អាជ្ញាធរ​​បើក​កិច្ច​ប្រជុំ​ ដើម្បី​ជំរុញ​ការ​បើក​ការដ្ឋាន​ស្ពាន​អាកាស​នៅ​ច្រមុះជ្រូក​ក្បាលថ្នល់
Posted On : September, 6, 2018 | By សំឡេងទីក្រុង

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

អាជ្ញាធរ​រាជធានី​ភ្នំពេញ  បាន​បើក​កិច្ចប្រជុំ​ពិភាក្សា​មួយ ជាមួយ​អាជ្ញាធរ​ខណ្ឌ មន្ទីរ​ជំនាញ​និង​មន្ត្រី​ជំនាញ​ និង​តំណាង​ក្រុមហ៊ុន​ទទួល​ការសាងសង់​ ដើម្បី​ជំរុញ​ការ​បើក​ការដ្ឋាន​សាងសង់​ស្ពាន​អាកាស​ថ្មី​មួយ​កន្លែង​ទៀត​នៅ​ច្រមុះ​ជ្រូក​ក្បាលថ្នល់។ កិច្ចប្រជុំ​នេះ ដឹកនាំ​ដោយ​លោក មាន ចាន់យ៉ាដា អភិបាល​រង​រាជធានី​ភ្នំពេញ កាលពី​រសៀល​ថ្ងៃទី​៤កញ្ញា ២០១៨ នៅ​សាលា​រាជធានី​ភ្នំពេញ។

លោក​ មាន ចាន់​យ៉ា​ដា​ បាន​ធ្វើការ​ណែនាំ​ឱ្យ​អាជ្ញាធរ​ដែនដី មន្ទីរ​ជំនាញ​យកចិត្ត​ទុកដាក់​ដោះស្រាយ​ផល​ប៉ះពាល់​ ឱ្យ​បាន​លឿន​ទៅតាម​អ្វីដែល​​អាចធ្វើ​បាន ដើម្បី​ធ្វើ​យ៉ាងណា​ឱ្យ​គម្រោង​នេះ​ឈាន​ដល់​ការបើក​ការដ្ឋាន​ឆាប់ៗ ដោយ​ហេតុថា តំបន់​ខាងលើ​នេះ ​បាន​នឹង​កំពុង​ប្រឈម​នឹង​ការ​កកស្ទះ​ចរាចរណ៍​ជា​រៀងរាល់​ថ្ងៃ។

​បើតាម​មន្ត្រី​រដ្ឋបាល​រាជធានី​ភ្នំពេញ​ បញ្ជាក់​ថា គម្រោង​នេះ​ត្រូវ​បាន​សិក្សា​រួចហើយ ពោលគឺ​នៅតែ​រឿង​ដោះស្រាយ​ផល​ប៉ះពាល់​ជាមួយ​ប្រជាពលរដ្ឋ​តែ​ប៉ុណ្ណោះ។ បើ​ការ​ដោះស្រាយ​ត្រូវរ៉ូវ​គ្នា​ហើយ​នោះ រដ្ឋបាល​រាជធានី​ភ្នំពេញ​នឹង​ចាប់ផ្តើម​បើក​ការដ្ឋាន​តែម្តង។

គម្រោង​សាងសង់​ស្ពាន​អាកាស​នេះ គឺ​ស្ថិត​នៅ​ចំណុច​ប្រសព្វ​ផ្លូវ​៦០​ម៉ែត្រ ផ្លូវ​ព្រះមុនីវង្ស ​និង​ផ្លូវ​២៧១ ជាប់​ព្រំប្រទល់​រវាង​ខណ្ឌ​មានជ័យ​ និង​ខណ្ឌ​ចំការមន។

បច្ចុប្បន្ន​នេះ​ នៅក្នុង​រាជធានី​ភ្នំពេញ​មាន​ស្ពាន​អាកាស​ចំនួន​៥ កន្លែង​ហើយ​រួមមាន៖ ១. ស្ពាន​អាកាស​ក្បាលថ្នល់​នៅ​អតីត​រង្វង់​មូល​ក្បាលថ្នល់ ២. ស្ពាន​អាកាស​ស្ទឹងមានជ័យ ៣. ស្ពាន​អាកាស​៧​មករា ស្ថិតនៅ​ស្តុ​ប​ពេទ្យ​លោកសង្ឃ ៤. ស្ពាន​អាកាស​៥​មករា ស្ថិតនៅ​ស្ដុ​ប​តិច​ណូ និង​៥. ស្ពាន​អាកាស ស្តុ​ប​ផ្សារ​ដី​ហុយ។ ថ្មីៗ​នេះ រាជ​រដ្ឋាភិបាល ក៏​ទើបតែ​បើក​ការដ្ឋាន​សាងសង់​ស្ពាន​អាកាស​នៅ​រង្វង់​មូល​ចោមចៅ​ផងដែរ៕

ប្រភព៖ ខ្លីៗ

Urban Voice Cambodia

Urban Voice Cambodia