លោកប៉ា សុជាតិវង្ស ប្រជុំណែនាំអាជ្ញាធរក្រោមឱវាទត្រៀមកម្លាំងការពារ និងរក្សាសន្តិសុខក្នុងឱកាសបុណ្យចូលឆ្នាំខ្មែរ
Posted On : April, 9, 2015 | By សំឡេងទីក្រុង
ថ្ងៃព្រហស្បតិ៍ ទី៩ ខែមេសា ឆ្នាំ២០១៥, កោះសន្តិភាព
រាជធានីភ្នំពេញ ៖ ដើម្បីរក្សាសន្តិសុខ សណ្តាប់ធ្នាប់ និងរបៀបរៀបរយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់ចាប់ពីថ្ងៃទី១៤ដល់ថ្ងៃទី១៦ មេសា ២០១៥ឆាប់ៗខាងមុខនេះ កាលពីរសៀលថ្ងៃទី០៧ មេសា ២០១៥ លោកប៉ា សុជាតិវង្ស អភិបាលរាជធានីភ្នំពេញបានកោះប្រជុំជាមួយមន្ត្រីក្រោមឱវាទទាំងអស់ ជាពិសេសអាជ្ញាធរខណ្ឌ និងកងកំលាំងប្រដាប់អាវុធ ដើម្បីធ្វើការណែនាំឲ្យត្រៀមកម្លាំងក្នុងការការពារ និងរក្សាសន្តិសុខ សណ្តាប់ធ្នាប់ ពិសេសទប់ស្កាត់មិនឲ្យមានបទល្មើសផ្សេងៗកើតឡើង ដែលរំខានដល់ភាពសប្បាយរីករាយរបស់ប្រជាពលរដ្ឋ ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា «ក្នុងពិធីបុណ្យចូលឆ្នាំថ្មីប្រពៃណីជាតិ ឆ្នាំ មមែសប្តសក័ ព.ស២៥៥នេះ មន្ទីរសាធារណការរបស់លោកបានដាក់ចេញជាផែនការក្នុងការរៀបចំតុបតែងកែលំអឲ្យមានសោភ័ណភាពក្នុងរាជធានីភ្នំពេញជាច្រើនកន្លែង ជាពិសេសនៅរមណីយដ្ឋានវត្តភ្នំ វិមានឯករាជ្យ និងនៅតាមបណ្តោយផ្លូវសំខាន់ៗមួយចំនួនទៀត ។ ក្នុងនោះយើងបានរៀបចំបំពាក់អំពូលភ្លើងចម្រុះពណ៌នៅតាមដើមឈើ ការលាបកំបោរនៅតាមដើមឈើ ត្រៀមកម្លាំងកម្មករសម្រាប់បោសសំអាតនៅតាមសួនច្បារនានា ត្រៀមកម្លាំងនៅតាមស្ថានីយបូមទឹកទាំង៤ និងការត្រៀមកម្លាំងមន្ត្រី ដើម្បីកាត់ដើមឈើពេលវាបាក់ដោយប្រការផ្សេងៗផងដែរ »។
លោកប៉ា សុជាតិវង្ស បានលើកឡើងថា «សម្រាប់បុណ្យចូលឆ្នាំថ្មីនេះ យើងបានត្រៀមកម្លាំងជាច្រើន ដើម្បីការពារសន្តិសុខ សណ្តាប់ធ្នាប់ ពិសេសទប់ស្កាត់មិនឲ្យមានបទល្មើសផ្សេងៗកើតឡើងដែលរំខានដល់សប្បាយភាពរបស់ប្រជាពលរដ្ឋនោះទេ ហើយអាជ្ញាធរគ្រប់ខណ្ឌ និងកងកំលាំងទាំងអស់ត្រូវត្រៀមកម្លាំងប្រចាំការជាប់ជានិច្ច បើមានបញ្ហាអ្វីកើតឡើងយើងចុះជួយអន្តាគមន៍ភ្លាមតែម្តង ពិសេសគ្រោះអគ្គិភ័យដែលតែងតែកើតឡើងរាល់ឆ្នាំ និងត្រូវបង្កើតលែងល្បែងប្រជាប្រិយនៅតាមទីវត្តអារាម ព្រមទាំងទីសាធារណៈផ្សេងៗដើម្បីបង្កការសប្បាយរីករាយជូនប្រជាពលរដ្ឋផងដែរ »៕
