សាលារាជធានីនឹងកោះហៅសហជីពមកពិភាក្សាពីការជួបជុំកម្មករនៅថ្ងៃទិវាពលកម្មអន្តរជាតិ
Posted On : April, 23, 2015 | By សំឡេងទីក្រុង
ភ្នំពេញៈ សាលារាជធានីភ្នំពេញ នឹងអញ្ជើញតំណាងសម្ព័ន្ធសហជីពចលនាកម្មករ មកជួបប្រជុំក្នុងសប្តាហ៍នេះ ក្រោយការដាក់លិខិតប្រាប់ពីការគ្រោងជួបជុំកម្មករកម្មការិនីចំនួន ៣០០០ នាក់ រៀបចំទិវាពលកម្មអន្តរជាតិ លើកទី ១២៩ នាថ្ងៃ១ ខែឧសភាខាងមុខនេះ នៅទីលានប្រជាធិបតេយ្យ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានឲ្យដឹងថា សាលារាជធានីនឹងជួបពិភាក្សាលម្អិតពីផែនការនៃការជួបជុំមនុស្ស រាប់ពាន់នាក់នេះ ដែលសាលារាជធានី អាចអនុញ្ញាតបានត្រឹមតែក្រោម ២០០ នាក់ប៉ុណ្ណោះ តែយ៉ាងណា សាលាក្រុងនឹងសុំគោលការណ៍ ទៅកាន់ថ្នាក់លើទៀត។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានឲ្យដឹងថា ទិវាពលកម្ម ដែល រៀបចំលើកនេះ គឺដើម្បីសម្តែងមតិជាកង្វល់របស់កម្មករនិយោជិតពាក់ព័ន្ធនឹងវិស័យ កាត់ដេរ ហើយជាពិសេសស្នើឲ្យមានការដំឡើងប្រាក់ឈ្នួលអប្បបរមា បន្ថែមទៀត។
លោកបន្តថា៖ «ក្រោយពីថ្លែងសុន្ទរកថារួចហើយ យើងនឹងហែក្បួន ទៅកាន់ស្ថានទូតនានាដើម្បីដាក់ញត្តិរួមមាន ស្ថានទូតសហរដ្ឋអាមេរិក សហគមន៍អឺរ៉ុប និងរដ្ឋសភាជាតិ»។
លោកបញ្ជាក់ថា ក្នុងញត្តិដែលដាក់ជូនស្ថាប័នទាំងនោះរួមមាន ៨ ចំណុចសំខាន់ៗ ដែលក្នុងនោះ ស្នើឲ្យមានការចាត់វិធានការចំពោះការធ្វើកិច្ចសន្យាខ្លីជូន កម្មករ ការស្នើឲ្យមានការដកពាក្យបណ្តឹងនៅតុលាការប្រឆាំងថ្នាក់ដឹកនាំ សហជីព ដែលតស៊ូមតិដើម្បីកម្មករ ការស្នើឲ្យរដ្ឋាភិបាលបន្តស្វែងរកចាប់ជនល្មើសដែលប្រព្រឹត្តកំហុស នៅក្នុងហេតុការណ៍ហិង្សា នៅផ្លូវវេងស្រេង ការសុំឲ្យបញ្ចូលច្បាប់ឈប់សម្រាកលម្ហែមាតុភាព ទៅក្នុងរបបជាតិសន្តិសុខសង្គម និងសុំឲ្យបើកប្រាក់ឈ្នួល ១០០ ភាគរយដល់កម្មករសម្រាកមាតុភាព។
លោកបញ្ជាក់ថា សម្ព័ន្ធនេះ បានដាក់លិខិតទៅសាលារាជធានី ជាការជម្រាបជាដំណឹង ហើយបើសិនមិនមានការអនុញ្ញាត នោះពួកគេនឹងនៅតែប្រារព្ធដដែល។
អ្នកនាំពាក្យសាលារាជធានី លោក ឡុង ឌីម៉ង់ បានមានប្រសាសន៍ថា៖ «តាមច្បាប់ស្តីពីបាតុកម្មដោយសន្តិវិធី សាលារាជធានី ខេត្ត អាចអនុញ្ញាតឲ្យមនុស្សក្រោម ២០០ នាក់ចូលរួម បើលើសពីហ្នឹង មានតែសុំគោលការណ៍ទៅថ្នាក់លើជាអ្នកសម្រេច»។
លោកថា សាលារាជធានី ក៏នឹងពិភាក្សាជាមួយមន្ត្រីសម្ព័ន្ធពីផែនការលម្អិតផងដែរ ដើម្បីរៀបចំសន្តិសុខ សុវត្ថិភាពនិងសណ្តាប់ធ្នាប់នៅកន្លែងប្រារព្ធពិធី ក្នុងករណីមានការអនុញ្ញាតឲ្យធ្វើ៕
