គម្រោង​អភិវឌ្ឍន៍​ក្រុង​រណប U City ​របស់​អ្នក​វិនិយោគ​កូរ៉េ​កំពុង​ស្ថិត​ក្នុង​ភាព​មិន​ច្បាស់​លាស់
Posted On : January, 19, 2015 | By សំឡេងទីក្រុង

ប្រភព៖ www.postkhmer.com, Sat, 17 January 2015,

នៅពេល​ឮ​ដំណឹង​ថា​ ​អ្នក​វិនិ​យោគ​កូរ៉េ​ខាង​ត្បូង គ្រោង​នឹង​បញ្ចេញ​ប្រាក់​ ៤ ​ពាន់​លាន​ដុល្លារ ដើម្បី​សាង​សង់​ទីក្រុង​រណប​មួយ​លើ​ផ្ទៃដី​​ ២០០០ ​ហិកតា​នៅ​ទីក្រុង​តាខ្មៅ ខេត្ត​កណ្តាល នោះ​បាន​ធ្វើ​ឲ្យ​មាន​ការ​​សាទរ​ និង​ការ​ចំអក​ភ្លាមៗ​ពី​បណ្តាញ​សារ​ព័ត៌មាន​ក្នុង​ស្រុក។

ប៉ុន្មាន​ថ្ងៃ​បន្ទាប់​ពី​ការ​ធ្វើសន្និសីទ​សារព័ត៌មាន​ស្តីពី​គម្រោង​ អភិវឌ្ឍន៍​ទីក្រុង​រណប​នេះ​មាន​គេហទំព័រ​ល្បី​ឈ្មោះ​ក្នុង​ស្រុក​មួយ​បាន​ ពិពណ៌នា​គម្រោង​នេះ​ក្នុង​ទស្សនៈ​​ចំអក​ជា​ច្រើន​។ ការ​ចំអក​នោះ​ គឺ​ផ្តោត​ទៅ​លើ​ចំនួន​ទឹក​ប្រាក់​ ៤ ពាន់​លាន​ដុល្លារ​ដែល​គ្រោង​នឹង​ចំណាយ​បង្កើត​ក្រុងរណប​ថ្មី​មួយ និង​បាន​ចំអក​ដល់​គម្រោង​អភិវឌ្ឍន៍​អចលន​​ទ្រព្យ​មួយ​ចំនួន​ទៀត​ដូច​ជា​អគារ ​ Gold ​Tower 42 ,​Camko City, Booyoung Town ​ដែល​អភិវឌ្ឍ​ហាក់​មិន​ចប់​ចុង​ចប់​ដើម។

ក្រុង​រណប​ថ្មី​ដែល​គេ​គ្រោង​នឹង​អភិវឌ្ឍនោះ​​មាន​ឈ្មោះ​ថា U​ City ​ដែល​ជា​ការ​សហការ​វិនិយោគ​ដោយ​ក្រុមហ៊ុន​យូ​ ស៊ីធី​ ជា​មួយ​ក្រុម​ហ៊ុន GMG ​ក្រុមហ៊ុន ​Won Ban Do Chae ​សាកល​វិទ្យាល័យ​ Junson ​និង​សាកល​វិទ្យាល័យ Jaunnam។

លោកស្រី You Ri Na ​អគ្គ​នាយិកា​ក្រុមហ៊ុន GMG បានថ្លែង​ក្នុង​សន្និសីទ​សារ​ព័ត៌មាន​មួយ​ដែល​បាន​រៀបចំ​នៅ​សណ្ឋាគារ​ កាំបូឌីយ៉ាណា ​កាល​​ពី​ពេល​ថ្មីៗ​នេះ​ថា គម្រោង​អភិវឌ្ឍន៍​នេះ​បាន​ទទួល​ការ​គាំទ្រ​ពី​រាជ​រដ្ឋាភិបាល​កម្ពុជា​រួច​ ហើយ ដោយ​គ្រោង​នឹង​ចាប់​ផ្តើម​ដំណើរ​ការ​អភិវឌ្ឍ​ន៍ក្នុង​ឆ្នាំ ​២០១៥ ​នេះ។​ ដំណើរការ​អភិវឌ្ឍ​ន៍នេះ​នឹង​ធ្វើ​ជា​ដំណាក់​កាលៗ ​ដោយ​ដំណាក់​កាល​ទី១ ​មាន​រយៈ​ពេល​៤ឆ្នាំ មាន​ការ​សាង​សង់​សាកល​វិទ្យាល័យ​​សិល្បៈ​អន្តរជាតិ និង​អគារ​លំនៅឋាន​មុន​គេ​។

លោកស្រី​រំពឹង​ថា​ ទីក្រុង​រណបថ្មី​​នេះ​នឹង​ក្លាយ​ជា​មជ្ឈមណ្ឌល​ទេសចរណ៍ ឧស្សាហកម្ម​ វេជ្ជសាស្ត្រ បច្ចេកវិទ្យា​ព័ត៌មាន បរិស្ថាន វប្បធម៌​ និង​​កសិកម្ម ព្រម​ទាំង​មាន​សាង​សង់​សាកល​វិទ្យាល័យ​ មន្ទីរពេទ្យ ប៉ុស្តិ៍​ទូរទស្សន៍​អន្តរជាតិ រោងចក្រ​ផលិត​អំពូល​​អគ្គិសនី LED ​គម្រោង​កសិកម្ម​ បរិស្ថាន​ និងវិស័យ​មួយ​ចំនួន​ទៀត។

លោកស្រី​បាន​ថ្លែង​ថា៖ «មូល​ហេតុ​ដែល​ខ្ញុំ​ និង​ដៃ​គូ​អភិវឌ្ឍន៍​មក​វិនិយោគ​នៅ​កម្ពុជា​ ព្រោះ​ខ្ញុំ​ស្រឡាញ់​ប្រទេស​កម្ពុជា​ដែល​មាន​វប្បធម៌​ល្អ ​ព្រម​ទាំង​មាន​សក្តានុពល​សេដ្ឋកិច្ច ​ស្ថិរភាព​នយោបាយ​ និង​សន្តិភាព ពិសេស​ប្រទេស​កម្ពុជា​មាន​ទំនាក់​ទំនង​ល្អ​ជា​មួយ​សាធារណ​រដ្ឋ​កូរ៉េ​ផង​ ដែរ»។

លោក ប៉ូ ​អ៊ាវគង់ ប្រធាន​គ្រប់គ្រង​ទូទៅ​ក្រុមហ៊ុន​ អេស៊ា រៀល​អេស្ទេត​ បាននិយាយ​ថា ​ម្ចាស់​គម្រោង​នេះ​បាន​ចូល​មក​ផ្សព្វ​ផ្សាយ​នៅ​កម្ពុជា​កាល​ពី​អំឡុង​ឆ្នាំ ​ ២០០៩-២០១០ ​ម្តង​រួច​មក​ហើយ ​ដោយ​នៅ​ពេល​នោះ​អ្នក​អភិវឌ្ឍន៍​គម្រោង​នេះ​បាន​អញ្ជើញ​លោក​ទៅ​ជួប ​និង​បង្ហាញ Master Plan ​របស់​គម្រោង​ឲ្យ​លោក​បាន​ឃើញ​ដែរ ប៉ុន្តែ​ក្រោយ​មក​ក្រុមហ៊ុន​នេះ​បាន​បិទ​ការិយា​ល័យ​របស់​ខ្លួន​មិន​ដឹង​រើ​ ទៅ​ទីតាំង​ណា​នោះ​ទេ។ ​ទើប​តែ​ពេល​នេះ​លោក​បាន​ឮ​ពី​គម្រោង​នេះ​ឡើង​វិញ។ ​គម្រោង​នេះ​អាច​ស្ថិត​នៅ​តាម​បណ្តោយ​ផ្លូវ​ឆ្ពោះ​ទៅ​កាន់​ស្រុក​ស្អាង​ ខេត្តកណ្តាល ​ដែល​ដី​នៅ​តំបន់​នោះ​ភាគ​ច្រើន​ជា​ដី​បឹង ​និង​ជា​ដី​មាន​ម្ចាស់​រួច​ទៅ​ហើយ។

លោក​មាន​ប្រសាសន៍​ថា៖ ​«គម្រោង​ដែល​គេ​កំពុង​ផ្សព្វផ្សាយ​នា​ពេល​នេះ​ខ្ញុំ​ជឿ​ត្រឹម​តែ ៣០ ​ភាគរយ ​សិន​ប៉ុណ្ណោះ ហើយ​បើ​សួរ​ថា​ តើ​ក្រុមហ៊ុន​នោះ​ចូល​មក​ក្រឡុក​ទីផ្សារ ​ឬ​យ៉ាង​ណា​នោះ​ ខ្ញុំ​គ្រាន់​តែ​អាច​និយាយ​បាន​ថា ​ក្នុង​បរិបទ​ទីផ្សារ​បច្ចុប្បន្ន​យើង​ពិបាក​និយាយ​ណាស់ ​ព្រោះ​យើង​មិន​ដឹង​ថា គាត់​សហការ​ជាមួយ​អ្នក​វិនិយោគ​ និង​អ្នក​មាន​អំណាច​ក្នុង​ស្រុក ឬអត់​នោះ​ទេ»។

លោក អ៊ាវគង់ បាន​លើក​ឡើង​ថា ​ដើម្បី​និយាយ​ពី​ភាព​ច្បាស់​លាស់​របស់​គម្រោង​មួយ​គេ​ត្រូវ​សិក្សា​ពី​ភាព​ ជាក់​ស្តែង​ ឬ​ភាព​ស្រប​ច្បាប់​នៃ​គម្រោង​ថា​ មាន​និរន្តរ​ភាពដែរ ឬ​ទេ ដោយ​គេ​អាច​មើល​ទៅ​លើ​កត្តា​ចំនួន​ ២ ​ជា​សំខាន់ គឺ​ទី១​អ្នក​អភិវឌ្ឍន៍​ត្រូវ​បង្ហាញ​ថា តើ​គាត់​បាន​ទិញ​ដី ​ឬ​មាន​ដី​ស្រប​ច្បាប់​ហើយ​ ឬ​នៅ? Master Plan ​មាន​សិក្សា​​ទីផ្សារ និង​មាន​ថវិកា​សម្រាប់​អភិវឌ្ឍ​ ឬ​អត់? ទី២ ​តើ​គាត់​មាន​​​អាជ្ញា​ប័ណ្ណ​សម្រាប់​អភិវឌ្ឍ​ហើយ ​ឬ​នៅ?​ ព្រោះ​គ្រាន់​តែ​ធ្វើ​សន្និសីទ​សារ​ព័ត៌មាន​វា​មិន​ចំណាយ​អស់​ប៉ុន្មាន​នោះ​ ទេ​។

លោក​បាន​បន្ត​ថា ​បើ​និយាយ​ពី​គម្រោង​នេះ​ទទួល​ជោគ​ជ័យ ឬអត់​ គឺ​គេ​ត្រូវ​សិក្សា​ពី​គម្រោង​នេះ​ថា មាន​អ្វី​ខ្លះ​ និង​ត្រូវ​សិក្សា ​Master ​Plan សិន ប៉ុន្តែ​បើ​ក្រុងរណប​នេះ​ជា​ក្រុង​សម្រាប់​អភិវឌ្ឍ​តែ​លំនៅឋាន គឺ​វា​ហាក់​នៅ​ឆ្ងាយ​បន្តិច​។

អគ្គ​នាយក​ក្រុមហ៊ុន ប៊ុណ្ណា​ រៀលធី គ្រុប​ លោក ស៊ឹង ​ប៊ុណ្ណា បានប្រាប់​ថា ប្រសិន​បើ​ក្រុម​ហ៊ុន​នេះ​មាន​គម្រោង​ធ្វើ​ជា​ទីក្រុង​រណប​មួយ​ឲ្យ​មាន​ សក្តានុពល​គ្រប់​គ្រាន់ គឺ​ត្រូវ​មាន​លុយ​គ្រប់​គ្រាន់។ អ្វី​ដែល​ទីផ្សារ​នៅ​កម្ពុជា​ត្រូវ​ការ​ខ្លាំង​នា​ពេល​នេះ​ គឺ​គម្រោង​អភិវឌ្ឍន៍​លំនៅឋាន​ចាប់​ពី​ថ្នាក់​មធ្យម​ចុះ​ក្រោម ខណៈ​អ្នក​អភិវឌ្ឍន៍​ដែល​លើក​គម្រោង​សព្វ​ថ្ងៃ​នេះ​ភាគ​ច្រើន តែង​ផ្តោត​តែ​លើ​ក្រុម​អ្នក​មាន​ប្រាក់​ចំណូល​មធ្យម និង​ខ្ពស់។

លោកស្រី ហែម ​សម្បត្តិ​ អភិបាល​រង​ក្រុងតាខ្មៅ​ បាន​ប្រាប់​​ថា លោកស្រី​មិន​ទាន់​បាន​ទទួល​សំណើ ​ឬ​មាន​ការ​ទាក់​ទង​ពី​ក្រុម​ហ៊ុន​អភិវឌ្ឍន៍​គម្រោង​ខាង​លើ​មក​កាន់​សាលា​ ក្រុង​តាខ្មៅ​នោះ​ទេ អ្វី​ដែល​អ្នកស្រី​បាន​ដឹង គឺ​ការ​ឮតៗ​គ្នា​តាម​រយៈ​សារព័ត៌មាន​តែ​ប៉ុណ្ណោះ។

លោក​បណ្ឌិត វ៉ាន់ ​វ៉ាត អនុ​ប្រធាន​មន្ទីរ​រៀបចំ​ដែនដី នគរូបនីយ​កម្ម​ និង​សំណង់ ខេត្ត​កណ្តាល​ បាន​ប្រាប់​ថា លោក​មិន​ទាន់​ឃើញ​សំណើ​ណា​មួយ​ពី​ក្រុមហ៊ុន​ដើម្បី​សុំ​កិច្ច​សហការ​ពី​ មន្ទីរ​នៅ​ឡើយ​ទេ ​ប៉ុន្តែ​លោក​ថា​ អាជ្ញាធរ​​ក្រុង​តាខ្មៅ​កំពុង​រៀបចំ​ប្លង់គោល​​ក្រុង​ជិត​ ២​ ឆ្នាំ​មក​ហើយ​ ដោយ​គ្រោង​នឹង​​បញ្ចប់​នៅ​ចុង​ឆ្នាំ​ ២០១៥​ នេះ​។ ប្រសិន​បើ​ក្រុម​ហ៊ុន​​មាន​បំណង​អភិវឌ្ឍ​ក្រុង​រណប​មែន​នោះ ​ក្រុមហ៊ុន​គួរ​តែ​មក​សុំ​កិច្ច​សហការ​ជា​មួយ​ក្រុម​ការងារ​រៀបចំ​ប្លង់គោល​ របស់​ទីក្រុង​នេះ​ ដើម្បី​កុំ​ឲ្យ​មាន​បញ្ហា​នៅ​ពេល​គម្រោង​នេះ​ចាប់​ផ្តើម​ដំណើរ​ការ​។

លោក​បាន​ថ្លែង​ថា៖ «​ប្រសិន​បើ​មាន​ការ​អភិវឌ្ឍ​ពិត​ប្រាកដ​ទាំង​អាជ្ញាធរ​ដែនដី សហគមន៍ ​និង​ក្រុម​ការងារ​អភិវឌ្ឍន៍​ប្លង់​គោល​របស់​ក្រុង​នឹង​ជួយ​សហការ ​និង​គាំទ្រ​គម្រោង​នេះ​ច្រើន»​។

លោក​បាន​បន្ត​ថា៖ «​ពេល​ក្រុម​ហ៊ុន​មក​អភិវឌ្ឍហើយ​សហការ​ជាមួយ​ក្រុម​ការងារ​ប្លង់គោល ធ្វើ​ឲ្យ​យើង​មាន​ប្រាក់​សម្រាប់​រៀបចំ​ប្លង់គោល​ក្រុង​តាខ្មៅ​កាន់​តែ​លឿន​ ថែម​មួយ​កម្រិត​ទៀត»។

លោក​បណ្ឌិត ​​បេងហុង ​សុជាតិ​ខេមរ៉ូ ​អគ្គ​នាយក​នៃ​អគ្គនាយក​ដ្ឋាន​លំនៅឋាន នៃ​ក្រសួង​រៀបចំ​ដែនដី​ នគរូបនីយកម្ម​ និង​សំណង់​បាន​ថ្លែង​ថា ​លោក​មិន​ដឹង​ច្បាស់​ពី​គម្រោង​នេះ​នៅ​ឡើយ​ទេ។

លោក គីម ​ហ៊ាង នាយក​ក្រុម​ហ៊ុន​ខ្មែរ រៀល​អេស្ទេត និយាយ​ថា ​អ្នក​វិនិយោគ​កូរ៉េ​ ដែល​​មក​ប្រកាស​កសាង​ក្រុង​រណប​តម្លៃ​ ៤ ០០០ ​លាន​ដុល្លារ​ថ្មីៗ​នេះ​ គឺ​ពួក​គេ​មក​បោក​យក​លុយ​។ ពួក​គេ​ចូល​មក​ប្រកាស​លក់​ដី​ដែល​​គេ​បាន​ទិញ​តាំង​ពី​ឆ្នាំ​ ២០០៥-​២០០៦​ មក​ម្ល៉េះ​។

លោកបន្ត​ថា គម្រោង​វិនិយោគ​មាន​តម្លៃ​រហូត​ដល់​ ៤០០០ ​លាន​ដុល្លារ​វា​មិន​អាច​នោះ​ទេ ​ព្រោះ​រដ្ឋាភិបាល​កូរ៉េ​សព្វ​ថ្ងៃ​នេះ​មិន​ឲ្យ​លុយ​ច្រើន​បែប​នេះ​ហូរ​ចេញ​ ពី​ប្រទេស​គេ​ទេ​ គឺ​ឲ្យ​តែ​ហូរ​ចូល​ប៉ុណ្ណោះ។

លោក​មាន​ប្រសាសន៍​ថា៖​«ឥឡូវ​នេះ​អ្នក​វិនិយោគ​កូរ៉េ ប្រហែល​ ៩០ ​ភាគរយ​បាន​ចូល​មក​គឺ​លក់​ដី​សល់​ពី​មុន​តែ​ប៉ុណ្ណោះ ដើម្បី​យក​លុយ​ទៅ​វិញ។ ពួកគេ​មក​បង្ហាញ​គម្រោង​អភិវឌ្ឍន៍​ទីក្រុង​រណប U City គឺ​មក​បង្ហាញ​ឲ្យ​យើង​ទិញ​ដី​ពួក​គេ​ ហើយ​ពួក​គេ​លក់​ក្នុង​តម្លៃ​ថ្លៃ​ទៀត​ផង»។

លោក​បាន​បញ្ជាក់​ថា៖​«គម្រោង​ដែល​អួត​យក​ប្រាក់​រាប់​ពាន់​លាន​ដុល្លារ​មក​វិនិយោគ​ គឺ​ជា​គម្រោង​បោក»។

លោក ចេង ​ខេង ​ប្រធាន​សមាគម​អ្នក​វាយ​តម្លៃ ​និង​ភ្នាក់ងារ​អចលន​វត្ថុ​កម្ពុជា បាន​បន្ទរ​ថា ​ក្រុមហ៊ុន​នេះ​មក​និយាយ​ពី​ការ​បោះ​ទុន​ ៤០០០ លាន​ដុល្លារ​កសាង​ក្រុងរណប U City ប៉ុន្តែ​តើ​អ្នក​ណា​ជា​ម្ចាស់​ដី ​គឺ​មិន​មាន​អ្នក​ណា​ដឹង​នោះ​ទេ។ នេះ​ជា​ការ​បំប៉ោង​ព័ត៌មាន​មួយ​ដែល​ងាយ​ធ្វើ​ឲ្យ​ប្រជាជន​ចាញ់​ការ​ឃោសនា​ អកុសល។

លោក​បាន​បន្ត​ថា ​បើ​សូម្បី​តែ​ក្រុម​ប្រឹក្សា​អភិវឌ្ឍន៍​កម្ពុជា មិន​ដឹង​ផង ​តើ​គម្រោង​ទីក្រុងរណប​នេះ​កើត​ឡើង​ដោយ​របៀប​ណា?

Urban Voice Cambodia

Urban Voice Cambodia