pp1-1080x675

អនាគត​អចលនទ្រព្យ​ក្នុង​រាជធានី​ភ្នំពេញ​ទាំងអស់​អាចមាន​តម្លៃ​ស្មើគ្នា

បច្ចុប្បន្នគេសង្កេតឃើញមានម្ចាស់គម្រោងអភិវឌ្ឍន៍លំនៅឋានកាន់តែច្រើនបានងាកទិសដៅនៃការអភិវឌ្ឍរបស់ខ្លួនទៅរកតំបន់ដែលស្ថិតនៅជាយក្រុង។ ដោយសារចរន្ដបែបនេះមានការកើនឡើងជាបន្ដបន្ទាប់នោះ មានការលើកឡើងពីអ្នកជំនាញមួយចំនួនថា ទៅថ្ងៃអនាគតតម្លៃអចលនទ្រព្យនៅតំបន់ជាយក្រុងនឹងកើនឡើងប្រហាក់ប្រហែលតំបន់បឹងកេងកងដែរ។

កន្លងមកគេតែងនិយាយថា បឹងកេងកងជាតំបន់ដែលអចលនទ្រព្យមានតម្លៃថ្លៃជាងគេនៅក្នុងរាជធានីភ្នំពេញ ព្រោះនៅទីនោះជាបណ្តុំនៃទីតាំងសំខាន់ៗដូចជា ស្ថានទូត អគារការិយាល័យ ផ្សារទំនើប ហាងប្រណីតៗ និងសាលារៀនអន្តរជាតិជាដើម។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជានាយកក្រុមហ៊ុន ខ្មែរ រៀលអ៊ីស្ទេត បានលើកឡើងថា ប្រសិនបើមើលទៅលើស្ថានភាពនៃតម្លៃអចលនវត្ថុនៅតំបន់បឹងកេងកង បច្ចុប្បន្ននេះគេអាចនិយាយបានថា វាមានតម្លៃថ្លៃជាង2ដង បើធៀបទៅនឹងតំបន់ទួលគោក ខណៈតំបន់ទួលគោគថ្លៃជាងតំបន់ភ្នំពេញថ្មី2ដងផងដែរ។

លោកបានអះអាងថា ៖ “នៅតំបន់បឹងកេងកងយើងចង់រកអ្វីមានទាំងអស់ ខណៈនៅតំបន់ទួលគោកមានខ្លះអត់ខ្លះ រីឯតំបន់ភ្នំពេញថ្មីរិតតែមិនសូវមាន ប៉ុន្ដែនៅ20ឆ្នាំក្រោយអ្វីដែលកំពុងមាននៅតំបន់បឹងកេងកង និងទួលគោក វានឹងមាននៅតំបន់ភ្នំពេញថ្មីដូចគ្នា ដូច្នេះតម្លៃអចលនទ្រព្យតំបន់ទាំងបីនឹងមានតម្លៃប្រហាក់ប្រហែលគ្នា ឬយើងអាចនិយាយបានថា អចលនទ្រព្យតំបន់ស្ថិតនៅទូទាំងរាជធានីភ្នំពេញនឹងមានតម្លៃប្រហាក់ប្រហែលគ្នា។

អ្វីដែលជាអំណៈអំណាងបន្ថែមអាចធ្វើឱ្យតម្លៃអចលនទ្រព្យនៅជាយក្រុងមានតម្លៃស្មើតំបន់ក្នុងក្រុងនារយៈពេល20ឆ្នាំខាងមុខ ត្រូវបានលោក គីម ហ៊ាង ប្រាប់ថានៅកណ្ដាលរាជធានីភ្នំពេញអាចនឹងជួបបញ្ហាកកស្ទះចរាចរណ៍ដោយសារកំណើនប្រជាជនរស់នៅក្នុងទីក្រុងភ្នំពេញនឹងកើនឡើងរហូតដល់ទៅ7លាននាក់នៅ2035 ម្យ៉ាងទៀតចំណុចកណ្តាលរាជធានីភ្នំពេញជួបការពិបាកក្នុងការពង្រីកផ្លូវថ្នល់ និងរៀបចំហេដ្ឋារចនាសម្ព័ន្ធផ្សេង។ ជាក់ស្ដែងដូចជានៅតំបន់បឹងកេងកង ប្រសិនបើចង់ពង្រីកផ្លូវ ឬធ្វើស្ពានអាកាសដើម្បីកាត់បន្ថយការកកស្ទះវាពិតជាត្រូវជួបការពិបាកច្រើនជាមិនខាន។ លោកសន្និដ្ឋានថា ប្រសិនបើអាចគឺធ្វើបានត្រឹមតែដាក់គោលការណ៍កំណត់លើអ្នកធ្វើដំណើរ ឬម្ចាស់យានយន្ដ ដើម្បីរៀបចំចរាចរណ៍ឱ្យមានសណ្ដាប់ធ្នាប់តាមរយៈការកំណត់ទិសផ្លូវ និងថ្ងៃសេស ថ្ងៃគូក្នុងការចតតែប៉ុណ្ណោះ។

ដើម្បីបញ្ជៀសការកកស្ទះចរាចរណ៍ទៅថ្ងៃអនាគត លោក គីម ហ៊ាង បានផ្ដល់ជាមតិថា សម្រាប់គម្រោងអភិវឌ្ឍន៍លំនៅឋានដែលកំពុងសាងសង់យើងចាត់ទុកថា ហួសទៅហើយ ប៉ុន្ដែគម្រោងលំនៅឋានត្រៀមនឹងសាងសង់ថ្មីគួរតែកំណត់ទំហំផ្លូវឱ្យធំជាងបុរីចាស់ពីរដង ព្រោះបុរីចាស់មានផ្លូវធម្មតា 8ម៉ែត្រ និងផ្លូវធំ10 ទៅ12ម៉ែត្រ។ មានតែវិធីនេះទេដែលអាចចូលរួមកាត់បន្ថយការកកស្ទះនៅពេលខាងមុខបើយើងមិនចាប់ផ្ដើមធ្វើពីឥឡូវទេ 20ឆ្នាំក្រោយវានឹងហួសពេល។

បើទោះបីជាប្រទេសកម្ពុជាពុំទាន់ត្រូវបានកំណត់ដោយច្បាប់ថាក្នុងការចែកតំបន់អភិវឌ្ឍន៍ក៏ដោយ ក៏ប៉ុន្ដែបច្ចុប្បន្នគេមើលឃើញថា នៅពេលអ្នកវិនិយោគចង់អភិវឌ្ឍន៍ខុនដូភាគច្រើនគេសម្លឹងរកទីតាំងនៅម្ដុំបឹងកេងកង ប្រសិនបើចង់អភិវឌ្ឍន៍គម្រោងលំនៅឋានគេច្រើនមើលទៅតំបន់ជាយក្រុង។ ចំណុចទាំងនេះមានការលើកឡើងថា ការពង្រីកការអភិវឌ្ឍគម្រោងលំនៅឋានទៅតំបន់ជាយក្រុងជាយុទ្ធសាស្ដ្រមួយដ៏ល្អក្នុងការចូលរួមចំណែកកាត់បន្ថយការកកស្ទះនៅតំបន់កណ្ដាលរាជធានីភ្នំពេញ។ នាយកប្រតិបត្តិក្រុមហ៊ុន Century 21 មេគង្គ លោក ច្រឹក សុខនីម បានលើកឡើងថា បឹងកេងកងជាតំបន់ដែលមានប្រជាប្រិយភាពសម្រាប់ការរស់នៅរបស់ជនបរទេស ព្រោះវាមិនត្រឹមតែជាតំបន់មានសក្ដានុពលក្នុងការធ្វើពាណិជ្ជកម្មប៉ុណ្ណោះទេ តែវាជាទីតាំងកណ្ដាលមួយដ៏ល្អសម្រាប់ការរស់នៅប្រកបដោយសុវត្ថិភាព។ តំបន់បឹងកេងកងក៏ជាបណ្ដុំទៅដោយស្ថានទូតនៃប្រទេសនានា ហើយវាស្ថិតនៅជិតទន្លេហើយក៏នៅមិនឆ្ងាយពីព្រលានយន្ដហោះអន្ដរជាតិភ្នំពេញដែរ ដូច្នេះអាចនិយាយបានជាទីតាំងល្អ។

លោក សុខនីម បានលើកឡើងថា ៖ “ខ្ញុំមិនបដិសេធទេថា ទៅអនាគតនៅតំបន់ផ្សេងៗនៅក្នុងរាជធានីភ្នំពេញអាចនឹងមានតម្លៃអចលនវត្ថុប្រហាក់ប្រហែលតំបន់បឹងកេងកង ប៉ុន្ដែវាជារឿងលំបាកដែរទំរាំអាចធ្វើឱ្យតំបន់ផ្សេងៗមានតម្លៃបែបហ្នឹង ដូច្នេះវាត្រូវទាមទាររយៈពេលយូរទើបអាចទៅរួច”៕

ប្រភព៖ ឡារ៉ែន 

Leave a Reply