សាលា​រាជធានី​រើស​នគរបាល​ចរាចរ​ណ៍ ៣០០​នាក់ ទៀត​សម្រាប់​ដោះស្រាយ​ការកកស្ទះ​នៅ​ភ្នំពេញ​
Posted On : January, 3, 2017 | By Vantha

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃបានឯកភាពឲ្យអាជ្ញាធររាជធានីភ្នំពេញរើសមន្ត្រី នគរបាលចរាចរណ៍ជាប់កិច្ចសន្យាជាង ៣០០នាក់ទៀត ជាកម្លាំងបន្ថែមសម្រាប់ដោះស្រាយ ការកកស្ទះចរាចរណ៍ក្នុងរាជធានីភ្នំពេញ ដែលកាន់តែមានសភាពយ៉ាប់យ៉ឺនឡើងៗ ។

សម្តេច ស ខេង ដែលជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកផងដែរនោះ បានផ្តល់ការយល់ព្រមបែបនេះ ជាការឆ្លើយតបទៅនឹងសំណើផ្ទាល់មាត់របស់លោកប៉ា សុជាតិវង្ស អភិបាលរាជធានីភ្នំពេញ ក្នុងកិច្ចប្រជុំបូកសរុបលទ្ធផលត្រួតពិនិត្យការងារអនុវត្តច្បាប់ស្តីពីចរាចរណ៍ផ្លូវគោកប្រចាំឆ្នាំ២០១៦ និងទិសដៅការងារឆ្នាំ២០១៧ នៅថ្ងៃទី២ ខែមករា។

លោកអភិបាលរាជធានីភ្នំពេញ បានជម្រាបសម្តេច ស ខេង និងមន្ត្រីចូលរួមក្នុងពិធីនោះថា បច្ចុប្បន្នមន្ត្រីនគរបាលចរាចរណ៍ចាស់មានចំនួនជាង ៤០០នាក់ប៉ុណ្ណោះ ដែលប្រចាំបញ្ជាចរាចរណ៍ ហើយចំនួននេះពុំគ្រប់គ្រាន់សម្រាប់ដោះស្រាយបញ្ហាការកកស្ទះចរាចរណ៍ តាមគោលដៅកកស្ទះខ្លាំងចំនួន ១៨២គោលដៅ នៅរាជធានីភ្នំពេញឡើយ។

លោកនិយាយថា ការកកស្ទះនឹងកើតឡើងដោយសារការខ្វះកម្លាំងនគរបាលចរាចរណ៍ ឬកងរាជអាវុធហត្ថ ហើយក្នុងចំណោមនោះ មន្ត្រីច្រើននាក់មានវ័យចំណាស់ដែលទៅជួយបញ្ជាចរាចរណ៍ម្តងៗ បានត្រឹមតែរយៈពេលខ្លីប៉ុណ្ណោះតាមគោលដៅនីមួយៗ។

ជាការឆ្លើយតប សម្តេចឧបនាយករដ្ឋមន្ត្រី ស ខេង និយាយថាការបង្កើនចំនួនមន្ត្រីនគរបាលចរាចរណ៍ ក្នុងក្របខ័ណ្ឌជាប់កិច្ចសន្យា អាចជួយកាត់បន្ថយការចំណាយរបស់រដ្ឋផង។

យោងតាម លោក ប៉ា សុជាតិវង្ស បច្ចុប្បន្នរាជធានីភ្នំពេញមានរថយន្តចំនួនជាង ៤០ម៉ឺន និងម៉ូតូ ១លាន ៤សែនគ្រឿង និងប្រជាពលរដ្ឋរស់នៅជិត ៣លាននាក់៕
ប្រភព៖ thmeythmey.com

Urban Voice Cambodia

Urban Voice Cambodia