ពលរដ្ឋ​ប្រតិកម្ម​ទៅ​នឹង​សេចក្ដី​សម្រេច​របស់​សាលា​រាជធានី​រឿង​អភិវឌ្ឍ​ទីក្រុង​រណប
Posted On : March, 18, 2015 | By សំឡេងទីក្រុង

ដោយ៖ ម៉ម មុនីរតន៍, វិទ្យុអាស៊ីសេរី,  ថ្ងៃទី១៩ខែមីនា ឆ្នាំ២០១៥

ប្រជាពលរដ្ឋ​ដែល​រង​ផល​ប៉ះពាល់​ដោយ​ការ​អភិវឌ្ឍ​ទីក្រុង​រណប​ជ្រោយចង្វារ របស់​ក្រុមហ៊ុន អូ.ស៊ី.អាយ.ស៊ី (OCIC) ចាត់​ទុក​ដំណោះស្រាយ​របស់​អាជ្ញាធរ​ក្រុង ដើម្បី​បញ្ចប់​វិវាទ​នេះ​ថា ធ្វើ​ឡើង​ដដែលៗ ដែល​ពលរដ្ឋ​រង​ផល​ប៉ះពាល់​ធ្ងន់ធ្ងរ​ពុំ​អាច​ទទួល​យក​បាន​ឡើយ។

ប្រតិកម្ម​នេះ ធ្វើ​ឡើង​នៅ​បន្ទាប់​ពី​អភិបាល​សាលា​រាជធានី​ភ្នំពេញ បាន​សន្យា​ចំពោះ​មុខ​អ្នក​មាន​ជម្លោះ​ដីធ្លី​ថា ការ​អភិវឌ្ឍ​ទីក្រុង​រណប​ជ្រោយចង្វារ​នេះ នឹង​មិន​ធ្វើ​ប៉ះពាល់​ប្រជាពលរដ្ឋ​ទេ។

ភ្លាមៗ ក្រោយ​ពី​អភិបាល​ក្រុង​បាន​ប្រកាស​រំសាយ​អង្គ​ប្រជុំ​ដែល​រៀបចំ​ឡើង​នៅ​ ក្នុង​បរិវេណ​របស់​ក្រុមហ៊ុន អូ.ស៊ី.អាយ.ស៊ី គ្រឿង​ចក្រ​ដែល​ត្រៀម​រួច​ជា​ស្រេច​នៅ​ខាង​ក្រៅ ក៏​បាន​ចាប់​អនុវត្ត​ទៅ​តាម​គម្រោង​ស្ថាបនា​ផ្លូវ​ដែល​មាន​ចម្ងាយ​ប្រមាណ ១០០​ម៉ែត្រ​ពី​អ័ក្ស​ផ្លូវ​លេខ ៦​អា។

ការ​ចាប់​ផ្តើម​នេះ​ធ្វើ​ឲ្យ​ពលរដ្ឋ​ដែល​មាន​ជម្លោះ​ជាមួយ​ក្រុមហ៊ុន អូ.ស៊ី.អាយ.ស៊ី មាន​ក្តី​ព្រួយ​បារម្ភ និង​ជំរុញ​ឲ្យ​មាន​ភាព​ចម្រូងចម្រាស​កាន់​តែ​ខ្លាំង​ឡើង។

រស់​នៅ​ភូមិ​ដើមគរ លោក ជា សុផាត ពលរដ្ឋ​ដែល​រងគ្រោះ​ម្នាក់ និង​ជា​ប្រធាន​សហគមន៍​ភូមិ​ដើមគរ ក្នុង​ចំណោម​ពលរដ្ឋ ៣​សង្កាត់​ផ្សេង​ទៀត ឲ្យ​ដឹង​នៅ​ថ្ងៃ​ទី​១៨ មីនា ថា គម្រោង​ដែល​ចាប់​អនុវត្ត​ដោយ​ក្រុមហ៊ុន អូ.ស៊ី.អាយ.ស៊ី របស់​លោក ពុង ឃាវសែ នៅ​ពេល​នេះ គឺ​ប្រជាពលរដ្ឋ​មិន​ទាន់​បាន​យល់​ព្រម​នោះ​ទេ។ លោក​បន្ត​ថា សាលា​រាជធានី​ភ្នំពេញ បាន​យល់​ព្រម​ហៃអើ​តែ​ម្នាក់​ឯង ចំណែក​ប្រជាពលរដ្ឋ​នៅ​ពុំ​ទាន់​បាន​ឯកភាព​ទទួល​យក​គោលការណ៍​នេះ​នៅ​ឡើយ​ទេ៖ «មាន ​គោលការណ៍​ប៉ុណ្ណឹង​ដដែល​ហ្នឹង។ ដូច្នេះ ​បាន​ន័យ​ប្រជាជន​យើង​ខ្ញុំ​មិន​អាច​ទទួល​យក​បាន​ទេ នូវ​ផល​ប៉ះពាល់​ដីស្រែ​ចម្ការ ក៏​ដូច​ជា​ដី​លំនៅឋាន មិន​អាច​ទទួល​យក​បាន​ទេ»

កិច្ច​ប្រជុំ​ដែល​រៀបចំ​ត្រី​​ភាគី​ក្នុង​នោះ​មាន​​តំណាង​ប្រជាពលរដ្ឋ ភាគី​ក្រុមហ៊ុន និង​អាជ្ញាធរ​​ក្រុង កាល​ពី​ព្រឹក​ថ្ងៃ​ទី​១៨ មីនា នៅ​ទីស្នាក់ការ​​ក្រុមហ៊ុន អូ.ស៊ី.អាយ.ស៊ី នោះ អភិបាល​រាជធានី​ភ្នំពេញ លោក ប៉ា សុជាតិវង្ស បាន​ផ្ដល់​គោលនយោបាយ ២​ជម្រើស​ទៅ​ដល់​អ្នក​ភូមិ គឺ​ទី​មួយ​ព្រម​ទទួល​យក​លុយ​ដែល​ស្មើ​ទៅ​នឹង​តម្លៃ​ដី​ដែល​បាន​ទិញ​មុន​មក​ រស់​នៅ និង​ទី​ពីរ​ព្រម​ទទួល​ផ្ទះ​មួយ​ល្វែង​នៅ​ក្នុង​ក្រុមហ៊ុន ដែល​មាន​ទំហំ ៤​ម៉ែត្រ គុណ ១២​ម៉ែត្រ និង​តូប​លក់​ដូរ​មួយ។

ប្រជាពលរដ្ឋ​ដែល​មាន​ជម្លោះ​ដីធ្លី​ចាត់​ទុក​ថា ដំណោះស្រាយ​ជា​​ថ្មី​ទៀត​នៅ​ពេល​នេះ គឺ​មិន​ខុស​គ្នា​ពី​ដំណោះស្រាយ​លើក​មុនៗ​ឡើយ។ ពលរដ្ឋ​ទាំង​បី​សង្កាត់ ក្នុង​ខណ្ឌ​ជ្រោយចង្វារ គឺ​សង្កាត់​ព្រែកលាភ សង្កាត់​ជ្រោយចង្វារ និង​សង្កាត់​ព្រែកតាសេក ធ្លាប់​បាន​តវ៉ា​ជា​ច្រើន​លើក​មក​ហើយ ជាមួយ​ក្រុមហ៊ុន អូ.ស៊ី.អាយ.ស៊ី នៅ​​តែ​ពុំ​ទទួល​បាន​លទ្ធផល​ចាប់​តាំង​ពី​មាន​វិវាទ ក្រោយ​ឆ្នាំ​២០១១ មក បន្ទាប់​ពី​ក្រុមហ៊ុន​នេះ ទទួល​បាន​សិទ្ធិ​វិនិយោគ​ពី​រដ្ឋាភិបាល​សាងសង់​ជា​ទីក្រុង​រណប​ជ្រោយចង្វារ។

លោក ប៉ា សុជាតិវង្ស ថ្លែង​នៅ​ក្នុង​កិច្ច​​ប្រជុំ​នោះ​ថា ការ​ពិត​បើ​កុំ​ឲ្យ​មាន​ការ​អភិវឌ្ឍ​របស់​រដ្ឋាភិបាល​ដី​នៅ​តំបន់​ដែល​មាន​ ជម្លោះ​នេះ ក៏​ពុំ​មាន​​តម្លៃ​ប៉ុន្មាន​នោះ​ដែរ។ ហេតុ​នេះ លោក​អះអាង​ថា ដើម្បី​ឈ្នះៗ​ទាំង​អស់​គ្នា ប្រជាពលរដ្ឋ​គួរ​ទទួល​ទទួល​យក​សំណូមពរ​នេះ ហើយ​ថា ទៅ​​ថ្ងៃ​ខាង​មុខ​តម្លៃ​ដី​នេះ​អាច​នឹង​ឡើង​ខ្ពស់​ជាង​នេះ​ថែម​ទៀត។ បើ​ទោះ​ជា​បែប​ណា លោក ប៉ា សុជាតិវង្ស បាន​សន្យា​ថា ការ​អភិវឌ្ឍ​​ជា​ទីក្រុង​រណប​នេះ នឹង​មិន​បណ្ដេញ​ពលរដ្ឋ​ចេញ​ដោយ​ដោះ​ដូរ​ទៅ​កាន់​ទីតាំង​ថ្មី​នោះ​ទេ៖ «ដើម្បី ​បញ្ជាក់​អំពី​គោលការណ៍ ដំណោះស្រាយ​របស់​សាលា​រាជធានី​ភ្នំពេញ ជា​មួយ​នឹង​ការ​ពាក់ព័ន្ធ​ផល​ប៉ះពាល់​របស់​បងប្អូន​ប្រជាពលរដ្ឋ​យើង។ មាន​ន័យ​ថា បងប្អូន​ឥត​មាន​អ្នក​ណា​មួយ​ខាត​ជាមួយ​នឹង​គម្រោង​អភិវឌ្ឍន៍​នេះ​ទាំង​អស់»

ថ្វី​បើ​នៅ​ក្នុង​កិច្ច​ប្រជុំ​ត្រីភាគី​នោះ លោក ពុង ឃាវសែ ម្ចាស់​គម្រោង​វិនិយោគ​ក្រុមហ៊ុន អូ.ស៊ី.អាយ.ស៊ី បាន​អះអាង​ថា ខ្លួន​បាន​ដោះស្រាយ​ជា​គោលនយោបាយ​ជាមួយ​ពលរដ្ឋ​បាន​ជាង ១០០​គ្រួសារ​ហើយ​ក្ដី ក៏​អ្នក​ភូមិ​និយាយ​ថា ជម្លោះ​នេះ​នៅ​តែ​មិន​ថមថយ​ឡើយ។

ដំណោះ​ស្រាយ​រឿង​ដី​ស្រែ​ចម្ការ និង​ដី​លំនៅឋាន​ដែល​រង​ផល​ប៉ះពាល់​ដោយ​ការ​អភិវឌ្ឍ​ជា​ទីក្រុង​រណប នៅ​បន្ត​មាន​ចម្រូងចម្រាស​ដោះ​មិន​ទាន់​ចេញ​នៅ​ឡើយ​ផង ខាង​ក្រុមហ៊ុន និង​អាជ្ញាធរ​បាន​បន្ត​ស្ថាបនា​ផ្លូវ​មួយ​ខ្សែ​ទៀត ស្រប​នឹង​ផ្លូវ​លេខ ៦​អា ដែល​មាន​ទំហំ​ទទឹង ១០​ម៉ែត្រ ដោយ​ពុំ​បាន​សិក្សា​ពី​ហេតុ​ផល​ប៉ះពាល់​ជាមួយ​អ្នក​ភូមិ​ទេ។

ទាក់ទង​បញ្ហា​នេះ មន្ត្រី​ច្បាប់​សិទ្ធិ​លំនៅឋាន​លោក ណន អូនី ចាត់​ទុក​ថា វា​ជា​រឿង​ដែល​គួរ​ឲ្យ​សោកស្ដាយ ដែល​យន្តការ​ដោះស្រាយ​មិន​ទាន់​បាន​បង្ហាញ​ជា​លទ្ធផល​នៅ​ឡើយ​ផង ទន្ទឹម​គ្នា​នោះ ស្រាប់​តែ​គម្រោង​ស្ថាបនា​ផ្លូវ​ក៏​ចាប់​ផ្ដើម​ដំណើរការ​ដែរ។ លោក ណន អូនី មើល​ឃើញ​ថា គម្រោង​វិនិយោគ​នេះ គឺ​ពិត​ជា​បាន​រំលោភ​សិទ្ធិ​ជា​មូលដ្ឋាន​ទៅ​លើ​ម្ចាស់​អចលនទ្រព្យ ហើយ​សំណង​នោះ​ទៀត​សោត ក៏​ពុំ​បាន​ឃើញ​ដំណោះស្រាយ​ឲ្យ​បាន​សមរម្យ​ថែម​ទៀត៖ «សំណើ ​របស់​ប្រជាពលរដ្ឋ​នៅ​ផ្លូវ ៦​អា​ហ្នឹង គាត់​​សុំ​ឲ្យ​យក​លទ្ធផល​នៃ​ផល​ប៉ះពាល់​សិក្សា​ហ្នឹង​មក​បង្ហាញ​ជូន​សិន ជូន​ប្រជាពលរដ្ឋ។ បង្ហាញ​ទៅ​ថា តើ​កម្រិត​នៃ​ផល​ប៉ះពាល់​គម្រោង​ផ្លូវ ១០០​ម៉ែត្រ​ហ្នឹង តើ​មាន​ទំហំ​ប៉ុន្មាន»

ថ្វី​បើ​អាជ្ញាធរ​រាជធានី​ភ្នំពេញ បាន​អះអាង​ថា ការ​អភិវឌ្ឍ​ទីក្រុង​រណប​នេះ នឹង​មិន​ធ្វើ​ឲ្យ​ប្រជាពលរដ្ឋ​ខាតបង់ ផ្ទុយ​ទៅ​វិញ​ប្រជាពលរដ្ឋ​នឹង​រឹត​តែ​ចំណេញ​ពី​គម្រោង​នេះ​ក៏​ដោយ ក៏​អង្គការ​សង្គម​ស៊ីវិល​ដែល​ឃ្លាំមើល​​ការ​វិនិយោគ​នេះ ចាត់​ទុក​ថា រដ្ឋាភិបាល​នៅ​តែ​បន្ត​គាប​សង្កត់​ពលរដ្ឋ​របស់​ខ្លួន តាម​រយៈ​គម្រោង​អភិវឌ្ឍន៍​ដូច​នៅ​តំបន់​ផ្សេង​ទៀត​កន្លង​មក​ដដែល៕

Urban Voice Cambodia

Urban Voice Cambodia