រមណីយដ្ឋានវត្តភ្នំដូនពេញ នឹងត្រូវកែលម្អឡើងវិញដោយចំណាយថវិកា១លានដុល្លារអាមេរិក
Posted On : March, 12, 2015 | By សំឡេងទីក្រុង
ផ្សាយ ថ្ងៃទី12 ខែMarch ឆ្នាំ2015, ប្រភព៖ BNews
រមណីយដ្ឋានវត្តភ្នំដូនពេញ ដែលជាទីតាំងប្រវត្តិសាស្ត្រនៅក្នុងរាជធានីភ្នំពេញ នឹងត្រូវកែលម្អប៉ែកខាងកើតឡើងវិញ ដោយគ្រោងចំណាយថវិកាចំនួន ១ លានដុល្លារអាមេរិក ។
តាមហ្វេសបុកផេករបស់ប្រមុខរាជរដ្ឋាភិបាលកម្ពុជា សម្ដេចនាយករដ្ឋមន្ត្រីហ៊ុន សែន បានឲ្យដឹងថារមណីយដ្ឋានវត្តភ្នំដូនពេញនឹងត្រូវជួសជុលកែលម្អឲ្យបានស្អាត ស័ក្តិសមជារមណីយដ្ឋានប្រវត្តិសាស្ត្រដែលជានិមិត្តរូបនៃការកកើតរាជធានីភ្នំពេញ ជាកន្លែងដែលប្រជាពលរដ្ឋគោរពបូជា និងជាកន្លែងទាក់ទាញភ្ញៀវទេសចរដ៏សំខាន់ ហើយគម្រោងជួសជុលនេះនឹងត្រូវចំណាយថវិកា ១លានដុល្លារអាមេរិក ។
តាមការស្រង់សំដីរបស់អភិបាលរាជធានីភ្នំពេញ លោកប៉ា សុជាតិវង្ស ពីទីភ្នាក់ងារសារព័ត៌មានកម្ពុជា(AKP) ឲ្យដឹងថា គម្រោងជួសជុលកែលម្អខាងលើនេះបានសិក្សារួចហើយដែលមាន១៦ចំណុចត្រូវបានកែលម្អ។ ជាពិសេសត្រូវពិនិត្យបន្ថែមលើការសាងសង់ជារបងដែកមានកម្ពស់១,២ ម៉ែត្រព័ទ្ធជុំវិញវត្តភ្នំដែលមានក្បាច់ជាស្រទាប់ផ្កាឈូក រួមទាំងការក្រាលកម្រាលសម្រាប់ថ្មើរជើងខាងក្នុងបរិវេណវត្តភ្នំ ដែលអាចត្រូវប្រើថ្មក្រានិត ឬថ្មបាយក្រៀមដែលមានសព្វថ្ងៃ ។
លោកអភិបាលរាជធានីភ្នំពេញបញ្ជាក់ទៀតថាគម្រោងខាងលើនេះរួមមានការជួសជុលកែលម្អសួន ដាំស្មៅ រៀបចំប្រព័ន្ធទឹក/ភ្លើង ប្រព័ន្ធលូ រួមទាំងច្រកចេញ/ចូលឲ្យបានស្អាត និងរក្សាបានបរិស្ថានវប្បធម៌ធម្មជាតិ និងធ្វើឲ្យស័ក្ដិសមជាកន្លែងគោរពបូជារបស់ប្រជាពលរដ្ឋ និងជាកន្លែងទាក់ទាញភ្ញៀវទេសចរដ៏សំខាន់ផងដែរ ៕
