តម្លៃ​ពិត​ដាក់​លក់​អចលនទ្រព្យ​ បច្ចុប្បន្ន​នេះ ​មិន​ឆ្លុះ​បញ្ចាំង​អំពី​តម្លៃ​ពិត​នៃ​ទីផ្សារ​ទេ
Posted On : កក្កដា, 21, 2016 | By សំឡេងទីក្រុង

ប្រភព៖ ភ្នំពេញប៉ុស្តិ៍ុ, ដោយ៖ ស៊ីវ ម៉េង

«ខ្ញុំមានប្រាក់ខែ ២០០ ដុល្លារសន្សំបាន ៥០ ដុល្លារក្នុងមួយខែ ដើម្បីទិញផ្ទះល្វែងមួយដែលមានតម្លៃ ៧០ ០០០ ដុល្លារក្នុងមួយល្វែង ខ្ញុំសន្សំរយៈពេល ១១៧ ឆ្នាំទៀត។ ជយោ ១១៧ ឆ្នាំទៀត ខ្ញុំទិញផ្ទះល្វែងបានហើយ»។

នេះគឺជាសារចំអកមួយ (Troll) ដែលត្រូវបានមនុស្សមួយចំនួនបង្ហោះតៗគ្នានៅលើបណ្តាញទំនាក់ទំនងសង្គម ហ្វេសប៊ុក កាលពីសប្តាហ៍មុននេះ ស្របពេលតម្លៃអចលនទ្រព្យបាននិងកំពុងឡើងថ្លៃដល់កំពូលនៅក្នុងប្រទេសនេះ។

កំណើនតម្លៃអចលនទ្រព្យនាពេលនេះបានធ្វើឲ្យមានមតិខុសៗគ្នាទាក់ទងនឹងគុណសម្បត្តិនិងគុណវិបត្តិនៅក្នុងវិស័យនេះ។

លោក នូវ ស៊ីវុត្ថា បុគ្គលិកបម្រើការងារនៅក្រុមហ៊ុនឯកជនមួយ ដោយលោកបដិសេធមិនបញ្ចេញឈ្មោះស្ថាប័នដែលលោកធ្វើការបានថ្លែងឲ្យដឹងកាលពីថ្ងៃអង្គារថា លោកមានការព្រួយបារម្ភពីអនាគតដោយសារប្រាក់ចំណូលដែលលោករកបានប្រចាំខែមិនសមមូលជាមួយនឹងកម្រិតនៃការកើនឡើងនៃតម្លៃអចលនទ្រព្យនៅទីក្រុងភ្នំពេញ ព្រោះបើគិតពីជីវភាពលោកជាអ្នកធ្វើការ និងចំណូលដែលទទួលបានពិតជាមិនអាចសន្សំប្រាក់ទិញផ្ទះបានទេក្នុងរយៈពេលពី១០ ទៅ២០ឆ្នាំខាងមុខ។

លោកបន្តថា ៖ «ខ្ញុំបារម្ភ។ មិនឲ្យបារម្ភយ៉ាងម៉េច ព្រោះបើចង់ទិញផ្ទះល្វែងតម្លៃចាប់ពី៣ ទៅ៤ម៉ឺនដុល្លារ ខ្ញុំពិតជាមិនអាចមានលទ្ធភាពទិញបាននោះទេ»។

យុវជនដែលមានប្រាក់ចំណូលប្រចាំខែ៤០០ដុល្លាររូបនេះ បានបន្តថា ទីផ្សារសេរីពិតមែន តែវាប៉ះពាល់ដល់ប្រជាពលរដ្ឋដែលមានប្រាក់ចំណូលទាប និងមធ្យម ព្រោះតម្លៃលំនៅឋាន បច្ចុប្បន្ននេះមានតម្លៃខ្ពស់ណាស់ ធៀបនឹងប្រាក់ចំណូលប្រចាំខែរបស់លោក។

លោកបន្តថា បើសិនជាយើងត្រូវការទិញលំនៅឋានបង់រំលស់ក៏ត្រូវមានប្រាក់ជាង១ម៉ឺនដុល្លារ និងត្រូវបង់ប្រចាំខែពី ៣០០ ទៅ ៤០០ ដុល្លារក្នុងមួយខែដែរ ប៉ុន្តែបើមានប្តីប្រពន្ធ ហើយបូកចំណូលចូលគ្នាបាន ៨០០ ដុល្លារក្នុងមួយខែក៏ពិបាករស់នៅបានសមរម្យដែរ ព្រោះតម្រូវការប្រចាំថ្ងៃតម្លៃទំនិញលើទីផ្សារថ្លៃណាស់នាពេលសព្វថ្ងៃនេះ។

លោកបន្តថា ៖ «ប្រសិនជារដ្ឋាភិបាលមានគោលនយោបាយជួយអភិវឌ្ឍលំនៅឋានដែលមានតម្លៃពី២ ទៅ៣ម៉ឺនដុល្លារ ទើបអ្នកមានជីវភាពកម្រិតក្រោមមធ្យម និងកម្រិតមធ្យមអាចមានលទ្ធភាពទិញផ្ទះបាន ប៉ុន្តែនៅតែជាការទិញបង់រំលស់ដដែលមិនអាចទិញផ្តាច់បាននោះទេ»។

លោកបន្តថា ៖ «ថ្មីៗនេះឮថា មានក្រុមហ៊ុនមួយគ្រោងសាងសង់លំនៅឋានលក់ជូនអ្នកមានចំណូលទាប និងមធ្យម ប៉ុន្តែគម្រោងនោះមានទីតាំងនៅឆ្ងាយពីទីក្រុងក៏លំបាកក្នុងការរស់នៅ ព្រោះត្រូវធ្វើដំណើរឆ្ងាយចូលមកទីក្រុងដើម្បីធ្វើការងារផងដែរ»។

អ្នកវិនិយោគក្នុងស្រុកដូចជា លោក ទុយ ប៊ុន ភាគហ៊ុនិកក្រុមហ៊ុនលំនៅឋាន L កម្ពុជាភ្នំពេញបានថ្លែងថា គម្រោងខុនដូរបស់លោកបានផ្តោតសំខាន់លើប្រជាពលរដ្ឋក្នុងស្រុក ជាក់ស្តែងអតិថិជនមកទិញគម្រោងរបស់លោក ជាង៨០ភាគរយជាជនជាតិខ្មែរ ដែលពួកគេភាគច្រើនជាមនុស្សវ័យ ៣០ ឆ្នាំឡើង។ ខុនដូក្នុងគម្រោង L មានតម្លៃទាបដោយលក់ក្នុងតម្លៃ ១ ០០០ ទៅ ១ ១០០ ដុល្លារក្នុងមួយម៉ែត្រការ៉េ ដូច្នេះប្រសិនជាខុនដូមានទំហំ ៤០ ម៉ែត្រការ៉េមានតម្លៃត្រឹម ៤០ ០០០ ដុល្លារប៉ុណ្ណោះ។

លោកឧកញ៉ា សៀ រិទ្ធី អគ្គនាយកក្រុមហ៊ុន World Bridge Land ដែលបាននិងកំពុងវិនិយោគគម្រោងខុនដូធំៗជាច្រើន និងគ្រោងសាងសង់លំនៅឋានសម្រាប់អ្នកមានប្រាក់ចំណូលមធ្យម និងក្រោមមធ្យមនៅរាជធានីភ្នំពេញ បានថ្លែងថា ការឡើងថ្លៃអចលនទ្រព្យ មានចំណុចល្អ និងមិនល្អ។ ចំណុចល្អនៅត្រង់ថា រដ្ឋាភិបាលបានបើកទូលាយឲ្យអ្នកវិនិយោគអាចសាងសង់អគារខ្ពស់ៗបាន ដែលធ្វើឲ្យតម្លៃសំណង់ធូរថ្លៃទៅតាមកម្រិតជាក់ស្តែង និងចំណុចមិនល្អ គឺវាអាចធ្វើឲ្យវិស័យនេះក្លាយជាពពុះសាប៊ូ។

លោកបន្តថា បើគិតពីតម្លៃអចលនទ្រព្យជាមួយកម្រិតចំណូលរបស់ប្រជាពលរដ្ឋ និងសេដ្ឋកិច្ច វាទាក់ទងជាមួយកម្រិតចំណូលរបស់ប្រជាពលរដ្ឋ និងធនាគារ បើរដ្ឋាភិបាលបើកទូលាយដល់វិស័យធនាគារ វានឹងធ្វើឲ្យវិស័យអចលនទ្រព្យមានភាពរីកចម្រើន។

លោកបន្តថា ៖ «ទោះជាយ៉ាងណារហូតមកទល់ពេលនេះ ខ្ញុំគិតថាតម្លៃអចលនទ្រព្យនៅកម្ពុជាមិនទាន់ឡើងដូចពពុះសាប៊ូទេ។ វាមិនទាន់ឈានដល់តម្លៃពពុះសាប៊ូទេ»។

លោកបន្តថា ៖ «មានការដាក់តម្លៃអចលនទ្រព្យនៅតំបន់បឹងកេងកង១ តាមមហាវិថីព្រះនរោត្តម មួយម៉ែត្រការ៉េតម្លៃ៥០០០ដុល្លារ ប៉ុន្តែតម្លៃទិញ-លក់ពិតប្រាកដមិនស្ថិតក្នុងតម្លៃនេះទេ»។

ទោះជាយ៉ាងណាលោក ប៉ូ អ៊ាវគង់ ប្រធានគ្រប់គ្រងទូទៅនៃក្រុមហ៊ុន Focus Property បានថ្លែងថា ជាសេណារីយោបច្ចុប្បន្ន អ្នកលក់អចលនទ្រព្យភាគច្រើនលើសលប់ដាក់លក់តម្លៃអចលនទ្រព្យរបស់ខ្លួនមិនឆ្លុះបញ្ចាំងតម្លៃពិតប្រាកដនៅក្នុងទីផ្សារនោះទេ វាមិនស្របតាមបទដ្ឋានបច្ចេកទេសនៃការវាយតម្លៃឡើយដោយសារអ្នកដាក់លក់អចលនទ្រព្យមិនបានប្រឹក្សាយោបល់ជាមួយក្រុមហ៊ុនជំនាញ និងដោយសារមានភ្នាក់ងារអចលនទ្រព្យមិនស្របច្បាប់ជាច្រើនពួកគេបានទាក់ទងទៅម្ចាស់អចលនទ្រព្យពេលមានគេទាក់ទងច្រើនម្ចាស់អចលនទ្រព្យបានទាមទារតម្លៃលើសតម្លៃទីផ្សារជាក់ស្តែងទ្វេដង។

ជាក់ស្តែងនៅតំបន់អភិវឌ្ឍន៍ផ្សារទំនើប AEON2 នៅភាគខាងជើងទីក្រុងរណបកាំកូ មុនពេលប្រកាសគម្រោងផ្សារទំនើបនេះ កាលពីចុងឆ្នាំ២០១៤ តម្លៃដីធំៗនៅតំបន់នោះមានតម្លៃចន្លោះពី ២០០ ទៅ ៣០០ដុល្លារ ប៉ុន្តែក្រោយ ពេលប្រកាសគម្រោងផ្សារទំនើប AEON2 មក ម្ចាស់ដីនៅតំបន់នោះបានទាមទារតម្លៃដីរបស់ពួកគេចន្លោះពី ៦០០ ទៅ ៧០០ ដុល្លារក្នុងមួយម៉ែត្រការ៉េ។

លោកបន្តថា ៖ «ការដាក់(លក់) តម្លៃអចលនទ្រព្យបែបនេះ បានធ្វើឲ្យអ្នកវិនិយោគមានការព្រួយបារម្ភ ដោយសារកំណត់តម្លៃអចលនទ្រព្យ មិនកំណត់តាមតម្លៃទីផ្សារជាក់ស្តែង»។

លោកបន្តថា ៖ «អ្នកលក់អចលនទ្រព្យមួយចំនួនពួកគេលក់តាមចំណង់ចង់បានរបស់ពួកគេ គាត់មិនចង់បង្ហាញឥរិយាបថចង់លក់ ឬចង់ទិញពិតប្រាកដឡើយ ដែលជាការធ្វើឲ្យប៉ះពាល់ដល់ទំនុកចិត្តអ្នកវិនិយោគ»។

តើរដ្ឋាភិបាលគួរអន្តរាគមន៍យ៉ាងដូចម្តេចចំពោះបញ្ហានេះ លោក ប៉ូ អ៊ាវគង់ បានថ្លែងថា រដ្ឋាភិបាលពិបាកក្នុងការលូកដៃចូលក្នុងបញ្ហានេះ ដោយសាររដ្ឋាភិបាលមិនទាន់មានបទដ្ឋានច្បាប់ គតិយុត្តសម្រាប់ធ្វើការងារនេះនៅឡើយ ប៉ុន្តែបើដូចនៅប្រទេសសិង្ហបុរី គេមានច្បាប់ទាក់ទងនឹងបញ្ហានេះដែលរដ្ឋាភិបាលសិង្ហបុរី កំណត់ឲ្យអ្នកដាក់លក់អចលនទ្រព្យត្រូវតែប្រើប្រាស់សេវាក្រុមហ៊ុនវាយតម្លៃអចលនទ្រព្យ មានជំនាញច្បាស់លាស់ ហើយបើអ្នកលក់ចង់លក់មិនឆ្លងកាត់ក្រុមហ៊ុនជំនាញ ពួកគេក៏ត្រូវបង់ពន្ធលើសេវាកម្មរបស់ពួកគេដល់អ្នកជំនាញអចលនទ្រព្យដែរធ្វើដូច្នេះចង់មិនចង់អ្នកដាក់លក់អចលនទ្រព្យត្រូវតែស្វែងរកការប្រឹក្សាយោបល់ពីក្រុមហ៊ុនជំនាញ។

លោក អ៊ាវគង់ បន្តថា ៖ «ការធ្វើការងាររបស់អ្នកជំនាញនៅកម្ពុជានាបច្ចុប្បន្ននេះ ធ្វើតាមទម្លាប់តែប៉ុណ្ណោះ ទើបយើងមិនអាចគ្រប់គ្រងទិន្នន័យនៃការទិញលក់បានពិតប្រាកដ»។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងថា បច្ចុប្បន្នពិបាករកតម្លៃពិតនៃអចលនទ្រព្យណាស់ ដោយសារអ្នកដាក់លក់អចលនទ្រព្យពួកគេបានដាក់តម្លៃលើស៣០ភាគរយជាមធ្យមដូច្នេះតម្លៃពិតនៃអចលនទ្រព្យ គឺជាតម្លៃដែលអ្នកទិញហ៊ានទិញ អ្នកលក់ចង់លក់។

លោកបន្តថា ៖ «យើងស្ថិតនៅក្នុងទីផ្សារសេរី តម្លៃដីធ្លី និងផ្ទះមិនអាចវាស់តាមកម្រិតផលទុនជាតិសរុបបានទេ។ នៅលើពិភពលោកគ្មានប្រទេសណាកំណត់តម្លៃដី និងផ្ទះបានទេ»។

លោកបន្តថា ៖ «ទោះបីជាតម្លៃដី និងតម្លៃផ្ទះខ្ពស់ក្តី ប៉ុន្តែនៅតែមានអ្នកទិញ»៕

សំឡេងទីក្រុង!

សំឡេងទីក្រុង!