អាជ្ញាធរ​រាជធានី​ភ្នំពេញ​ឲ្យ​ជម្រើស​២​សម្រាប់​ប្រជាពលរដ្ឋ​រស់នៅ​សំណង់​មិន​រៀបរយ សាងសង់​រំលោភ​អាង​ស្តុប​ទឹក​បឹងត្របែក
Posted On : April, 4, 2015 | By សំឡេងទីក្រុង

ថ្ងែសៅរ៍ ទី៤ ខែមេសា ឆ្នាំ២០១៥, ប្រភព៖ កម្ពុជាថ្មី

ភ្នំពេញ ៖ អាជ្ញាធរ​រាជធានី​ភ្នំពេញ​ឲ្យ​ជម្រើស​២​សម្រាប់​ប្រជាពលរដ្ឋ​រស់នៅ​សំណង់​មិន​រៀបរយ​សាងសង់​រំលោភ​ជុំវិញ​អាង​ស្តុ​ប​ទឹក​បឹងត្របែក នោះ​គឺ​មធ្យោបាយ​ទិញ​ដី លក់​ដី​ដើម្បី ដោះស្រាយ​បញ្ហា​ដែល​អាជ្ញាធរ​បាន​អះអាង​ថា ពួកគេ​រស់នៅ​ដោយ​ខុសច្បាប់ រំលោភ​លើ​ដី​សាធារណៈ​របស់​រដ្ឋ។

ការសម្រេច​ឲ្យមាន​ជា​ជម្រើស​២​បែបនេះ​ត្រូវ​បាន​ធ្វើឡើង​ក្នុង​កិច្ចប្រជុំ​មួយ​កាលពី​រសៀល​ថ្ងៃទី​២ ​មេសា ក្រោម​ធិបតី​ភាព​លោកប៉ា សុជាតិ​វង្ស អភិបាល​រាជធានី​ភ្នំពេញ។

ជម្រើស​ទាំង​២​បែប​នោះ​រួមមាន​ទី​១ប្រជាពលរដ្ឋ​អាច​ទិញ​ដី​ពី សាលា​រាជធានី​ភ្នំពេញ​ដើម្បី​បន្ត​ការរស់នៅ។ ទី​២យកប្រាក់​នៃ​តំលៃ​ដី​នោះ​ជា​ថ្នូរ​ទៅ​នឹង​ការ​ចាកចេញ​ទៅ​រស់នៅ​កន្លែង​ថ្មី។

លោកប៉ា សុជាតិ​វង្ស បាន​មានប្រសាសន៍ថា នេះ​ជា​ដំណោះស្រាយ​ឈ្នះឈ្នះ​ទាំងអស់គ្នា ដើម្បី​ឲ្យ​អាជ្ញាធរ​មានលទ្ធភាព​ឈាន​ទៅ​ធ្វើការ​កែលំអ​អាង​ស្តុក​ទឹក​បឹងត្របែក​ឡើងវិញ នៅពេល​ឆាប់ៗ​នេះ​ដើម្បី​រំដោះ​ទឹក​ចេញ​ក្រៅ​ក្រុង​បន្ទាប់ពី​អាង​ស្តុក​ទឹក​បឹងត្របែក​នេះ ត្រូវបាន​គេ​រំលោភ​ជិត​អស់​ទៅ​ហើយ។

លោក​អភិបាល​បន្ត​ថា យ៉ាងណាក៏ដោយ យើង​ត្រូវ​ដោះស្រាយ​បញ្ហា​នេះ​ឲ្យ​បាន ដោយ​មិនអាច​អូស​បន្លាយ​តទៅទៀត​ឡើយ។ ចំពោះ​ថវិកា​ដែល​ទទួល​បាន​ពី​ការ​លក់​ដី​នោះ នឹងត្រូវ​យក​ទៅ​អភិវឌ្ឍន៍​ក្នុង​តំបន់​នោះ​វិញ។ លោក​ក៏បាន​ណែនាំ​ឲ្យ​អាជ្ញាធរ​ដែនដី ស្រង់​ស្ថិតិ​ប្រជាពលរដ្ឋ​ឲ្យ​បានច្បាស់លាស់ រួម​ទាំង​ធ្វើការ​ផ្សព្វផ្សាយ​ពី​គោល​ការ​ណ៍​របស់ សាលា​រាជធានី​ភ្នំពេញ​ឲ្យ​ប្រជាពលរដ្ឋ​ដែល​មាន​ផល​ប៉ះពាល់​​បាន​ជ្រាប​ច្បាស់។ ជា​មួយ​គ្នា​នេះ​មន្ទីរ​ជំនាញ​ត្រូវតែ​ដាក់​កំលាំង​ចុះ​ស្តា​រអាង​ស្តុក​ទឹក​បឹងត្របែក​នៅ​ក្រោយ​បុណ្យចូលឆ្នាំ។

គួរ​បញ្ជាក់​ផង​ដែរ​ថា អាង​ស្តុក​ទឹក​បឹងត្របែក​មាន​ទំហំ​២៦​ហិកតា ពេលនេះ​ត្រូវ​បាន​គេ​រំលោភ​នៅសល់ មិន​ដល់​១០​ហិកតា​ផង ដោយ​ប្រជាពលរដ្ឋ​កាន់កាប់​ដោយ​ខុសច្បាប់​និង​សាងសង់​លំនៅ​ដ្ឋាន​មាន​មិន​តិចជាង​៥០០​គ្រួសារ​ឡើយ​៕

Urban Voice Cambodia

Urban Voice Cambodia