ផ្លូវ​ល្បឿនលឿន ភ្នំពេញ-ព្រះសីហនុ នឹង​អាច​បើក​ការដ្ឋាន​​សាងសង់​នៅខែ​កុម្ភៈ​ខាងមុខនេះ
Posted On : January, 10, 2019 | By សំឡេងទីក្រុង

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី​ក្រសួង​សាធារណការ និង​ដឹកជញ្ជូន បាន​បង្ហាញ​ក្តី​រំពឹង​ថា ផ្លូវ​ល្បឿនលឿន ភ្នំពេញ-ព្រះសីហនុ នឹងអាច​បើក​ការដ្ឋាន​សាងសង់​នៅក្នុង​អំឡុងខែ​កុម្ភៈ ឬដើមខែ​មីនា ខាងមុខ​នេះ។ លោកថ្លែង​ដូច្នេះ ក្នុង​ពិធី​បើក​សន្និបាត​បូកសរុប​ការងារ​សាធារណការ និង​ដឹកជញ្ជូន​ឆ្នាំ​២០១៨ និង​ទិសដៅ​ការងារ​ឆ្នាំ​២០១៩ នៅ​ព្រឹកថ្ងៃទី​៩ ខែ​មករា ឆ្នាំ​២០១៩។

លោក​បន្ត​ថា គ្រឿងចក្រ​ដែល​មាន​តម្លៃ​ប្រមាណ ១០០លាន​ដុល្លារ នឹងត្រូវ​បញ្ជូន​មក​ដល់​កម្ពុជា នៅដំណាច់ខែ​មករា​ខាងមុខ​នេះ ឯ​អ្នក​បច្ចេកទេស-វិស្វកម្ម​ចិនប្រហែល​២០០​នាក់ បាន​មកដល់​ហើយ ដើម្បី​ត្រៀម​បើក​ការដ្ឋានផ្លូវ​ល្បឿនលឿន​នេះ។

តែទោះ​ជាយ៉ាងណា លោក​ទេសរដ្ឋមន្រ្តី​បញ្ជាក់​ថា ចំពោះ​គម្រោង​សាងសង់​ផ្លូវ​ល្បឿនលឿន​នេះ រដ្ឋាភិបាល​មិនទាន់​បាន​ដោះស្រាយ​ផល​ប៉ះពាល់​បញ្ហា​ដីធ្លី​រួចរាល់​នៅឡើយ ដោយ​ក្រសួង​សាធារណការ កំពុងតែ​រៀបចំ​ជំរុញ​ជាមួយ​ក្រសួង​សេដ្ឋកិច្ច និង​ហិរញ្ញវត្ថុ ដើម្បី​អាច​បើក​ការដ្ឋាន​បាន។

សូម​ជម្រាប​ថា ផ្លូវ​ល្បឿន​លឿន​នេះ គ្រោង​នឹង​ចំណាយ​ថវិកា​ប្រមាណ ១៩០០លាន​ដុល្លារ ដែល​សាងសង់​ដោយ​ក្រុមហ៊ុន​ចិន ក្រោម​រូបភាព​វិនិយោគ​សាងសង់-ធ្វើអាជីវកម្ម-ផ្ទេរ (BOT)។

គម្រោង​ផ្លូវ​ល្បឿនលឿន​នេះ ឆ្លងកាត់ ៤​រាជធានី​ខេត្ត រួមមាន រាជធានី​ភ្នំពេញ ខេត្ត​កណ្តាល ខេត្ត​កំពង់ស្ពី ខេត្ត​ព្រះសីហនុ ក្នុងនោះ​គឺ​ឆ្លងកាត់ ៦​ស្រុក ១​ខណ្ឌ ២​ក្រុង ៣១​ឃុំ/សង្កាត់ និង​១១០​ភូមិ។ ផ្លូវ​ល្បៀនលឿន​នេះ ក្រាល​​បេតុង​កៅស៊ូ AC មាន​ប្រវែង​សរុប​ជាង ១៩០​គីឡូម៉ែត្រ (គិតរួម​ទាំង​ស្ពាន និង​លូ​ទាំងអស់) ហើយមាន​ទទឹង​សរុប ២៤,៥​ម៉ែត្រ ក្នុងនោះ​មាន​គន្លង​ផ្លូវ​រថយន្ត (២x៣,៧៥​ម៉ែត្រ) សងខាង ជាយផ្លូវ​កៅស៊ូ​២ (២x២,៥ម៉ែត្រ) សម្រាប់​ម៉ូតូ ជាយ​ផ្លូវ​ដីក្រហម ២(២x០,៧៥) សម្រាប់​ថ្មើរជើង និង​សួន​នៅ​អ័ក្ស​កណ្តាល​ទ្រូងផ្លូវ ៣​ម៉ែត្រ ព្រម​ទាំង​មាន​ស្ពាន ៨៩​កន្លែង។

ផ្លូវ​នេះ​មាន​កន្លែង​សម្រាប់​ឈប់​សម្រាក​ចំនួន​៤​កន្លែង និង​ស្ថានីយ​ប្រេង​ឥន្ធនៈ ៣​កន្លែង។ ផ្លូវនេះ​ក៏មាន​របង​អម​តាម​សងខាង​ផ្លូវនោះ​ដើម្បី​ការពារ​សត្វ​ពាហនៈ​ឆ្លងកាត់ និង​របាំង​ការពារ​សំឡេង​រំខាន​ សរុប​ប្រហែល​៥៧,១៩​គីឡូម៉ែត្រ ព្រមទាំង​មាន​កន្លែង​មនុស្ស និង​សត្វ​ព្រៃ​ឆ្លងកាត់​ចំនូន ៣៥២​កន្លែង​ផងដែរ៕

ប្រភព៖ ខ្លីខ្លី

Urban Voice Cambodia

Urban Voice Cambodia