បញ្ហា​កក​ស្ទះ​និង​ការ​មិន​គោរព​ច្បាប់​ចរាចរណ៍
Posted On : January, 13, 2015 | By សំឡេងទីក្រុង

www.postkhmer.com, Mon, 12 January 2015

បញ្ហា​ការ​កក​ស្ទះ​ចរាចរណ៍​ជា​បញ្ហា​មួយ​ក្នុង​ចំណោម​បញ្ហា​ជា​ច្រើន​ដែល ​កើត​ឡើង​ជា​រាង​រាល់​ថ្ងៃ។ បញ្ហា​ស្ទះ​ចរាចរណ៍​វា​ជា​បញ្ហា​ដែល​ធ្វើ​ឲ្យ​អ្នក​បញ្ជា​យាន​យន្ដ​គ្រប់​ ប្រភេទ​តែង​តែ​មាន​អារម្មណ៍​មិន​ល្អ​ពេល​ជួប​បញ្ហា​នេះ​កើត​ឡើង​ម្ដងៗ។

យើង​សង្កេត​ឃើញ​ថា ​បញ្ហា​នេះ​កើត​​ឡើង​ក្នុង​ទី​ក្រុង​ភ្នំពេញ​ជា​ពិសេស​ពេល​ព្រឹក​និង​ល្ងាច​ ព្រោះ​ថា​ ពេល​នោះ​ជា​ពេល​ដែល​សិស្ស​ និស្សិត ​គ្រូបង្រៀន​មន្រ្តី​រាជ​ការ​ បុគ្គលិក​ការ​ងារ​ពេល​ចាក​ចេញ​ទៅ​ធ្វើ​ការ​និង​ត្រឡប់​មក​ផ្ទះ​វិញ។ ​តើ​បញ្ហា​ដែល​បណ្ដាល​ឲ្យ​​មាន​ការ​កក​ស្ទះ​នេះ​មក​ពី​មូល​ហេតុ​អី្វ?

យើង​មិន​បាច់​ទៅ​មើល​ឯ​ណា​ឆ្ងាយ​នោះ​ទេ​គ្រាន់​តែ​យើង​ក្រឡេក​មើល​នៅ​តាម ​ដង​ផ្លូវ​ក៏​យើង​ឃើញ​មាន​ហាង​បាយ​គុយ​ទាវ​កាហ្វេ​ផ្សារ​ទំនើបៗ​មួយ​ចំនួន​ មិន​មាន​កន្លែង​ចត​សម្រាប់​ឲ្យ​អតិថិជន​របស់​គេ​ចត​បាន​ត្រឹម​ត្រូវ​នោះ​ទេ។ ​ កន្លែង​ខ្លះ​យើង​សង្កេត​ឃើញ​ថា​ គេ​យក​ផ្លូវ​សាធារណៈ​សម្រាប់​ធ្វើ​អាជីវកម្ម​ទៀត​ផង។ ​ពេល​ខ្លះ​យើង​ឃើញ​ថា​ គេ​ចត​រថយន្ត​ពី​ពីរ​ទៅ​បី​ជួរ​ក៏​មាន។ ក្នុង​នោះ​យើង​សង្កេត​ឃើញ​មាន​រថ​យន្ត​ទំនើបៗ​ក៏​បាន​ចូល​រួម​ចត​នឹង​គេ​ដែរ ​ (អាច​មាន​រថយន្ត​អ្នក​ចេះ​ច្បាប់​ផង​ក៏​មិន​ដឹង)។ តើ​នេះ​មិន​ជា​បញ្ហា​ដែល​បណ្តាល​​ឲ្យ​​មាន​ការ​កកស្ទះ​ទេ​ឬ​?

បើ​និយាយ​ពីការ​លក់​ដូរ​របស់​របរ​នៅ​តាម​ផ្ទះ​វិញ​ភាគ​ច្រើន​គេ​ដាក់​ តាំង​អី​វ៉ាន់​របស់​ពួក​គេ​លយ​ដល់​ផ្លូវ​អ្នក​ដំណើរ​ថ្មើរ​ជើង​សម្រាប់​ធ្វើ ​ដំណើរ។ កត្តា​បែប​នេះ​ឲ្យ​​អ្នក​ដំណើរ​មិន​មាន​ផ្លូវ​សម្រាប់​ធ្វើ​ដំណើរ​បាន​គ្រប់ ​គ្រាន់​ធ្វើ​ឲ្យ​ពួក​គេ​សម្រេច​ចិត្ត​ដើរ​លើ​ផ្លូវ​សម្រាប់​រថយន្ត​គ្រប់​ ប្រភេទ​ធ្វើ​ចរាចរណ៍​ទៅ​វិញ។ តើ​អ្នក​គិត​ថា​វា​អាច​បង្កគ្រោះ​​ថ្នាក់​ដល់​ពួក​គេ​ដែរ​ឬ​ទេ​?

បើ​និយាយ​អំពី​ការ​មិន​គោរព​ច្បាប់​ចរាចរណ៍​វិញ​យើង​តែង​តែ​ឃើញ​ជា​ញឹក​ ញយ​ជា​រាង​រាល់​ថ្ងៃ​។ ក្នុង​នោះ​ការ​ប្រព្រឹត្ត​បទ​ល្មើស​ចរាចរណ៍​ភាគ​ច្រើន​បង្ក​ឡើង​ដោយ​ក្រុម​ យុវវ័យ​មួយ​ចំនួន​និង​ពេល​ខ្លះ​យើង​សង្កេត​ឃើញ​ថា មាន​មន្រ្ដី​នគរបាល​ចរាចរណ៍​ខ្លួន​ឯង​ផ្ទាល់​ក៏មិន​បាន​គោរព​ច្បាប់​ផង​ដែរ។ ការ​មិន​គោរព​ច្បាប់​ទាំង​នោះ​យើង​តែ​សង្កេត​ឃើញ​មាន​នៅ​ក្រោម​រូប​ភាព​មួយ​ ចំនួន​ដូច​ជា​ការ​មិន​គោរព​ស្លាក​សញ្ញា​ចរាច​រណ៍ ការ​មិន​គោរព​ភ្លើង​សញ្ញា​ចរាចរណ៍ ការ​បើក​បរ​ក្នុង​ល្បឿន​លឿន និង​ការ​បើក​បរ​ក្រោម​ឥទ្ធិពល​គ្រឿង​ស្រវឹង​។ល។​ កត្តា​ទាំង​នេះ​ហើយ​ដែល​ធ្វើ​ឲ្យ​​បញ្ហា​គ្រោះ​ថា្នក់​ចរាចរ​ណ៍​តែង​តែ​កើត​ ជា​រៀង​រាល់​ថ្ងៃ​ ដែល​បាន​បង្ក​ឲ្យ​មាន​ការ​បាត់​បង់​អាយុ​ជីវិត​ របួស​និង​បង្កឲ្យ​​ខូច​ខាត​សម្បត្តិ​រដ្ឋ​និង​ឯកជន​ជា​ច្រើន។

បើ​យោង​តាម​ការ​សិក្សា​របស់​ក្រុម​អ្នក​ជំនាញ​ខាង​ចរាចរណ៍ឲ្យ​ដឹង​ថា នៅ​កម្ពុជា គ្រោះ​ថ្នាក់​ចរាចរណ៍​បាន​​សម្លាប់​មនុស្ស​យ៉ាង​ហោច​ណាស់​ ៥ ​នាក់​ក្នុង​មួយ​ថ្ងៃ ធ្វើ​ឲ្យ​របួស ជាង ៥០០០ នាក់​ក្នុង​មួយ​ឆ្នាំ និង​បាន​បង្ក​ការ​ខូចខាត​សេដ្ឋកិច្ច​ជាតិ​ជាង ៣០០ លាន​ដុល្លារ​​ជា​រៀង​រាល់​ឆ្នាំ។ គឺ​ជា​តួលេខ​អ្នក​ស្លាប់​ដ៏​ខ្ពស់​បំផុត​គឺ​ខ្ពស់​ជាង​អ្នក​ស្លាប់​ដោយ​ គ្រាប់​មីន​ឬ​ដោយ​ជំងឺអេដស៍​ដ៏​កាច​សាហាវ​ទៅ​ទៀត។

ជាង ៩០ ភាគរយ​នៃ​គ្រោះ​ថ្នាក់​ចរាចរណ៍​ត្រូវ​គេ​រក​ឃើញ​ថា​បណ្តាល​មក​ពី​កត្តា​ មនុស្ស ដូច​ជា ការ​បើកបរ​ដោយ​មិន​គោរព​ស្លាក​សញ្ញា​ចរាចរណ៍ មិន​គោរព​សិទ្ធិ​អាទិភាព បើកបរ​ក្នុង​ល្បឿន​លឿន​ហួស​ហេតុ និង​ការបើកបរ​ក្នុង​ស្ថាន​ភាព​ស្រវឹងជាដើម។ អ្នក​ទាំង​នោះ​ហើយ​ដែល​ជា​មុខ​ព្រួញ​ដែល​ត្រូវ​ជាប់​ទោស​និង​ត្រូវ​ផាក​ ពិន័យ​ធ្ងន់ធ្ងរ​ក្នុង​ច្បាប់​ចរាចរណ៍​ថ្មី​ ហើយ​ច្បាប់​ចរា​ចរណ៍​ថ្មី​ចូល​ជា​ធរមាន អ្នក​បើកបរ​ល្មើស​ច្បាប់​នឹង​ត្រូវ​ផ្តន្ទាទោស​យ៉ាង​ធ្ងន់ធ្ងរ​រាប់​ទាំង​ ទោស​ជាប់​ពន្ធនាគារ​និង​ការ​ផាក​ពិន័យ។

ជាក់​ស្តែង អ្នក​បើកបរ​ក្រោម​ឥទ្ធិពល​នៃ​គ្រឿង​ស្រវឹង​ដែលមាន​ជាតិ​អាល់​កុល​ចាប់​ពី ០,៤០ មិល្លី​ក្រាម​ក្នុង​មួយ​​លីត្រ​ខ្យល់​ឬ​ក៏​ចាប់​ពី ០,៨០ ក្រាម​ក្នុង​មួយ​លីត្រ​ឈាម​ឡើង​ទៅ នឹង​ត្រូវ​ផ្តន្ទា​ទោស​​ឲ្យ​ជាប់​ពន្ធនាគារ​ពីមួយ​ខែ​ដល់​ ៦ ខែ​និង​ផាក​ពិន័យ​ ចាប់​ពី​ ៨០ ​ម៉ឺន​រហូត​ដល់ ៤ លាន​រៀល។ ក្នុង​ករណី​បង្ក​គ្រោះ​ថ្នាក់​ដែល​បណ្តាល​ឲ្យ​មាន​មនុស្ស​របួស​ឬ​ស្លាប់ ទោ​ស​​​ជាប់​​ពន្ធនាគារ​អាច​កើន​ដល់ ៥ ឆ្នាំ រីឯ​ប្រាក់​ពិន័យ​អាច​ឡើង​ដល់ ២៥ លាន​រៀល​ឯ​ណោះ​។

ចំណែក​ឯ​មន្ត្រី​នគរ​បាល​ចរា​ចរណ៍​ក៏មាន​ចំណុច​ខ្វះ​ខាត​​មួយ​ចំនួន​ ក្នុង​ការ​អនុវត្ត​ច្បាប់​ ចរាចរណ៍ ដូច​ជា​​ការ​យក​លុយ​លើស​ពី​ចំនួន​ពិន័យ​ក្នុង​ច្បាប់​ និង​មិន​ចេញ​វិក្កយ​បត្រ​ជាដើម​។ ជាង​នេះ​ទៅ​ទៀត​គឺ​ការ​ធ្វើ​ឲ្យមាន​ការ​កក​ស្ទះ​ចរាចរណ៍​ផង​ដែរ។ ឧទាហរណ៍ ​នៅ​ពេល​មាន​ហែ​ពិធី​មង្គល​ការ​ ពិធី​បុណ្យ​សព​ ឬ​ក៏​ពិធី​ហែ​ក្បួន​ថ្នាក់​ដឹក​នាំ​ និង​គណៈ​ប្រតិ​ភូ​អន្តរ​ជាតិ​នានា​ គឺ​មន្ត្រី​​នគរបាល​ចរាចរណ៍​ គាត់​បាន​ជួយ​បិទ​ផ្លូវ​បាន​យ៉ាង​ល្អ តែ​ដល់​ក្បួន​ទាំង​នោះ​បាន​ហែផុត​ គឺ​បើក​ឲ្យ​អ្នក​ធ្វើ​ដំណើរ​ជិះ​ម៉ា​សេរី​​ច្រាស​ទិស​គ្នា​ស្ទះ​ពេញ​ផ្លូវ​ ពួក​គាត់​បាន​បំពេញ​តួ​នាទី​រួច​ហើយ​ មិន​ខ្វល់​ទេ​។

នេះ​ជា​​បញ្ហា​របស់​មន្ត្រី​នគរបាល​ចរាច​រណ៍​ ចុះ​មាន​អ្វី​ខ្លះ​ដែល​ចូល​រួម​ចំណែក​ធ្វើ​ឲ្យ​នគរបាល​ចរាចរណ៍​ពុករលួយ ​និង​ការ​កក​ស្ទះ​ចរាចរណ៍?

មិន​មែន​ឲ្យ​តែ​ការ​កក​ស្ទះ​ចរាចរណ៍ និង​ពុក​រលួយ គឺ​សុទ្ធ​តែ​មក​ពី​កំហុស​នគរបាល​ចរាចរណ៍​ទេ ​មាន​ការ​ចូល​រួម​ពី​​ស​កម្ម​ភាព​​ផ្សេង​ៗ​​ និង​អ្នក​បើក​បរ​ខ្លួន​ឯង​ផង​ដែរ។​ ​ដូច​យើង​ធ្លាប់​ឃើញ​ នៅ​រាជធានី​ភ្នំពេញ​ ផ្ទះ​សាង​សង់​លយ​ចូល​មក​ចិញ្ចើម​ថ្នល់​ខ្លាំង​​ពេក​ឡើង​អស់​ផ្លូវ​ដើរ​ ការ​លក់​ដូរ​ហៀរ​ចូល​មក​ថ្នល់ ​អ្នក​ចត​មក​ចូល​ថ្នល់​ ការ​សាង​សង់​រោង​ការ​ចូល​ថ្នល់​ ខ្លះ​បិទ​ផ្លូវ​ទៀត​ នេះ​ជា​សកម្មភាព​មួយ​ចំនួន​ដែល​ធ្វើ​ឲ្យ​មាន​​ការ​កកស្ទះ​ចរា​ចរណ៍ផង​​ដែរ​។

សរុប​មក​ដើម្បី​ដោះ​ស្រាយ​បញ្ហា​ការ​កក​ស្ទះ​និង​ការ​មិន​គោរព​ច្បាប់​ ចរាចរណ៍​ទាម​ទារឲ្យ​មាន​ប្រសិទ្ធ​ភាព​ ឲ្យ​​មាន​ការ​ចូល​រួម​កែ​លម្អគោរព​និង​អនុវត្ត​ច្បាប់​ពី​គ្រប់​មជ្ឈ​ដ្ឋាន​ ជា​ពិសេស​រដ្ឋាភិបាល​គ្រប់​ជាន់​ថា្នក់​ដែល​ពាក់​ព័ន្ធ​។ យើង​ត្រូវ​ចូល​រួម​ដោះ​ស្រាយ​ទាំង​អស់​គ្នា​ដើម្បី​ការ​ពារ​និង​ធានា​ឲ្យ​ បាន​នូវ​សេចក្ដី​សុខ​និង​សុវត្ថិ​ភាព​សម្រាប់​យើង​ទាំង​អស់​គ្នា៕

Urban Voice Cambodia

Urban Voice Cambodia