ឆ្នាំ ២០១៨ នឹងមានរឿងអ្វីកើតទ្បើងក្នុងវិស័យខុនដូនៅកម្ពុជា?
Posted On : April, 24, 2015 | By សំឡេងទីក្រុង
ដោយ៖ ស៊ីវ ម៉េង, Thu, 23 April 2015, Phnom Penh Post
ភ្នំពេញ: តើនឹងមានអ្វីកើតឡើងនៅពេលចំនួនផ្គង់ផ្គង់ខុនដូកើនឡើងរហូត ១០០០០ យូនីតនៅឆ្នាំ ២០១៨ ខាងមុខ ខណៈទីផ្សារនេះហាក់នៅមានភាពស្រពេចស្រពិលនៅឡើយអំពីថា តើការផ្គត់ផ្គង់នឹងកើនលើសតម្រូវការខ្លាំងពេក ឬយ៉ាងណា?
អគ្គនាយកក្រុមហ៊ុន ប៊ុណ្ណា រៀលធី គ្រុប លោក ស៊ឹង ប៊ុណ្ណា បានថ្លែងថា រហូតមកទល់ពេលនេះលោកមិនទាន់ហ៊ានសន្និដ្ឋានថា នឹងមានរឿងអ្វីកើតឡើងក្រោយឆ្នាំ ២០១៥ នោះទេ តែលោកគិតថា ប្រសិនបើក្រោយពេលធ្វើសមាហរណកម្មអ្វីៗ នៅតែដំណើរជាធម្មតាៗដូចបច្ចុប្បន្នដែលវិស័យអចលនទ្រព្យមានកំណើនចន្លោះពី ៥ ទៅ ១០ ភាគរយនោះ ចំនួនផ្គត់ផ្គង់ខុនដូពិតជារាងធំបន្តិចមែន ព្រោះអ្នកសាងសង់ខុនដូនាពេលបច្ចុប្បន្ននេះពួកគេរំពឹងពេលសមាហរណកម្មសេដ្ឋកិច្ចអាស៊ានចូលមកដល់។
លោកមានប្រសាសន៍ថា៖ «ប្រសិនបើយើងគិតគូរមិនបានដិតដល់ទេកម្ពុជាអាចនឹងមានវិបត្តិដូចនៅប្រទេសថៃកាលពីឆ្នាំ ១៩៩៨ ព្រោះនិន្នាការបច្ចុប្បន្ននៅកម្ពុជាគឺស្រដៀងគ្នាទៅនឹងប្រទេសថៃនាពេលនោះដែរ»។
លោកបានបន្តថា៖ «ទោះបីជាយ៉ាងណាបឹងយើងនៅតូច (ទំហំទីផ្សារអចលនទ្រព្យ) ទោះបីជាធ្លាយទំនប់ក៏ទឹកហូរចេញឆាប់អស់ដែរ ហើយប្រសិនបើការផ្គត់ផ្គង់ខុនដូនៅឆ្នាំ ២០១៨ លើសតម្រូវការខ្លាំងក៏វាមិនមានបញ្ហាអ្វីនោះទេ ព្រោះពេលនោះឱកាសនឹងធ្លាក់ទៅអ្នកផ្សេងទៀត»។
លោក ស៊ឹង ប៊ុណ្ណា បានបន្ត ថា ទីផ្សារខុនដូបច្ចុប្បន្នភាគច្រើនផ្តោតលើជនបរទេស ហើយពី ៦០ ទៅ ៧០ ភាគរយនៃជនបរទេសទាំងនោះគឺទិញសម្រាប់ទុកវិនិយោគយកប្រាក់ចំណេញ ផ្ទុយទៅវិញបើគាត់វិនិយោគនៅស្រុករបស់គាត់គឺបានប្រាក់ចំណេញតិច តែបើវិនិយោគនៅកម្ពុជាបានប្រាក់ចំណេញច្រើន ព្រោះបន្ទាប់ពីពួកគេទិញខុនដូតម្លៃ ២០ ម៉ឺនដុល្លារហើយមួយឆ្នាំក្រោយមកពួកគេអាចលក់បាន ៣០ ម៉ឺនដុល្លារ គឺដោយសារពួកគេកញ្ជ្រោកទីផ្សារហើយពេលមាន អ្នកជ្រើមជ្រួលតាមពួកគេនោះ ហើយគឺជាឱកាសសម្រាប់ពួកគេវេចលុយចំណេញទៅស្រុករបស់ពួកគេវិញ។
លោកបន្តថា៖ «កាលណាគេមានបទពិសោធច្រើនជាងយើង គេឆ្លាតជាងយើង ច្បាស់ហើយគេអាចមានឱកាសរកប្រាក់ចំណេញច្រើនជាងយើងបាន»។
សំណួរត្រូវបានលើកឡើងថា តើប្រទេសកម្ពុជា និងតំបន់សំខាន់ៗក្នុងទីក្រុងភ្នំពេញអាច រំពឹងទុកថានឹងទទួលបាន លំហូរនៃកម្លាំងពលកម្មដែលមានប្រាក់កម្រៃខ្ពស់ប៉ុន្មានក្នុងរយៈពេល ៣ ឆ្នាំនេះ។
លោក Kevin Britten ប្រធានគ្រប់គ្រងនៃក្រុមហ៊ុន Top Recruitment បាននិយាយថា៖ «ជនជាតិបរទេស ៥ ភាគរយបម្រើការក្នុងប្រទេសកម្ពុជា។ ក្រុមហ៊ុនភាគច្រើនមានគោលការណ៍ច្បាស់លាស់ក្នុងការជួលអ្នកជំនាញក្នុងស្រុក ហើយខ្ញុំមិនជឿថាវាផ្លាស់ប្តូរទេ»។
លោកបានបន្តទៀតថា៖ «ការធ្វើសមាហរណកម្មសេដ្ឋកិច្ចអាស៊ានគឺមិនមានផលប៉ះពាល់ដល់ទីផ្សារការងារសម្រាប់អ្នកជំនាញទេ។ ទ្វារបានបើករួចជាស្រេចទៅហើយ។ អ្នកដែលចង់ធ្វើការក្នុងប្រទេសកម្ពុជាបាន និងកំពុងធ្វើដូច្នេះអស់រយៈពេលជាយូរមកហើយ»។
លោក បានឲ្យដឹងទៀតថា កត្តាសំខាន់នៃសេដ្ឋកិច្ចកម្ពុជារួមមាន វិស័យកសិកម្ម និងកាត់ដេរនឹងមិនត្រូវការអ្នកជំនាញបរទេសឲ្យមករស់នៅ ក្នុងទីក្រុងទេ ប៉ុន្តែនៅជនបទ និងជាយទីក្រុងភ្នំពេញគឺជាទីកន្លែងសម្រាប់ពួកគេ។
លោក Simon Griffith នាយករងនៃក្រុមហ៊ុន CBRE កម្ពុជា បាននិយាយថា អ្នកជួលខុនដូអាចនឹងជាជនជាតិបរទេសបើគិតក្នុងរយៈពេល ខ្លី និងមធ្យម។ ទោះបីជាយ៉ាងណាក៏ដោយ លោកបានបន្ថែម ទៀតថា ទីផ្សារខុនដូននឹងផ្លាស់ប្តូរនៅឆ្នាំ ២០១៨ ខណៈការប្រកួតប្រជែងមានការកើនឡើងធ្វើឲ្យមានផ្គត់ផ្គង់បន្ថែម ទៀតចូលក្នុងទីផ្សារ ដូច្នេះវាធ្វើឲ្យមានផលប្រយោជន៍ដល់អ្នកជួល។
ទោះបីជាយ៉ាងណាក៏ដោយ លោកបានលើកឡើងថា សំណួរ គឺថាតើប្រជាជនកម្ពុជាចង់ជួលខុនដូដែរឬទេ?
លោកបានថ្លែងថា៖ «វានឹងមានការផ្លាស់ប្តូរក្នុងទីផ្សារមួយ នេះ។ បច្ចុប្បន្ន យើងកំពុងនៅក្នុងទីផ្សារ (ម្ចាស់គម្រោង និង អ្នកអភិវឌ្ឍន៍) ដែលការផ្គត់ផ្គង់មានកម្រិត តម្រូវមានច្រើន និងការជួលច្រើន។ ដោយមានខុនដូច្រើន អ្នកជួលនឹងមានជម្រើសច្រើន»។
យោងតាមការសិក្សារបស់ក្រុមហ៊ុន Century 21 Cambodia ដែលបានចេញផ្សាយកាលពីពេលថ្មីៗនេះបានបង្ហាញថា ចាប់តាំងពីឆ្នាំ ២០០៨ រហូតដល់ឆ្នាំ ២០១៤ ចំនួនខុនដូនៅកម្ពុជាមានកំណើនប្រហែល ២០ ភាគរយជារៀងរាល់ឆ្នាំ និងគិតរហូតមកទល់បច្ចុប្បន្ននេះមានគម្រោងខុនដូចំនួន ១៣ បានបញ្ចប់ការសាងសង់ និងមានបន្ទប់ស្នាក់នៅសរុបចំនួន ៣០៩០ យូនីត និងមានគម្រោងខុនដូចំនួន ១៧ ផ្សេងទៀតបាន និងកំពុងដំណើរការសាងសង់។ ការសិក្សាដដែលបានរកឃើញថា ចាប់ពីឆ្នាំ ២០១៥ ដល់២០១៨ ចំនួនខុនដូនឹងកើនឡើង ៤០ ភាគរយប្រចាំឆ្នាំ និងចំនួនបន្ទប់ស្នាក់នៅនឹងកើនរហូតដល់ជាង ១០០០០ បន្ទប់។
ការសិក្សាខាងលើបានរកឃើញថា គិតត្រឹមត្រីមាសទី ៤ នៃឆ្នាំ ២០១៤ មាន ៦៥ ភាគរយ នៃចំនួនខុនដូទាំងអស់ស្ថិតក្នុងដំណាក់កាលសាងសង់ដោយរំពឹងថានឹងបញ្ចប់នៅចន្លោះឆ្នាំ ២០១៥ ដល់ឆ្នាំ ២០១៨ ។
គម្រោងខុនដូដែលបាន និងកំពុងសាងសង់ និងគ្រោងដាក់ឲ្យដំណើរការនៅឆ្នាំ ២០១៨ រួមមាន Casa Meridian, The Bridge, The Bay Cambodia, The Riviera, The Olympia City, TK Royal One, Sovann Condo, Hongkong Land ជាដើម។
លោក ប៉ូ អ៊ាវគង់ ប្រធានគ្រប់គ្រងទូទៅនៃក្រុមហ៊ុន អេស៊ា រៀលអេស្ទេត បាននិយាយដោយប្រុងប្រយ័ត្នថា ប្រសិនបើ គិតពីពេលបច្ចុប្បន្នរហូតដល់ឆ្នាំ ២០១៨ វាជារយៈពេលវែងមួយសម្រាប់ទីផ្សារអចលនទ្រព្យដែលទាមទារឲ្យយើងត្រូវតាមដានពីលំហូរនៃអ្នកវិនិយោគ និងលំហូររបស់អ្នកទិញមានសភាពយ៉ាងដូចម្តេចរៀងរាល់មួយឆ្នាំ ឬពីរឆ្នាំម្តង។ ចំនួនខុនដូដែលផ្គត់ផ្គង់ចូលទីផ្សារនឹងមានចំនួនច្រើននាពេលអនាគត តែទន្ទឹមនឹងនោះក្រុម ប្រជាពលរដ្ឋវណ្ណៈកណ្តាលនៅ កម្ពុជាកំពុងតែរីកធំផងដែរដែលនឹងធ្វើឲ្យតម្រូវការក្នុងស្រុកកើនឡើងព្រមគ្នាផងដែរ។
លោកបានថ្លែងថា៖ «បើគិតពីពេលនេះដល់ឆ្នាំ ២០១៨ ខ្ញុំនៅតែមានសុទិដ្ឋិនិយមថា ក្នុងចន្លោះរយៈពេលនេះកម្ពុជានឹងមានស្ថិរភាពនយោបាយ និងស្ថិរភាពសេដ្ឋកិច្ចល្អ វាមិនមានអ្វីគួរឲ្យបារម្ភទេ»។
លោក អ៊ាវគង់ បានបន្តថា ការផ្គត់ផ្គង់បច្ចុប្បន្ន សម្រាប់ទីផ្សារក្នុងស្រុកវាហាក់ធំបន្តិចមែន តែបើសម្រាប់វិនិយោគិនបរទេសវាហាក់ស្ថិតក្នុងទំហំសមល្មមនៅ ឡើយទេ ខណៈទីផ្សារអចលនទ្រព្យនៅតៃវ៉ាន់ និងសិង្ហបុរី បាននិងកំពុងធ្លាក់ចុះ។
លោកបានបន្តទៀតថា វិនិយោគិនទាំងនោះបានមកបណ្តាក់ទុននៅកម្ពុជា តែភាគច្រើនគឺទិញសម្រាប់វិនិយោគមិនមែនទិញសម្រាប់រស់នៅខ្លួនឯងឡើយ។ ដោយប្រមើលមើលពីការធ្វើសមាហរណកម្មសេដ្ឋកិច្ចនាពេលខាងមុខថា កម្លាំងចលករនៃការធ្វើសមាហរណកម្មសេដ្ឋកិច្ចអាស៊ាននៅចុងឆ្នាំនេះអាចជាចំណុចវិជ្ជមានមួយ ព្រោះនិន្នាការកំណើនសេដ្ឋកិច្ចក្នុងតំបន់អាស៊ានមានការរីកចម្រើនគួរឲ្យកត់សម្គាល់ ហើយនិន្នាការរបស់វិនិយោគិនជាសកលក៏បានសម្លឹងមើលឱកាស និងស្វែងរកការវិនិយោគក្នុងបណ្តាប្រទេសជាសមាជិកអាស៊ានផងដែរ ដោយសារចំនួនប្រជាជនក្នុងតំបន់នេះមានជាង ៦០០ លាននាក់ជាចំនួនមួយដ៏ច្រើនផងដែរ។
លោក ទូច សំណាង អគ្គនាយករងក្រុមហ៊ុន OCIC ជាក្រុមហ៊ុនក្នុងស្រុកដ៏ធំដែលបានដាក់ទុនវិនិយោគរាប់រយលានដុល្លារលើគម្រោងសាងសង់ខុនដូជាច្រើនបានប្រាប់ថា លោកមិនមានការព្រួយបារម្ភពីគម្រោងអភិវឌ្ឍន៍របស់ក្រុមហ៊ុនឡើយ ព្រោះក្រុមហ៊ុន មានភ្នាក់ងារលក់នៅក្រៅប្រទេស ហើយអតិថិជនរបស់ក្រុមហ៊ុនភាគច្រើនជាជនជាតិចិន សិង្ហបុរី តៃវ៉ាន់ និងជនជាតិជប៉ុន។
លោកបានបន្តថា ពួកគេទិញភាគច្រើនទុកសម្រាប់ជួល និងលក់ចេញបើបានប្រាក់ចំណេញច្រើនជាក់ស្តែង Rose Condo គឺអ្នកទិញភាគច្រើនទុកសម្រាប់ជួល និងលក់ដែលធ្វើឲ្យចំនួនអ្នកស្នាក់នៅក្នុងអគារនេះមានចំនួនតិច តែបើប្រៀបធៀបនឹងគម្រោងផ្សេងៗគឺមានអ្នករស់នៅកាន់តែតិចថែមទៀត។
លោកមានប្រសាសន៍ថា៖ «ក្រុមហ៊ុន OCIC ធ្វើការវិនិយោគធំលើគម្រោង Olympia City តែប៉ុណ្ណោះ ហើយរហូតមកទល់ពេលនេះក្រុមហ៊ុនមិនមានគម្រោងអភិវឌ្ឍន៍ខុនដូថ្មីៗនៅឡើយទេ»។
លោក សៀ រិទ្ធី ប្រធានក្រុមហ៊ុន World Bridge land Group ដែលបានសហការបោះទុនវិនិយោគប្រមាណ ៣០០ លានដុល្លារជាមួយវិនិយោគិនមកពីប្រទេសសិង្ហបុរី ដើម្បីសាងសង់អគារ The Bridge កម្ពស់ ៤៥ ជាន់បានថ្លែងថា បើនិយាយពីការអភិវឌ្ឍវិស័យអចលនទ្រព្យគឺត្រូវមើលទៅលើកត្តាពីរ ទី ១ ប្រទេសណាដូចប្រទេសណាដែរឲ្យតែមានការអភិវឌ្ឍតែងតែមានផលប៉ះពាល់គ្រាន់តែប៉ះតិច ឬច្រើន ទី ២ ពេលនិយាយពីគម្រោងអភិវឌ្ឍន៍ គឺនិយាយពីទីតាំង ព្រោះបើអភិវឌ្ឍនៅទីតាំងល្អវាមិនមានផលប៉ះពាល់នោះទេ ដោយសារអ្នកទិញខុនដូសម្រាប់រស់នៅ ឬយកទៅវិនិយោគបន្ត គឺពួកគេផ្តោតជាដំបូងទៅលើទីតាំង។
លោកបានបន្តថា ការអភិវឌ្ឍអាស្រ័យលើតម្រូវការ ដូច្នេះចំនួនផ្គត់ផ្គង់ច្រើនដែលយើងមើលឃើញ គឺពួកគេរំពឹងពីការធ្វើសមាហរណកម្មសេដ្ឋកិច្ច អាស៊ានចូលមកដល់។ បើសមាហរណកម្មរលូនល្អ មានអ្នកវិនិយោគ និងជនបរទេសហូរចូលមកច្រើនពួកគេនឹងត្រូវការកន្លែងស្នាក់នៅច្រើន ដូច្នេះ ផលប៉ះពាល់នឹងមានតិច។
លោកបានបញ្ជាក់ថា៖ «ប្រសិនបើគម្រោងអភិវឌ្ឍន៍នោះផ្តោតតែលើជនបរទេសវានឹងអាចមានវិបត្តិ ព្រោះបើជនបរទេសទិញ ១០០០ យូនីតទុកសម្រាប់ជួល ហើយគ្មានអ្នកជួលតើនឹងមានរឿងអ្វីកើតឡើងគឺអគារទាំងនោះនឹងត្រូវទុកចោល»។
លោក ម៉ី កល្យាណ ទីប្រឹក្សា ជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានថ្លែងថា កំណើននៃការអភិវឌ្ឍនៃវិស័យ អចលនទ្រព្យមានរឿងពីរ គឺរឿងល្អ និងរឿងអាក្រក់។ រឿងល្អនៅត្រង់ថា អ្នកមានដីលក់ពួកគាត់នឹងសប្បាយចិត្ត ព្រោះ លក់ដីបានថ្លៃ តែរឿងអាក្រក់ គឺ អ្នកជួលគេគឺមានការលំបាក។
លោកបន្តថា រាជរដ្ឋាភិបាលបានឲ្យដឹងថា ទឹកប្រាក់វិនិយោគចូលក្នុងវិស័យអចលនទ្រព្យមានច្រើនគួរសម ខណៈរដ្ឋាភិបាលមានការព្រួយបារម្ភ និងប្រុងប្រយ័ត្នអំពីរឿងនេះ ព្រោះបើអចលនទ្រព្យទាំងនោះសាងសង់ចប់មានសកម្មភាពសេដ្ឋកិច្ចវាមិនអីនោះទេ តែបើអចលនទ្រព្យទាំងនោះសង់ចប់តែគ្មានសកម្មភាពសេដ្ឋកិច្ចវាជារឿងគ្រោះថ្នាក់ដល់សេដ្ឋកិច្ច និងអាចរាលដាលដល់វិស័យហិរញ្ញវត្ថុផងដែរ។
លោកបានបន្តថា៖ «វាដូចជា ល្បែងអ៊ីចឹងនៅពេលអចលនទ្រព្យឡើងថ្លៃ គឺនាំគ្នាទិញ ព្រោះបានប្រាក់ចំណេញ តែពេលណាមួយវានឹងធ្លាក់ចុះនោះហើយជាបញ្ហា»។
លោកបន្តថា៖ «អ្នកវិនិយោគមុននឹងសាងសង់គឺពួកគេគិតថាលក់ដាច់តែពេលខ្លះ ហើយការគិតរបស់ពួកគេក៏ខុសដែរ ដូច្នេះបើអភិវឌ្ឍអចលនទ្រព្យចប់យកទៅប្រើប្រាស់សម្រាប់សកម្មភាពសេដ្ឋកិច្ចមិនថ្វីទេតែបើសាងសង់រួចអចលនទ្រព្យទាំងនោះត្រូវទុកចោលនោះវានឹងអន្តរាយហើយ»៕
