ផ្លូវក្រោមដី នៅស្ពានអាកាសតិចណូ ស្ថាបនាសម្រេចជាង ៣០ ភាគរយ
Posted On : March, 5, 2015 | By សំឡេងទីក្រុង
ប្រភព៖ CEN, ថ្ងៃទី 4 មីនា 2015, ម៉ោង 06:34:PM) | ដោយ: កូឡាប
ភ្នំពេញ: ការស្ថាបនាផ្លូវក្រោមដី នៅស្ពានអាកាសតិចណូ កំពុងដំណើរការស្ថាបនាសម្រេចបានជាង ៣០ ភាគរយនៃគម្រោង។ នេះជាលទ្ធផលការងារគិតត្រឹមថ្ងៃទី៤ ខែមីនា ឆ្នាំ២០១៥នេះ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានឲ្យដឹងថា ផ្លូវក្រោមដីមួយខ្សែនេះ មានប្រវែង ៣៥៦ ម៉ែត្រ ទទឹងពី ៦ ម៉ែត្រទៅ ៨ ម៉ែត្រ ដោយសាងសង់នៅក្រោមមហាវិថីសហព័ន្ធរុស្ស៊ី ទៅផ្នែកខាងត្បូង ភ្ជាប់មហាវិថីម៉ៅសេទុង និងទៅផ្នែកខាងជើង ភ្ជាប់មហាវិថីគីមអ៊ីលស៊ុង រហូតដល់ទៅរង្វង់មូលទួលគោក។
លោក សាំ ពិសិដ្ឋ បានបញ្ជាក់ថា “ការស្ថាបនាផ្លូវក្រោមដីនេះ ដើម្បីដោះស្រាយបញ្ហាការកកស្ទះចរាចរ នៅចំណុចភ្លើងស្តុបតិចណូ។ ការងារស្ថាបនាផ្លូវក្រោមដីនេះ កំពុងធ្វើព្រមគ្នា ជាមួយការស្ថាបនាស្ពានអាកាសតិចណូដែរ”។
លោកប្រធាន បន្តទៀតថា ស្ពានអាកាសទី៤ តិចណូ ដែលជាស្ពានប្រវត្តិសាស្ត្ររបស់រាជធានីភ្នំពេញ បើកការដ្ឋានស្ថាបនា តាំងពីថ្ងៃទី៩ ខែកញ្ញា ឆ្នាំ២០១៤ មក ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន។ តាមគម្រោង ស្អានអាកាសទី៤ នេះ មានប្រវែង ៣៨២ ម៉ែត្រ ទទឹង ១៥ ម៉ែត្រ កម្ពស់សុវត្ថិភាព ៥,២ ម៉ែត្រ ដោយត្រូវសាងសង់ឡើងនៅតាមបណ្តោយមហាវិថីសហព័ន្ធរុស្ស៊ី។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានបញ្ជាក់ថា គិតតាំងពីបើកការដ្ឋាន មកដល់ពេលនេះ ការងារជារួម ស្ថាបនាបានដូចតទៅ៖ រៀបចំការិយាល័យឃ្លាំង ១០០ ភាគរយ ក្នុងនោះបុកគ្រឹះជំរៅស្ពាន ៦៥ ភាគរយ ហើយបុកគ្រឹះជំរៅផ្លូវក្រោមដី ៥៥ ភាគរយ ការងារកាយដីផ្លូវក្រោមដី ៤៥ ភាគរយ ការងារចាក់បេតុងកម្រាលផ្លូវក្រោមដីបាន ១៥ ភាគរយ ការធ្វើជព្ជាំងបេតុងផ្លូវក្រោមដីបាន ៥ ភាគរយ ការងារដាក់បណ្តាញលូបាន ២៥ ភាគរយ ការងារផ្លូវពង្រីកបាន ២០ ភាគរយ ជើងតាងសសរកម្រាលសូន្យភាគរយ។ សាលារាជធានីភ្នំពេញ ស្នើសុំការយោគយល់អធ្យាស្រ័យ ពីសំណាក់ប្រជាពលរដ្ឋ ចំពោះការរំខានដោយសកម្មភាពការដ្ឋាន និងផលប៉ះពាល់ផ្សេងៗ។
គួរបញ្ជាក់ដែរថា ស្ពានអាកាសទី៤តិចណូនេះ តាមគម្រោងនឹងប្រើប្រាស់ពេលវេលាក្នុងការស្ថាបនាចំនួន ១៦ ខែ និងប្រើប្រាស់អស់ថវិកាអស់ប្រមាណ ១៤ លានដុល្លារអាមេរិក ហើយអនុវត្តន៍ការសាងសង់ដោយក្រុមហ៊ុន OCIC ដែលជាក្រុមហ៊ុនទទួលការសាងសង់ស្ពានអាកាសចំនួន ៣ កន្លងមកទទួលបានជោគជ័យ។
មន្ត្រីសាលារាជធានីភ្នំពេញ ក៏បានឲ្យដឹងដែរថា ការសាងសង់ស្ពានអាកាសទី៤នេះ គឺអនុវត្តន៍តាមការប្រកាស របស់សម្តេចតេជោ ហ៊ុន សែន នៅក្នុងពិធីសម្ពោធ ស្ពានអាកាសស្ទឹងមានជ័យ កាលពីព្រឹកថ្ងៃទី៣១ ខែកក្កដា ឆ្នាំ២០១៤ ហើយក្នុងពិធីកន្លងមកនោះ គឺសម្តេចបានមានប្រសាសន៍ថា ស្ពានអាកាសទី៤នេះ នឹងចាប់ផ្តើមដំណើរការសាង សង់ក្រោមទំហំទឹកប្រាក់ ១៤ លានដុល្លារ ដែលសាងសង់ដោយក្រុមហ៊ុន OCIC ហើយស្ពាននេះ ក៏មានផ្លូវក្រោមដី ១ ខ្សែ ផងដែរ៕
