពាន់​លាន​ដុល្លារ​អាមេរិក ស្ថិត​នៅ​តាម​បណ្តោយ​មហាវិថី​សហព័ន្ធ​រុស្ស៊ី នឹង​ចាប់​ផ្តើម​បើក​ដំណើរ​ការ​សាង​សង់​អគារ​មួយ​ចំនួន​នៅ​ក្នុង ឆ្នាំ​២០១៥ ខាង​មុខ​នេះ​ហើយ។

នាយក​គម្រោង Booyoung Town ប្រចាំ​កម្ពុជា​ដែល​សុំ​មិន​ឲ្យ​បញ្ចេញ​ឈ្មោះ​បាន​ប្រាប់ ប៉ុស្តិ៍ អចលន​ទ្រព្យ កាល​ពី​ពេល​ថ្មីៗ​នេះ​ថា បច្ចុប្បន្ន​ក្រុម​ហ៊ុន​កំពុង​ឌីហ្សាញ​គម្រោង​នេះ​ឡើង​វិញ មុន​នឹង​ចាប់​ផ្តើម​ដំណើរ​ការ​សាង​សង់​នៅ ឆ្នាំ​២០១៥ ខាង​មុខ ខណៈ​ពេល​នេះ​ក្រុម​ហ៊ុន​កំពុង​ជីក​ដី​សម្រាប់​ប្រើ​ប្រាស់​ធ្វើ​ជា​ចំណត​ យានយន្ត​នៅ​ក្រោម​ដី។ គម្រោង​នេះ​រួម​មាន អាផាតមិន ខុនដូ ផ្សារ​ទំនើប និង​អគារ​ការិយាល័យ។

លោក​បន្ត​ថា ការ​ឌីហ្សាញ​គម្រោង​នេះ​ឡើង​វិញ គឺ​ដើម្បី​បត់​បែន​ទៅ​តាម​តម្រូវការ​ទីផ្សារ​នៅ​កម្ពុជា​នា​ពេល​បច្ចុប្បន្ន ហើយ​សំណង់​របស់ Booyoung Town ក៏​មាន​ការ​រចនា​ដោយ​ការ​ច្របាច់​បញ្ចូល​គ្នា​នូវ​ស្ថាបត្យ​កម្ម​ខ្មែរ​ និង​កូរ៉េ​ផង​ដែរ។

លោក​បាន​ថ្លែង​ថា៖ «មុន​ដំបូង​យើង​ឌីហ្សាញ​ផ្ទះ​ធំៗ​សម្រាប់​ខុនដូ និង​អាផាតមិន ប៉ុន្តែ​ទីផ្សារ​នៅ​ទីនេះ​ពេញ​និយម​ផ្ទះ​ដែល​មាន​ពីរ ឬ​បី​បន្ទប់​ប៉ុណ្ណោះ ដូច្នេះ​ទើប​យើង​ត្រូវ​រៀបចំ​ឌីហ្សាញ​ប្លង់​ខុនដូ និង​អាផាតមិន ឡើង​វិញ ដើម្បី​ឆ្លើយ​តប​នឹង​តម្រូវការ​ទីផ្សារ​ជាក់ស្តែង»។

លោក​បាន​បន្ត​ថា៖ «យើង​នឹង​ទទួល​បាន​ជោគជ័យ ព្រោះ​គម្រោង​នេះ​មាន​បណ្តុំ​ចម្រុះ​ទៅ​ដោយ​អាផាតមិន ខុនដូ ផ្សារ​ទំនើប និង​កន្លែង​កម្សាន្ត​ជា​ច្រើន។ យើង​ចង់​ផ្តល់​បទ​ពិសោធ និង​បែប​បទ​នៃ​ការ​រស់​នៅ​ក្នុង​ទីក្រុង​របស់​ប្រទេស​យើង​ថា តើ​មាន​ភាព​ងាយ​ស្រួល​បែប​ណា ដល់​ប្រជាជន​កម្ពុជា»។

គម្រោង​នេះ​បាន​បើក​សម្ពោធ​ការដ្ឋាន​ជា​ផ្លូវ​ការ កាល​ពី​ចុង ខែ​ឧសភា ឆ្នាំ​២០១៣ លើ​ផ្ទៃ​ដី​ទំហំ ២៣,៥ ហិកតា ស្ថិត​តាម​បណ្តោយ​មហាវិថី​សហព័ន្ធ​រុស្សី ជិត​ស្ពាន​អាកាស ៧​មករា។

ថ្នាក់​ដឹកនាំ​ជាន់​ខ្ពស់​ក្រុមហ៊ុន​ខាង​លើ​បាន​ឲ្យ​ដឹង​ទៀត​ថា ស្ថានភាព​អចលនទ្រព្យ​នៅ​កម្ពុជា​កំពុង​មាន​ការ​រីក​ចម្រើន​គួរ​ឲ្យ​កត់​ សម្គាល់ ដោយ​នៅ​ពេល​នេះ​មាន​ក្រុមហ៊ុន​ធំៗ​ជា​ច្រើន​កំពុង​ចាប់​ផ្តើម​សាង​សង់​ខុនដូ ​ អាផាតិមិន និង​អគារ​ជាច្រើន​ទៀត​នៅ​រាជធានី​ភ្នំពេញ។ ហេតុ​នេះ​ក្រុម​ហ៊ុន​នឹង​ចាប់​ផ្តើម​គម្រោង​នេះ​ប្រកប​ដោយ​ទំនុក​ចិត្ត ព្រោះ​ក្រុម​ហ៊ុន​បាន​ទិញ​ដី​មក​ទុក​សម្រាប់​ធ្វើ​ការ​អភិវឌ្ឍ មិន​មែន​ទិញ​ទុក​សម្រាប់​លក់​នោះ​ទេ។

ទីតាំង​គម្រោង Booyoung Town ដែល​ស្ថិត​នៅ​តាម​បណ្តោយ​មហាវិថី​សហព័ន្ធ​រុស្ស៊ី ។ រូបថត ហ៊ឹន ពិសី

ខណៈ​បច្ចុប្បន្ន​គេ​សង្កេត​ឃើញ​ថា កម្រិត​ជីវភាព​របស់​ប្រជាជន​ខ្មែរ​កំពុង​កើន​ឡើង ហើយ​ឥរិយាបថ​ក្នុង​ការ​រស់​នៅ​អគារ​សហ​កម្មសិទ្ធិ​កាន់​តែ​កើន​ឡើង​នោះ ថ្នាក់​ដឹក​នាំ​នៃ​គម្រោង​ខាង​លើ​បាន​អះអាង​ថា អតិថិជន​គោល​ដៅ​របស់​ក្រុមហ៊ុន​មាន​ប្រជាជន​ខ្មែរ និង​ជន​បរទេស​មួយ​ចំនួន​ដូច​ជា កូរ៉េ ចិន តៃវ៉ាន់ ហុងកុង និង​សិង្ហបុរី។

លោក​បាន​ថ្លែង​ថា៖ «ខ្ញុំ​គិត​ថា​នៅ​ពេល​អនាគត​ប្រជាជន​ខ្មែរ​នឹង​ប្តូរ​មក​រស់​នៅ​ខុនដូ​កាន់​ តែ​ច្រើន​ដូច​ប្រជាជន​កូរ៉េ​ដែល​ពេញ​និយម​ការ​រស់​នៅ​តាម​ខុនដូ ព្រោះ​ការ​រស់​នៅ​ក្នុង​ខុនដូ គឺ​មាន​សុវត្ថិភាព ផាសុកភាព និង​ប្រព័ន្ធ​សន្តិសុខ​ល្អ​ប្រសើរ»។

លោក គីម ហ៊ាង នាយក​ក្រុម​ហ៊ុន ខ្មែរ រៀល​អេស្ទេត បាន​ប្រាប់​ថា ​ទីតាំង​របស់​គម្រោង​ Booyoung Town នេះ​គឺ​ពិត​ជា​ល្អ​ណាស់ បើ​មើល​មែន​ទែន​ទៅ​គឺ​អាច​ល្អ​ជាង​ទីតាំង​នៅ​កោះពេជ្រ និង​តំបន់​ជ្រោយចង្វារ​ទៅ​ទៀត។ នៅ​តំបន់​នោះ​មាន​ស្ពាន​អាកាស ៧​មករា ហើយ​គម្រោង​សាងសង់​ស្ពាន​អាកាស​សាលា​តិចណូ បាន​និង​កំពុង​ដំណើរ​ការ​ដើម្បី​ជួយ​សម្រួល​ចរាចរណ៍​នៅ​លើ​មហាវិថី​នេះ។ មហាវិថី​នេះ​ជា​ផ្លូវ​ដែល​គណៈ​ប្រតិភូ និង​អ្នក​ធំ​ទាំង​អស់​ឆ្លង ដូច្នេះ​លោក​គិត​ថា បើ​គម្រោង​នេះ​ចាប់​ផ្តើម​ធ្វើ​ពិត​ប្រាកដ​វា​នឹង​ទទួល​ជោគជ័យ និង​មិន​លំបាក​លក់​នោះ​ទេ។

លោក​បាន​ប្រសាសន៍​ថា៖ «អ្វី​សំខាន់​នា​ពេល​នេះ​តើ Booyoung Town ធ្វើ​ពិត ឬ​មិន​ពិត តែ​បើ​ធ្វើ​ពិត​ជន​បរទេស​នឹង​ទិញ​ច្រើន ហើយ​គម្រោង​នេះ​នឹង​ទទួល​បាន​ជោគ​ជ័យ»។ លោក​បាន​បន្ត​ថា៖ «បើ​សង់​តែ​ខុនដូ និង​សង់​តែ​ផ្សារ​ទំនើប​សុទ្ធ​មិន​ល្អ​ប៉ុន្មាន​ទេ តែ​បើ​គាត់​បង្កើត​ជា​កន្លែង​ចម្រុះ​មាន​ទាំង​ផ្សារ​ទំនើប ខុនដូ និង​អគារ​ការិយាល័យ​បែប​នេះ​ពិត​ជា​ល្អ និង​ទទួល​បាន​ការ​ចាប់​អារម្មណ៍​ច្រើន»។

លោក សន សៀប នាយក​នៃ​ក្រុម​ហ៊ុន ឃី រៀល​អេស្ទេត បាន​សម្តែង​សុទិដ្ឋិ​និយម​ផង និង​ព្រមាន​ផង​ថា គម្រោង​នេះ​ស្ថិត​នៅ​ទីតាំង​ល្អ និង​មាន​ទំហំ​ដី​ធំ ដូច្នេះ​ប្រសិន​បើ​គម្រោង​នេះ​មាន​ផែនការ​អភិវឌ្ឍន៍​ត្រឹម​ត្រូវ និង​ច្បាស់​លាស់​វា​នឹង​ជួយ​លើក​ស្ទួយ​មុខ​មាត់​វិស័យ​អចលន​ទ្រព្យ​នៅ​ កម្ពុជា ព្រម​ទាំង​ជួយ​លើក​កម្ពស់​សោភណភាព​រាជធានី​ភ្នំពេញ​ផង​ដែរ។ ប៉ុន្តែ​គេ​មិន​ប្រាកដ​ថា គម្រោង​នេះ​នឹង​មាន​អ្នក​ទិញ​អស់​នោះ​ទេ ព្រោះ​វា​ជា​គម្រោង​ធំ ខណៈ​បច្ចុប្បន្ន​នេះ​មាន​គម្រោង​ធំៗ​មួយ​ចំនួន​លក់​មិន​សូវ​បាន​ទទួល​ជោគជ័យ ​នោះ​ទេ។

លោក​បញ្ជាក់​ថា៖ «បើ​គម្រោង​នេះ​ចាប់​ផ្តើម​នៅ​ឆ្នាំ​ក្រោយ​ដែល​ជា​ពេល​កម្ពុជា​ត្រូវ​ធ្វើ​ សមាហរណ​កម្ម​សេដ្ឋកិច្ច​ទៅ​ក្នុង​តំបន់​អាស៊ាន​នោះ គឺ​ក្រុមហ៊ុន​មិន​ត្រឹម​តែ​មាន​ទីផ្សារ​ក្នុង​ស្រុក​នោះ​ទេ តែ​គឺ​សម្រាប់​ទីផ្សារ​អាស៊ាន​ទាំង​មូល​តែ​ម្តង»។

ទោះ​បី​យ៉ាង​ណា​លោក​ព្រមាន​ថា៖ «អ្វី​ដែល​ខ្ញុំ​បារម្ភ​គឺ​គម្រោង​របស់​ជនជាតិ​កូរ៉េ​។ មាន​គម្រោង​មួយ​ចំនួន​បាន​លើក​ស្លាក ហើយ​បិទ​ទៅ​វិញ ដែល​ធ្វើ​ឲ្យ​គេ​ពិបាក​ជឿ​ចំពោះ​គម្រោង​របស់​វិនិយោគិន​កូរ៉េ​ណាស់»៕

Leave a Reply

Your email address will not be published. Required fields are marked *