អគ្គិសនី​កម្ពុជា​បកស្រាយ​ជុំវិញ​ការ​ចោទ​ប្រកាន់​ពី​ភាព​មិន​ប្រក្រតី​នៃ​កុងទ័រ​អគ្គិសនី
Posted On : July, 9, 2015 | By សំឡេងទីក្រុង

ប្រភព៖ វិទ្យុអាស៊ីសេរី ដោយ ចេង ម៉េងជូ 2015-07-08

ភាព​មិន​ប្រក្រតី​នៃ​នាឡិកា​ស្ទង់​អគ្គិសនី។

ឆ្លើយ​តប​នឹង​ការ​ចោទ​ប្រកាន់​របស់​សាធារណជន​មួយ​ចំនួន ដែល​ថា​អគ្គិសនី​កម្ពុជា កែច្នៃ​នាឡិកា​ស្ទង់​ដើម្បី​កេង​ប្រវ័ញ្ច​ពី​អតិថិជន អគ្គិសនី​កម្ពុជា បាន​ចេញ​សេចក្ដី​ជូន​ដំណឹង​មួយ​នៅ​ថ្ងៃ​ទី​៧ កក្កដា បកស្រាយ​ជុំវិញ​ការ​ចោទ​ប្រកាន់​ទាំង​នេះ។

ក្នុង​សេចក្ដី​ជូន​ដំណឹង​នោះ អគ្គិសនី​កម្ពុជា អះអាង​ថា អង្គភាព​របស់​ខ្លួន​មិន​មាន​គោលការណ៍​ណា​មួយ​កេង​ប្រវ័ញ្ច​ពី​អតិថិជន​នោះ​ទេ ក្នុង​នាម​ជា​ក្រុមហ៊ុន​របស់​រដ្ឋ ១០០%។ លិខិត​នោះ​បញ្ជាក់​ថា គ្រប់​នាឡិកា​ស្ទង់​ទាំងអស់​សុទ្ធតែ​មាន​ប្លុមបេ​ពី​រោងចក្រ​ផលិត​ពី​ក្រៅ​ប្រទេស និង​មិន​ត្រូវ​បាន​កែ​សម្រួល​ដោយ​អគ្គិសនី​កម្ពុជា នោះ​ទេ។ ការ​ផ្គត់ផ្គង់​នាឡិកា​ស្ទង់​ទាំងអស់ អគ្គិសនី​កម្ពុជា អះអាង​ថា បាន​ឆ្លង​កាត់​ការ​ដេញ​ថ្លៃ​ប្រកប​ដោយ​តម្លាភាព។

ចំពោះ​មន្ទិល​សង្ស័យ​ទាំងឡាយ​ណា​ដែល​អតិថិជន​មាន អគ្គិសនី​កម្ពុជា ជំរុញ​ឲ្យ​ទាក់ទង​ទៅ​អង្គភាព​ខ្លួន​តាម​រយៈ​លេខ​ទូរស័ព្ទ​ដែល​មាន​នៅ​លើ​វិក្កយបត្រ​ប្រចាំ​ខែ ឬ​មក​ជួប​មន្ត្រី​អគ្គិសនី​កម្ពុជា ដោយ​ផ្ទាល់។ ក៏ប៉ុន្តែ​ជាក់ស្តែង អតិថិជន​ដែល​បាន​ទៅ​ជួប​ភ្នាក់ងារ​របស់​អគ្គិសនី​កម្ពុជា ផ្ទាល់ បាន​ឲ្យ​ដឹង​ថា មន្ត្រី​ទាំង​នោះ​តែង​សម្ដែង​អាកប្បកិរិយា​មិន​សមរម្យ​ចំពោះ​អតិថិជន ព្រម​ទាំង​តម្រូវ​ឲ្យ​អតិថិជន​ដែល​ជួប​បញ្ហា​នោះ បង់​កម្រៃ ១​ម៉ឺន​រៀល​បន្ថែម​ទៀត​សម្រាប់​ថ្លៃ​ចុះ​ត្រួត​ពិនិត្យ។

រស់នៅ​ក្នុង​បុរី ប៉េង ហួត ម្ដុំ​បឹង​ស្នោ អ្នកស្រី ធីតា ជា​អតិថិជន​អគ្គិសនី​កម្ពុជា មួយ​រូប ទើប​តែ​ជួប​ប្រទះ​បញ្ហា​បរិមាណ​គីឡូវ៉ាត់​នៃ​អគ្គិសនី​កើន​ឡើង​ខុស​ប្រក្រតី​នេះ។ អ្នកស្រី​រៀបរាប់​ថា អគ្គិសនី​កម្ពុជា គួរ​តែ​មាន​ការ​ទទួល​ខុស​ត្រូវ​ឲ្យ​បាន​ប្រសើរ​ជាង​នេះ ក្នុង​ការ​ដោះស្រាយ​បញ្ហា​ជូន​អតិថិជន៖«យើង​ព្យាយាម​ទាក់ទង​ទៅ​គាត់​តាម​លេខ​ទូរស័ព្ទ​ដែល​គាត់​ដាក់​នៅ​លើ​វិក្កយបត្រ​ភ្លើង​ហ្នឹង ប៉ុន្តែ​គាត់​នៅ​តែ​ព្យាយាម​ថា​ឲ្យ​យើង​ហ្នឹង​ទៅ​ដល់​កន្លែង​គេ គេ​មិន​អាច​ធ្វើ​អី​ឲ្យ​យើង​បាន លុះត្រា​តែ​យើង​ទៅ​បំពេញ​ទម្រង់​បែបបទ​ឲ្យ​គេ បាន​គេ​អាច​ចុះ​ទៅ​បាន ហើយ​ខ្ញុំ​ក៏​ថា គួរ​ណាស់​តែ​មាន​ការ​សម្រួល​ដល់​ប្រជាពលរដ្ឋ​ផង ព្រោះ​ថា ប្រជាពលរដ្ឋ​រវល់​រក​ស៊ី​ដែរ ធ្វើ​ការ​ដែរ។ អ៊ីចឹង​គួរ​តែ​នៅ​ពេល​ដែល​យើង complain (តវ៉ា) តាម​ទូរស័ព្ទ​អី គួរ​តែ​ចុះ​ទៅ​មើល​ចុះ​ទៅ​អី ចាំបាច់​យើង​ទៅ​ដល់​កន្លែង​ចំណាយ​ពេល​ទៅ​ដល់​កន្លែង​ហើយ ត្រូវ​បំពេញ​បែបបទ​អី​អ៊ីចឹង​ទៀត វា​ធ្វើ​ឲ្យ​នីតិវិធី​វា​ស្មុគស្មាញ»

បញ្ហា​អគ្គិសនី​ដែល អ្នកស្រី ធីតា បាន​ជួប​ប្រទះ គឺ​មិន​ខុស​ពី​បទពិសោធន៍​របស់​អតិថិជន​មួយ​ចំនួន​ទៀត​នោះ​ទេ គឺ​បរិមាណ​អគ្គិសនី​ដែល​អ្នកស្រី​ប្រើប្រាស់​កើន​ឡើង​ទ្វេ​ដង ថ្វី​បើ​ទម្លាប់​ប្រើប្រាស់​ជាក់ស្តែង​នៅ​គេហដ្ឋាន​អ្នកស្រី មិន​មាន​ការ​ប្រែប្រួល​ធំ​ដុំ​ក៏ដោយ៖ «ភ្លើង​ហ្នឹង​នៅ​ពេល​ដែល​យើង​ប្រើ ចូល​ទៅ​នៅ​ដំបូងៗ ពីរ​បី​ខែ​ដំបូង​ហ្នឹង គឺ​វា​អស់​មិន​ដល់ ២០​ម៉ឺន ថា ២០​ម៉ឺន​ចុះ វា​ក្បែរៗ ២០​ម៉ឺន វា​ចេះ​តែ​ឡើង​បន្តិច​ម្ដងៗ​រហូត​ដល់ ៣០​ម៉ឺន។ អ៊ីចឹង​យើង​គិត​ថា បើ​វា​ឡើង​តិចតួច វា​អត់​បញ្ហា​អី​ទេ ប៉ុន្តែ​មក​ដល់​ខែ​បួន ស្រាប់​តែ​វា​ឡើង​ដល់​គុណ​នឹង​ពីរ។ យើង​មាន​ការ​ភ្ញាក់ផ្អើល​ដែរ ព្រោះ​ការ​ប្រើប្រាស់​ភ្លើង​ហ្នឹង គឺ​យើង​ប្រើប្រាស់​ដដែល»

នៅ​លើ​បណ្ដាញ​សង្គម​ហ្វេសប៊ុក (facebook) ឯណោះ​វិញ គេ​សង្កេត​មាន​ការ​បញ្ចេញ​កំហឹង និង​ចម្ងល់​ជា​ហូរហែ​ពី​សំណាក់​អតិថិជន​ដែល​ជួប​ប្រទះ​កំណើន​មិន​ប្រក្រតី​នេះ។

ជាក់ស្ដែង អតិថិជន​អគ្គិសនី​កម្ពុជា មួយ​រូប បាន​បង្ហោះ​រូប​វិក្កយបត្រ​អគ្គិសនី​ខែ​ចាស់ និង​ខែ​ថ្មី​របស់​ខ្លួន​ដាក់​ប្រៀបធៀប​គ្នា ហើយ​សរសេរ​ថា «ខែ​មុន​អស់ ៩២.០០០​រៀល ស្រាប់​តែ​ខែ​នេះ​អស់​ដល់ ១៨៨.១០០​រៀល ខុស​គ្នា ២​ដង ផ្ទះ​មាន​មនុស្ស​តែ ២​សោះ។ ចង់​សួរ​ថា EDC ធ្វើ​ការ​យ៉ាង​ម៉េច? ចង់​សម្លាប់​ប្រជាជន​មែន​ទេ?»

ស្រដៀង​គ្នា​នេះ មន្ត្រី​រាជការ​មួយ​រូប​បម្រើ​ការ​នៅ​ក្រសួង​មហាផ្ទៃ ដែល​ជួប​បញ្ហា​នេះ​ដែរ បាន​សរសេរ​នៅ​លើ​បណ្ដាញ​សង្គម​ហ្វេសប៊ុក​របស់​លោក​ថា«បាន​ទៅ​ពិនិត្យ​មើល​ហើយ ប៉ុន្តែ​នៅ​តែ​ឆ្ងល់។ អ្នក​បច្ចេកទេស​ប្រាប់​ថា មាន​មូលហេតុ​ពីរ​យ៉ាង ទី​១ គឺ​អាកាសធាតុ​ឡើង​កម្ដៅ។ ទី​២ គឺ​ឧបករណ៍​ប្រើប្រាស់​កាន់​តែ​ចាស់។ ខ្ញុំ​គិត​មុន​គាត់​និយាយ ថា​នឹង​ទទួល​បាន​ចម្លើយ​អ៊ីចឹង។ បង​ប្អូន​ណា​ដឹង​ថា​ត្រូវ​ធ្វើ​ម៉េច​ទេ?»

ទាក់ទង​នឹង​ការ​បញ្ចេញ​មតិ​នៅ​លើ​បណ្ដាញ​ហ្វេសប៊ុក​អំពី​បញ្ហា​អគ្គិសនី​នេះ អង្គភាព​អគ្គិសនី​កម្ពុជា តាម​រយៈ​សេចក្ដី​ជូន​ដំណឹង​របស់​ខ្លួន ចាត់​ទុក​ការ​ចុះ​ផ្សាយ​តាម​ប្រព័ន្ធ​ព័ត៌មាន​សង្គម ថា​មិន​មែន​ជា​ដំណោះស្រាយ​ទេ ដោយសារ​ភ្នាក់ងារ​អគ្គិសនី​មិន​អាច​ទទួល​បាន​ព័ត៌មាន​ស្ដីពី​បញ្ហា​របស់​សាធារណជន។ លិខិត​ជូន​ដំណឹង​នោះ ក៏​លើក​ឡើង​ដែរ​ថា ការ​ចោទ​ប្រកាន់​មួយ​ចំនួន​គ្មាន​មូលដ្ឋាន​ត្រឹមត្រូវ ដែល​អាច​ធ្វើ​ឲ្យ​សាធារណជន​ប្រឈម​មុខ​នឹង​ការ​ទទួល​ខុស​ត្រូវ​ចំពោះ​មុខ​ច្បាប់។

ជុំវិញ​ការ​បកស្រាយ​របស់​អគ្គិសនី​កម្ពុជា នេះ អ្នក​សម្រប​សម្រួល​បណ្ដាញ​រួបរួម​ដើម្បី​គណនេយ្យ​ភាព​សង្គម​នៅ​អាស៊ី​បូព៌ា និង​ប៉ាស៊ីហ្វិក ប្រចាំ​កម្ពុជា លោក សន ជ័យ យល់​ថា ភាព​មិន​ប្រក្រតី​ពិត​ជា​កើត​មាន ហើយ​ថា​អគ្គិសនី​កម្ពុជា គួរ​តែ​ស្វែងរក​ដំណោះស្រាយ​ពិត​ប្រាកដ​ចំពោះ​ភាព​មិន​ប្រក្រតី​ដែល​កើត​មាន​ជូន​អតិថិជន៖ «បើ​សិន​ជា​វា​មិន​មាន​ភាព​មិន​ប្រក្រតី​នៃ​កុងទ័រ​ណា​មួយ​នោះ កុងទ័រ​ភ្លើង​វា​មិន​ដើរ​រហូត​ដល់​ប្រជាពលរដ្ឋ​ភ័យ​ព្រួយ​បារម្ភ​ពី​ការ​ខាត​បង់​ផល​ប្រយោជន៍​របស់​គេ​ទេ។ អ៊ីចឹង​ពិត​ជា​មាន​ភាព​មិន​ប្រក្រតី​ណា​មួយ​ហើយ ដូចជា​រឿង​គុណភាព​អន់ៗ​នៃ​កុងទ័រ​ដែល​វា​មិន​អាច​ធានា​បាន​ជាមួយ​នឹង​ការ​បែង​ចែក​ភ្លើង​ហ្នឹង ធ្វើ​ឲ្យ​វា​មាន​ភាព​មិន​ប្រក្រតី។ ហើយ​ការ​លើក​ឡើង​របស់​មេ​អឺដេសេ (EDC) ហ្នឹង វា​គ្រាន់​តែ​ជា​ការ​លុប​លាង​ក្ដី​អាម៉ាស់​របស់​ពួក​គេ​តែ​ប៉ុណ្ណោះ។ រឿង​ដែល​សំខាន់ ត្រូវ​ដោះស្រាយ​ជាមួយ​ប្រជាពលរដ្ឋ ត្រូវ​ទូទាត់​ការ​ខូចខាត​របស់​ប្រជាពលរដ្ឋ ជា​ជាង​ការ​ថ្លែង​ការពារ​ខ្លួន​បែប​នេះ»

សេចក្ដី​ជូន​ដំណឹង​របស់​អគ្គិសនី​កម្ពុជា នេះ បញ្ជាក់​ថា ក្នុង​ករណី​ដែល​អតិថិជន​ពុំ​អស់​ចិត្ត​ចំពោះ​ដំណោះស្រាយ​របស់​អគ្គិសនី​កម្ពុជា ពួក​គាត់​អាច​ស្នើសុំ​អាជ្ញា​កណ្ដាល គឺ​អាជ្ញាធរ​អគ្គិសនី​កម្ពុជា ឲ្យ​ពិនិត្យ​នាឡិកា​ស្ទង់​ដោយ​ឯករាជ្យ។

អគ្គិសនី​កម្ពុជា ឲ្យ​ដឹង​ថា បច្ចុប្បន្ន​អង្គភាព​ខ្លួន​កំពុង​ស្នើសុំ​ជំនួយ​បច្ចេកទេស​ពី​ទីភ្នាក់ងារ​សហប្រតិបត្តិការ​អន្តរជាតិ​នៃ​ប្រទេស​ជប៉ុន ហៅ​កាត់​ថា ចៃកា (JICA) ឲ្យ​ជួយ​បង្កើត​មជ្ឈមណ្ឌល​ពិនិត្យ​នាឡិកា​ស្ទង់​ឯករាជ្យ​ថ្នាក់​ជាតិ​មួយ ហើយ​ថា ចៃកា កំពុង​ពិនិត្យ​សំណើ​នេះ៕

Urban Voice Cambodia

Urban Voice Cambodia