urbanvoice-5

ADB សម្រេច​ផ្ដល់​ប្រាក់កម្ចី ៧០​លាន​ដុល្លារ​ដល់​កម្ពុជា សម្រាប់​កែលំអ​ផ្លូវថ្នល់​

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ធនាគារអភិវឌ្ឍន៍អាស៊ី (ADB) បានអនុម័តផ្ដល់ប្រាក់កម្ចីចំនួន ៧០លានដុល្លារអាមេរិក ដើម្បីជួយជំរុញការអភិវឌ្ឍន៍វិស័យដឹកជញ្ជូនរបស់កម្ពុជា។ នេះបើតាមសេចក្ដីប្រកាសព័ត៌មានរបស់ ADB នៅថ្ងៃទី២៩ខែកញ្ញា។

ការផ្ដល់ប្រាក់កម្ចីនេះ ត្រូវបាន ADB អះអាងថា គឺដើម្បីជួយគាំទ្រវិស័យដឹកជញ្ជូនរបស់កម្ពុជា ឲ្យមានប្រសិទ្ធភាព និងសុវត្ថិភាពជាងមុន ជាពិសេសប្រាក់កម្ចីនេះផ្ដោតលើការកែលំអផ្លូវថ្នល់ក្នុងខេត្តព្រៃវែង សៀមរាប និងខេត្តស្វាយរៀង។ ហិរញ្ញប្បទាននេះជាផ្នែកមួយនៃកម្មវិធីច្រករបៀងសេដ្ឋកិច្ចភាគខាងត្បូងនៃមហាអនុតំបន់ទន្លេមេគង្គ ដែលគាំទ្រដោយ ADB ក្នុងបំណងជំរុញការតភ្ជាប់ទីក្រុងបាងកក ភ្នំពេញ និងទីក្រុងហូជីមិញ។

អ្នកជំនាញជាន់ខ្ពស់ផ្នែកដឹកជញ្ជូនរបស់ ADB លោក Oyunchimeg Erdene បានឲ្យដឹងយ៉ាងដូច្នេះថា៖«ក្នុងប្រទេសកម្ពុជា ផ្លូវថ្នល់ជាមធ្យោបាយដឹកជញ្ជូនដ៏សំខាន់ ដែលធ្វើឲ្យការដឹកជញ្ជូនតាមផ្លូវគោកមានសារប្រយោជន៍ដល់ការអភិវឌ្ឍសង្គម និងសេដ្ឋកិច្ច។ ទោះយ៉ាងណា អនុវិស័យផ្នែកផ្លូវថ្នល់នៅកម្ពុជានៅតែគ្មានប្រសិទ្ធភាព និងបែកបាក់»។ បើតាមអ្នកជំនាញរូបនេះ គម្រោងនេះក៏នឹងជួយបង្កើនសមត្ថភាពរបស់រដ្ឋាភិបាលក្នុងការគ្រប់គ្រងទ្រព្យសម្បត្តិផ្លូវថ្នល់ផងដែរ។

យោងតាម ADB បណ្ដាញផ្លូវថ្នល់របស់កម្ពុជានាពេលបច្ចុប្បន្ននេះ មានកម្រិតតភ្ជាប់ និងប្រសិទ្ធភាពទាប ដោយសារក្របខណ្ឌបទបញ្ញត្តិមិនពេញលេញ សមត្ថភាពស្ថាប័នទាប ការចូលរួមរបស់ផ្នែកឯកជននៅមានកម្រិត និងកង្វះនិរន្តភាពទ្រព្យសម្បត្តិផ្លូវថ្នល់។ ADB គូសបញ្ជាក់ថា ផ្លូវជាតិ និងផ្លូវខេត្តមួយចំនួនក្នុងចំណោមផ្លូវថ្នល់ប្រវែង ១៥៤០០ គីឡូម៉ែត្រដែលគ្រប់គ្រងដោយក្រសួងសាធារណការ និងដឹកជញ្ជូន ត្រូវជួសជុលឡើងវិញ ដើម្បីសម្រួលការតភ្ជាប់របស់កម្ពុជា ពិសេសតភ្ជាប់ជាមួយប្រទេសជិតខាងកម្ពុជា ក្នុងតំបន់មហាអនុតំបន់ទន្លេមេគង្គ (GMS)៕

ប្រភព៖ ThmeyThmey

Leave a Reply