អាជ្ញាធរ​កាត់​ចោល​ស្លាក​យីហោ​អាជីវកម្ម​អត់​ច្បាប់​លើ​ចិញ្ចើម​ផ្លូវ
Posted On : March, 17, 2015 | By សំឡេងទីក្រុង

ឃុត សុភចរិយា, Tue, 17 March 2015, Phnom Penh Post

ភ្នំពេញៈ ស្លាក​យីហោ​អាជីវកម្ម និង​ប៉ាណូ​ផ្សព្វ​ផ្សាយ​ពាណិជ្ជ​កម្ម​ឥត​ច្បាប់​ជាច្រើន​ផ្ទាំង ដែល​ស្ថិត​នៅ​លើ​ចិញ្ចើម​ផ្លូវ​ព្រះ​សុធារស ចាប់​ពី​កែង​ផ្លូវ​នាគ​បាញ់​ទឹក​មុខ សាកល​វិទ្យាល័យ​ប៊ៀលប្រាយ រហូត​ដល់​មុខ​ស្ថានទូត​រុស្ស៊ី ត្រូវ​បាន​កម្លាំង​ប្រជា​ការពារ និង​កម្លាំង​សណ្តាប់​ធ្នាប់​នៃ​សង្កាត់​ទន្លេ​បាសាក់ ចាត់​វិធានការ​រុះរើ កាល​ពី​ព្រឹក​ម្សិល​មិញ។

លោក ខាត់ ណារិទ្ធិ ចៅ​សង្កាត់​ទន្លេ​បាសាក់ បាន​និយាយ​ថា ការ​ចុះ​រុះរើ​ស្លាក​យីហោ​អាជីវកម្ម និង​ផ្ទាំង​ប៉ាណូ​ផ្សព្វ​ផ្សាយ​ពាណិជ្ជកម្ម ដែល​ស្ថិត​នៅ​លើ​ចិញ្ចើម​ផ្លូវ​សាធារណៈ​នេះ ធ្វើ​ឡើង​ក្នុង​បំណង​រៀបចំ​សណ្តាប់​ធ្នាប់​តាម​ដង​ផ្លូវ​សាធារណៈ​ឲ្យ​មាន​របៀប​រៀបរយ និង​មាន​សោភណភាព​ជា​ពិសេស ដើម្បី​សម្រួល​ដល់​ការ​ធ្វើ​ដំណើរ​ទៅ​មក​របស់​អ្នក​ថ្មើរ​ជើង។

លោក​បាន​និយាយ​ថា៖ «ចំណាត់​ការ​នេះ មិន​មែន​ធ្វើ​ឡើង​តែ​នៅ​លើ​ដង​ផ្លូវ​ព្រះ​សុធារស នោះ​ទេ តែ​យើង​នឹង​បន្ត​ចុះ​អនុវត្ត​នៅ​តាម​បណ្ដោយ​ផ្លូវ​មួយ​ចំនួន​ទៀត​ក្នុង​ដែន​សមត្ថកិច្ច​របស់​យើង។ ចិញ្ចើម​ផ្លូវ​គឺជា​ផ្លូវ​សម្រាប់​អ្នក​ថ្មើរ​ជើង​ធ្វើ​ដំណើរ មិន​មែន​ជា​កន្លែង​ដាំ​បង្គោល​ស្លាក​យីហោ​អាជីវកម្ម ឬ ដាំ​បង្គោល​ផ្សព្វ​ផ្សាយ​ពាណិជ្ជ​កម្ម​នោះ​ទេ»។

លោក​បាន​ប្រាប់​ឲ្យ​ដឹង​ទៀត​ថា ស្លាក​យីហោ​អាជីវកម្ម​ស្ទើរ​តែ​ទាំង​អស់​នៅ​លើ​ចិញ្ចើម​ផ្លូវ​ព្រះ​សុធារស ត្រូវ​បាន​ម្ចាស់​ទីតាំង​អាជីវកម្ម ដាក់​ដោយ​គ្មាន​ច្បាប់​អនុញ្ញាត។

ការ​អនុវត្ត​ចំណាត់​ការ​កាត់​បង្គោល​ស្លាក​យីហោ​អាជីវកម្ម​លើ​ចិញ្ចើម​ផ្លូវ​សាធារណៈ​នេះ​ដែរ មាន​ការ​គាំទ្រ​ពី​មជ្ឈដ្ឋាន​ប្រជា​ពលរដ្ឋ​ជាច្រើន ពិសេស​អ្នក​ថ្មើរ​ជើង។

លោក គឹម សុវណ្ណា​រ៉េត អាយុ ៤៥​ឆ្នាំ ដែល​ជា​ប្រជា​ពលរដ្ឋ​រស់​នៅ​តាម​បណ្ដោយ​ផ្លូវ​ព្រះ​សុធារស ទល់​មុខ​ផ្សារ​ទំនើប​អ៊ីអន (AEON) បាន​និយាយ​ថា យោង​តាម​ច្បាប់​ចរាចរណ៍​ថ្មី អ្នក​ថ្មើរ​ជើង​ដែល​ដើរ​រំលោភ​លើ​ផ្លូវ​សាធារណៈ​សម្រាប់​ទោចក្រ​យាន និង​យានយន្ត នឹង​ត្រូវ​ផាក​ពិន័យ ឬ​ផ្ដន្ទាទោស​ឲ្យ​ជាប់​ពន្ធនាគារ​ផង​ដែរ ប្រសិន​បើ​បង្ក​គ្រោះថ្នាក់ និង​ការ​ខូច​ខាត​ដល់​អ្នក​ដទៃ។

លោក សុវណ្ណា​រ៉េត បាន​បន្ត​ថា ប៉ុន្តែ​បច្ចុប្បន្ន អ្នក​ថ្មើរ​ជើង​ស្ទើរ​តែ​គ្មាន​កន្លែង​សម្រាប់​ដើរ ព្រោះ​ចិញ្ចើម​ផ្លូវ​សាធារណៈ​ស្ទើរ​តែ​ទាំង​អស់​ក្នុង​ទីក្រុង​ភ្នំពេញ ត្រូវ​បាន​គេ​ច្បាម​យក​ធ្វើ​អាជីវកម្ម​លក់​ដូរ ធ្វើ​ជា​ចំណត​រថយន្ត-ម៉ូតូ និង​ដាំ​បង្គោល​ស្លាក​យីហោ​អាជីវកម្ម និង​ប៉ាណូ​ផ្សព្វ​ផ្សាយ​ពាណិជ្ជ​កម្ម​ផ្សេង។

លោក​បាន​ថ្លែង​ថា៖ «ចិញ្ចើម​ផ្លូវ​សម្រាប់​អ្នក​ថ្មើរ​ជើង​ស្ទើរ​តែ​ទាំង​អស់ ក្នុង​រាជធានី​ភ្នំពេញ ត្រូវ​បាន​គេ​រំលោភ​បំពាន យ៉ាង​ធ្ងន់ធ្ងរ ដែល​ទាមទារ​ឲ្យ​សមត្ថកិច្ច​រដ្ឋាភិបាល​ត្រូវ​ចាត់​វិធានការ​រៀបចំ​សណ្ដាប់​ធ្នាប់ និង របៀប​រៀបរយ ឲ្យ​បាន​ល្អ​ឡើង​វិញ»។

កាល​ពី​ដើម ខែ​មីនា នេះ សាលា​រាជធានី​ភ្នំពេញ បាន​ចេញ​សេចក្ដី​ជូន​ដំណឹង​មួយ ដោយ​បាន​ជំរុញ​ឲ្យ​អាជ្ញាធរ​ខណ្ឌ​ទាំង​អស់​ក្នុង​រាជធានី​នេះ ធ្វើ​ការ​រៀបចំ​សណ្ដាប់​ធ្នាប់​និង​របៀប​រៀបរយ​តាម​ដង​ផ្លូវ​សាធារណៈ ដោយ​លុប​បំបាត់​ចោល​ឲ្យ​អស់​នូវ​ការ​យក​ចិញ្ចើម​ផ្លូវ​សាធារណៈ ធ្វើ​អាជីវកម្ម​សម្រាប់​បម្រើ​ផល​ប្រយោជន៍​ផ្ទាល់​ខ្លួន៕

Urban Voice Cambodia

Urban Voice Cambodia