ជប៉ុនបង្ហាញវិធីសន្សំសំចៃ និង​មានប្រសិទ្ធភាព ក្នុងការជួសជុលស្ពានជ្រោយចង្វារ​
Posted On : September, 6, 2018 | By សំឡេងទីក្រុង

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

លោក Hidehisa Horinouchi ឯកអគ្គរាជទូតជប៉ុន​ប្រចាំកម្ពុជា បានបង្ហើប​ថា ​ជប៉ុនបាន​ធ្វើការ​ជួសជុល​ស្ពានជ្រោយចង្វារ​ ដោយប្រើប្រាស់បច្ចេកវិទ្យាថ្មីចុងក្រោយ នៃប្រទេសជប៉ុន។ នេះបើតាម​វីដេអូ ដែល​ត្រូវបានបង្ហោះ​នៅលើ​ទំព័រហ្វេសប៊ុកផ្លូវការរបស់ស្ថានទូតជប៉ុនប្រចាំ​កម្ពុជា នៅល្ងាច​ថ្ងៃទី​៥ ខែកញ្ញា​ ឆ្នាំ​២០១៨​។

បច្ចេកវិទ្យានោះ គឺ​ការ​ប្រើប្រាស់​កម្ទេច​ដែក​អ៊ីណុក ដើម្បី​ធ្វើ​ការ​បោស​សម្អាត​កំបោរ​ចាស់ៗ​ចេញ​ពី​ស្ពាន។ នៅ​ពេល​ធ្វើ​ការ​បោស​សម្អាត កំបោរ​ចាស់ៗ និង​កម្ទេច​ដែក​ដែល​បាន​ធ្លាក់ ត្រូវ​បាន​បូម​ចូល​ទៅ​ក្នុង​ម៉ាស៊ីន​បូម និង​បែង​ចែក។ កម្ទេចដែក​អ៊ីណុក​ នឹង​ត្រូវ​ធ្លាក់​ទៅ​ក្នុង​ធុង​ស្តុក​ ដើម្បី​ទុក​ប្រើប្រាស់​ម្ដង​ទៀត ខណៈ​កំបោរ​ចាស់ៗ នឹង​ត្រូវ​បូម​បន្ត​ទៅ​កាន់​ម៉ាស៊ីន​មួយ​ទៀត​មុន​ធ្លាក់​ចូល​ក្នុង​ធុង​សំណល់។ វិធី​នេះ មិន​ត្រឹម​តែ​ មិន​ធ្វើ​ឲ្យ​កាក​សំណល់​ចាស់​ៗ​ធ្លាក់​ក្នុង​ទន្លេ​នោះ​ទេ ក៏ប៉ុន្តែ​ថែម​ទាំង​ធ្វើ​ឲ្យ​ការលាបពណ៌​ស្ពាន​សាជាថ្មី បានស្អាត ដោយជៀសវាង​ការជ្រាបទឹក​ដែល​បណ្ដាលឲ្យតួដែកស្ពានច្រែះ។

សូម​បញ្ជាក់ថា ការជួសជុល​ស្ពានជ្រោយចង្វារ​នេះ ​ប្រើ​​ពេល ២៤ខែ ចាប់ពីខែតុលា ឆ្នាំ​២០១៧ គ្រោង​នឹង​បញ្ចប់​នៅ​ចុងឆ្នាំ ២០១៩។​​ ទឹកប្រាក់​ត្រូវ​ចំណាយ​លើ​ការជួសជុល មាន​ប្រមាណ​ ៣០លាន​ដុល្លារ ដោយ​ស្ថិតក្រោម​ជំនួយឥតសំណង​របស់​រដ្ឋាភិបាល​ជប៉ុន តាមរយៈ​ទីភ្នាក់ងារ​ប្រតិបត្តិការ​អន្តរជាតិ​ជប៉ុន (JICA)​។

ការជួសជុល​ស្ពាន​ជ្រោយចង្វារ​ដែលមាន​ប្រវែង​ជិត​១០០០​ម៉ែត្រនេះ ត្រូវ​ចែកចេញជា ៣ ផ្នែក​សំខាន់ៗ​ផ្សេងគ្នា។ ក្នុងនោះ​ ផ្នែក​ទី ១ គម្រោង​ជួសជុល​ចុងស្ពាន និង​ផ្លូវថ្នល់ ទាំងសងខាង​មាន​ប្រវែង ២៥៨ម៉ែត្រ​ និង​ផ្នែក​ទី ២ ជា​គម្រោង​ជួសជុល​គល់ស្ពាន​ប្រវែង ១៦៨ ម៉ែត្រ​។ ចំណែកឯ​ផ្នែក​ដ៏​សំខាន់​នោះ គឺ​តួ​ស្ពាន​មាន​ប្រវែង ៥៤៥ ម៉ែត្រ៕

Urban Voice Cambodia

Urban Voice Cambodia