cam-photo-front-channa-3-800x533

បញ្ហា​កកស្ទះ​ចរាចរណ៍​រាល់ថ្ងៃ ធ្វើ​ឱ្យ​ការ​ចំណាយ​ពលរដ្ឋ​កើនឡើង

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

បញ្ហាកកស្ទះចរាចរណ៍ក្នុងរាជធានីភ្នំពេញរាល់ថ្ងៃកាន់តែស្មុគស្មាញឡើង និងធ្វើឲ្យអ្នកដំណើរគ្រប់មជ្ឈដ្ឋានកំពុងត្អូញត្អែរ និងធុញទ្រាន់គ្រប់គ្នា ។ ការកកស្ទះនេះ កំពុងតែជះឥទ្ធិពលយ៉ាងខ្លាំងដល់សុខភាពផ្លូវចិត្ត ពេលវេលា ផលិតភាពការងារ ពិសេសគឺការចំណាយរបស់ពលរដ្ឋកើនឡើងដោយមិនដឹងខ្លួន ។ ទោះបីយ៉ាងណា ក៏មានអ្នកទទួលផលពីការកកស្ទះចរាចរណ៍នេះផងដែរ ។

អ្នករកស៊ីដឹកទឹកកកម្នាក់បានឲ្យដឹងកាលពីថ្ងៃទី៥ តុលា ថា បញ្ហាស្ទះចរាចរណ៍ គឺបង្កមកពីអ្នកប្រើប្រាស់ផ្លូវថ្នល់មិនបានគោរពច្បាប់ចរាចរណ៍ គឺពួកគេបើកប្រជែងគ្នាដើម្បីបានទៅមុនរៀងៗខ្លួន ដោយមិនខ្វល់ពីអ្នករួមដំណើរជាមួយគ្នាទេ ដែលជាហេតុធ្វើឲ្យយើងខាតបង់ទាំងពេលវេលា និងថវិកា ។

លោក ស៊ុន គង់ អ្នកបើករថយន្ដដឹកទឹកកករូបនេះបន្ដថា ៖« ពេលមានការកកស្ទះម្ដងៗ គឺខាតទាំងអស់ ទាំងពេលវេលា និងលុយ ។ ដូចយើងអ្នកធ្វើការអីចឹង បើទៅធ្វើការយឺត ដឹងតែត្រូវមាត់ហើយ ។ ចំណែកខ្ញុំជាអ្នកលក់ទឹកកក បើនៅជាប់គាំង គឺដឹងតែខាតបង់ច្រើនហើយ ព្រោះទឹកកកវារលាយ » ។

លោកបានបន្ថែមថា ផ្លូវភាគច្រើនដែលកកស្ទះជាងគេ គឺផ្លូវដែលមានអ្នកលក់ដូរនៅជាប់ផ្សារ ឬភោជនីយដ្ឋាន ការយកចិញ្ចើមផ្លូវលក់ទំនិញ ជាពិសេស តំបន់ដែលមានរោងចក្រ ហើយរាល់ថ្ងៃ បើយើងគោរពច្បាប់ត្រឹមត្រូវតែឯង តែអ្នកដទៃមិនគោរពនោះ គឺបើកអត់ទៅមុខទេ ។ ដូច្នេះ មានតែបង្ខំចិត្តទៅតាមលំហូរចរាចរណ៍អីចឹងទៅ ។
ចំណែកលោក ហ៊ុង វិចិត្រ បុគ្គលិកនៅក្រុមហ៊ុនដាយរិកសិន អ៊ែតវើថាយស៊ីង ខូអិលធីឌី បានត្អូញត្អែរ និងមិនពេញចិត្តពេលដែលមានបញ្ហាកកស្ទះម្ដងៗ សូម្បីតែកន្លែងដែលមានភ្លើងស្តុប និងសញ្ញាចរាចរណ៍ក៏ដោយ ក៏នៅតែបំពានទៀត ។

លោកថា ៖« ខ្ញុំមិនពេញចិត្តទាល់តែសោះដែលអ្នកបើកបរមិនគោរពគ្នាអីចឹង ។ អ្នកណាក៏គេប្រញាប់ដែរ តែសូមមេត្តាឲ្យចេះគោរពច្បាប់ផង» ។ លោកបានបន្ថែមថា បើអ្នកបើកបរទាំងឡាយចេះគោរពច្បាប់ ស្គាល់ពីច្បាប់ត្រឹមត្រូវ កុំប្រញាប់ប្រញាល់ ហើយចេះយោគយល់ដល់អ្នកបើកបរដូចគ្នានោះ បញ្ហាកកស្ទះក៏អាចជួយកាត់បន្ថយបាន៥០%ដែរ ។

បើតាមអ្នករត់តាក់ស៊ីពីខេត្តកំពត-ភ្នំពេញ លោក លី សារ៉ាក់ បានលើកឡើងពីបញ្ហាកកស្ទះនៅតាមផ្លូវរាជធានីភ្នំពេញ គឺមានស្ទើរគ្រប់ផ្លូវទាំងអស់ ។

លោកប្រាប់ថា ៖« សឹងតែគ្រប់ផ្លូវទាំងអស់ដែលមានការកកស្ទះ ដោយសារតែអ្នកបើកបរមិនគោរពច្បាប់ ។ អ្នកខ្លះប្រញាប់ពេកក៏បើកបញ្ច្រាសផ្លូវក៏មាន ឯមួយចំនួនទៀតដែលមានរថយន្ដទំនើបៗ គឺបើកមិនខ្វល់ពីអ្នកណាទាំងអស់ សូម្បីតែមានសមត្ថកិច្ចនៅចាំសម្រួលក៏ដោយ ។ អីចឹងហើយ វាធ្វើឲ្យខ្ញុំដែលជាអ្នកដឹកភ្ញៀវ និងអីវ៉ាន់ គឺតែងតែរងការត្រូវមាត់ជាញឹកញាប់ ហើយការចំណាយថ្លៃប្រេងឥន្ធនៈក៏កើនឡើងដែរ » ។

ពាក់ព័ន្ធនឹងបញ្ហានេះដែរ លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍  នៃក្រុមហ៊ុន Emerging Market Consuting បានប្រាប់នៅថ្ងៃដដែលនេះថា ៖« បញ្ហាកកស្ទះចរាចរណ៍នេះ វាធ្វើឲ្យប៉ះទង្គិចផ្លូវចិត្ត ប៉ះពាល់ដល់ផលិតភាពការងារ គឺគាត់មិនបានធ្វើការគ្រប់ម៉ោងឡើយ ជាពិសេស ខាតបង់លុយកាក់ ដោយសារតែពេលកកស្ទះម្ដងៗ អ្នកបើកបរគាត់ត្រូវការបញ្ឆេះឡាន ឬម៉ូតូចោលរយៈពេលយូរ ទម្រាំតែបានចេញដំណើរ ។ អីចឹងហើយធ្វើឲ្យសាំង ឬម៉ាសូត ត្រូវចំណាយច្រើនទៅលើការបើកបរនោះ » ។

លោក ង៉ែត ជូ បានបន្ថែមទៀតថា ៖ «ឥឡូវ អ្នកដែលគាត់ធូរធារ គឺមានរថយន្ដស្ទើរគ្រប់គ្នា ហើយពេលគាត់ធ្វើដំណើរម្ដងៗ រថយន្ដមួយគាត់ជិះតែម្នាក់ឯង ហើយផ្លូវយើងមួយចំនួនដែលមានតាំងពីសម័យសង្គមរាស្ត្រនិយមមកគឺតូច ព្រោះពីមុន ផ្លូវទាំងនោះធ្វើសម្រាប់តែរទេះគោ ឬរទេះសេះ ដោយមិនបានគិតថា ធ្វើតម្រូវសម្រាប់ថ្ងៃខាងមុខឡើយ » ។

លោកក៏បានផ្ដល់ជាអនុសាសន៍ថា អាជ្ញាធរមុននឹងធ្វើផ្លូវ សូមសិក្សាលទ្ធភាពពីតំបន់មួយទៅតំបន់មួយឲ្យបានច្បាស់លាស់ និងសូមបង្កើតក្រុងថ្មី ដោយពង្រីកផ្លូវ ធ្វើស្ពាន ដាក់លូ និងធ្វើប្រឡាយតាមផ្លូវនីមួយៗបន្ថែមទៀតដើម្បីការពារការកកស្ទះ ព្រោះពេលមានភ្លៀងធ្លាក់ម្ដងៗបញ្ហាកកស្ទះចរាចរណ៍ គឺមានច្រើនស្ទើរគ្រប់តំបន់នៅរាជធានីភ្នំពេញ ។

ចំណែកអ្នកវិភាគសេដ្ឋកិច្ចមួយរូបនៅក្នុងប្រទេសកម្ពុជា កន្លងមកបានលើកឡើងថា បញ្ហាកកស្ទះចរាចរណ៍សព្វថ្ងៃនៅក្នុងក្រុងភ្នំពេញ បណ្ដាលឲ្យមានការខាតបង់ជាច្រើន តែទន្ទឹមនឹងនេះ ក៏មានអ្នកចំណេញពីការកកស្ទះចរាចរណ៍នេះដែរ ។

លោក ច័ន្ទ សុផល ក៏បានលើកឡើងពីការខាតបង់បណ្ដាលមកពីការកកស្ទះចរាចរណ៍ដូចជា ចំណាយច្រើនលើប្រេងឥន្ធនៈ, ខាតពេលវេលា, ខាតការងារ និងយឺតយ៉ាវប្រតិបត្តិការធុរកិច្ច, ខកខានកិច្ចប្រជុំ ឬលុបចោលការណាត់ដែលជារឿងសំខាន់, ខូចអារម្មណ៍ មួម៉ៅ ស្ត្រេស (បណ្ដាលឲ្យប៉ះពាល់សុខភាព), ការបំពុលបរិយាកាសដោយឧស្ម័នកាបូនិកកាន់តែច្រើន, ការចំណាយលើថ្នាំ និងថែទាំសុខភាពជាដើម ។

សម្រាប់ផលចំណេញ និងអ្នកដែលចំណេញពីការកកស្ទះចរាចរណ៍នោះ លោក ច័ន្ទ សុផល លើកឡើងថា អ្នកចំណេញពីការកកស្ទះមានដូចជា អ្នកលក់ប្រេងឥន្ធនៈ ក្រុមហ៊ុននាំចូលប្រេងឥន្ធនៈ ដែលធ្វើឲ្យរាជរដ្ឋាភិបាលចំណេញទៅលើពន្ធពីការនាំចូលប្រេងឥន្ធនៈ, អ្នកលក់ថ្នាំពេទ្យ និងគ្រូពេទ្យ ដោយសារតែជំងឺផ្សេងៗទាក់ទងនឹងផ្លូវដង្ហើម និងអារម្មណ៍ ហើយក្រុមហ៊ុននាំចូល ឬផលិតថ្នាំពេទ្យ ក៏ទទួលផលចំណេញពីការកកស្ទះនេះដែរ ។

ប៉ុន្តែបើប្រៀបធៀបពីផលចំណេញ និងការខាតបង់វិញឃើញថា ការខាតបង់មានច្រើនណាស់ ។ ដូចនេះ ទាំងរាជរដ្ឋាភិបាល និងប្រជាពលរដ្ឋផ្ទាល់ត្រូវតែចូលរួមដើម្បីកាត់បន្ថយបញ្ហាកកស្ទះចរាចរណ៍ដូចរាល់ថ្ងៃនេះ ។

លោក ច័ន្ទ សុផល បានផ្ដល់ជាមតិយោបល់មួយចំនួនផងដែរទាក់ទងនឹងដំណោះស្រាយ ក្រៅពីការពង្រីកផ្លូវ និងសង់ស្ពានអាកាស ឲ្យបានច្រើនតាមលទ្ធភាពដូចជា ៖

១-ដាក់នគរបាលចរាចរណ៍ដើម្បីសម្រួលចរាចរណ៍ឲ្យបានទៀងទាត់នៅតាមចំណុចដែលមានការកកស្ទះខ្លាំង ។
២-ដាក់ភ្លើងស្តុបនៅកន្លែងចាំបាច់ ហើយបំពាក់ប្រព័ន្ធពន្លឺព្រះអាទិត្យសម្រាប់ភ្លើងស្តុប ដែលងាយដាច់ភ្លើង ។
៣-សិក្សា និងកំណត់ទិសចរាចរណ៍តែមួយសម្រាប់ផ្លូវមួយចំនួន ។
៤-ជួសជុលផ្លូវត្រូវសម្រុកធ្វើនៅពេលយប់ ដើម្បីកុំឲ្យប៉ះពាល់ដល់ការធ្វើដំណើររបស់ពលរដ្ឋ ។
៥-គ្រប់គ្រងកន្លែងដាក់ និងយកកុមារនៅសាលារៀន ដែលនាំឲ្យកកស្ទះ ។
៦-ចៀសវាងការបិទផ្លូវសម្រាប់ពិធីផ្សេងៗ។
៧-បញ្ចៀសការចេញរថភ្លើងនៅម៉ោងរវល់ខ្លាំងពេលព្រឹក និងពេលរសៀល ដែលអាចឲ្យស្ទះចរាចរណ៍កាន់តែខ្លាំង ៕

ប្រភព៖ kohsantepheapdaily.com.kh

Leave a Reply