ក្រុម​ហ៊ុន​​អចលនទ្រព្យ​​ជប៉ុន​មួយ​ ​​​​បើក​ការ​វិនិយោគ​នៅ​​តំបន់​កំពុង​​​មាន​សក្ដានុពល​​ក្នុង​រាជធានី​ភ្នំពេញ​
Posted On : ធ្នូ, 6, 2014 | By សំឡេងទីក្រុង

ដោយ BNEWS, ថ្ងៃទី ០៦ ធ្នូ ២០១៤

ក្រុម​ហ៊ុនផ្ដល់​សេវាកម្ម​អចលនទ្រព្យ​ Leopalace 21 Corporation របស់​ជប៉ុន​​នឹង​បើក​ការ​វិនិយោគ​ទៅ​លើ​សំណង់​អគារ​ខ្ពស់​ៗ​នៅ​តំបន់​ទួល​គោក​ និង​តំបន់​បឹង​កេង​កង​ក្រោម​គម្រោង​ទឹក​ប្រាក់​វិនិយោគ​ប្រមាណ​ ២០​លាន​ដុល្លារ​អាមេរិក​។ ​

 

តាម​ការ​ដក​ស្រង់​ប្រសាសន៍​របស់​លោក​លោក Eisei Miyama នាយកប្រតិបត្តិទូទៅនៃក្រុមហ៊ុន “Leopalace21 Corporation ” ចេញ​ផ្សាយ​ដោយ​ទី​ភ្នាក់​ងារ​សារព័ត៌មាន​កម្ពុជា​(AKP)​ ឱ្យ​ដឹង​ថា ​ការ​វិនិយោគ​នេះ​ដោយ​សារ​​​លោក​មើល​ឃើញ​​ពី​សក្តានុភាព​ផ្នែក​សេដ្ឋកិច្ច​នៅ​កម្ពុជា​កំពុង​តែ​មាន​សន្ទុះ​រីក​ចម្រើន​ ហើយ​​បច្ចុប្បន្ន​មាន​ក្រុមហ៊ុន​ជប៉ុន​ជាច្រើន​កំពុងតែ​បណ្ដាក់ទុន​រកស៊ី​នៅ​​កម្ពុជា​ ដូច្នេះ​លោក​ចង់​ឱ្យ​មាន​គេហដ្ឋាន​ក៏​ដូចជា​បន្ទប់ស្នាក់​នៅ​ដ៏​ល្អៗ​ សម្រាប់​ជនជាតិ​ជប៉ុន​ ជា​ពិសេស​​ជួយ​ដល់​​កម្ពុជា​ តាមរយៈ​ការ​សាងសង់​អគារ​ល្អៗ ​បន្ទប់ល្អៗ​ ដើម្បី​ឱ្យ​ការ​ស្នាក់​នៅ​កាន់​តែ​ទំនើប ​និង​មាន​សុវត្ថិភាព​ខ្ពស់។

ប្រធាន​សមាគម​អ្នក​វាយ​តម្លៃ​​និង​ភ្នាក់​ងារ​អចលនវត្ថុ​កម្ពុជា​លោក​ឧកញ៉ា​ ចេង​ ខេង​ ​​ថ្លែង​ប្រាប់​ TheBNEWS នៅ​ព្រឹក​នេះ​​ថា ​ការ​ឈាន​ជើង​វិនិយោគ​របស់​​ក្រុម​ហ៊ុន​ជប៉ុន​​វា​​ជា​សញ្ញាណ​មួយ​ល្អ​មែន​ទែន​សម្រាប់​វិស័យ​អចលន​ទ្រព្យ​នៅ​កម្ពុជា ​ដោយ​លោក​សំគាល់​ឃើញ​ថា​ក្រុម​ហ៊ុន​ជប៉ុន​មុន​នឹង​គាត់​ធ្វើ​ការ​វិនិយោគ​នៅ​តំបន់​ណា​មួយ ​ឬ​ប្រទេស​ណា​មួយ ​ពួក​គេ​មាន​ការ​ស្រាវជ្រាវ​ច្បាស់​លាស់​។​ លោក​សង្កេត​ឃើញ​ថា​ក្រុម​ហ៊ុន​អចលនទ្រព្យ​ដែល​មក​វិនិយោគ​ច្រើន​ជាង​គេ​នៅ​កម្ពុជា​រួម​មាន​កូរ៉េ​ ចិន​ ជប៉ុន​ សិង្ហបុរី​ និង​វៀតណាម​ជា​ដើម​។​

 

ទោះ​បី​មាន​សញ្ញាណ​ល្អ​ក្នុង​វិស័យ​អចលនទ្រព្យ​ក្ដី​លោក​នៅ​​តែ​មាន​ការ​ព្រួយ​បារម្ភ​ចំពោះ​ការ​ប្រកួត​ប្រជែង​រវាង​ភ្នាក់​ងារ​អចលនទ្រព្យ​នៅ​ក្នុង​ស្រុក​ជា​មួយ​ភ្នាក់​ងារ​ដែល​មក​ពី​​ក្រៅ​ស្រុក​ ដោយ​សារ​បច្ចុប្បន្ន​វិស័យ​នេះ​នៅ​តែ​ខ្វះ​អ្នក​ជំនាញ​ក្នុង​ការ​ផ្ដល់​សេវាកម្ម​ឱ្យ​បាន​ស៊ី​ជម្រៅ​ទៅ​លើ​ផ្នែក​អចលន​ទ្រព្យ​នេះ​។

 

​នាយិកា​បណ្ដុះ​បណ្ដាល ​នៃ​សាកលវិទ្យាល័យ​អចលនទ្រព្យ​ ដំបូង​បំផុត​នៅ​កម្ពុជា(​Century 21 University-Cambodia​ ) អ្នកស្រី ​គ្រេស​ រចនី​ហ្វុង​ ឱ្យ​The BNEWS ដឹង​ថា​​ទន្ទឹម​នឹង​​ការ​ចូល​មក​វិនិយោគ​​របស់​ក្រុម​ហ៊ុន​​ជប៉ុន​ឬ​បណ្ដា​ក្រុម​ហ៊ុន​ដទៃ​ទៀត​​​ គ្រប់​បណ្ដា​ភ្នាក់​ងារ​អចលនទ្រព្យ​នៅ​ក្នុង​ស្រុក​ត្រូវ​​ស្វែង​យល់​​ពី​វប្បធម៌​ទៅ​តាម​ប្រទេស​នីមួយ​ៗ​និង​សិក្សា​ស្វែង​យល់​ព័ត៌មាន​ឱ្យ​បាន​ច្បាស់​លាស់​ពី​​​គោល​ដៅ​វិនិយោគ​របស់​ក្រុម​ហ៊ុន​នីមួយ​ៗ។​

 

ក្រុមហ៊ុនផ្ដល់​សេវាកម្ម​អចលនទ្រព្យ​ “Leopalace21 Corporation ” ​មាន​សាខា​ចំនួន​ ១៣​ប្រទេស​ក្នុង​តំបន់​អាស៊ី​​និង​​សហរដ្ឋ​អាមេរិក​ហើយ​ក៏​មាន​​​​មូលដ្ឋាន​របស់​ខ្លួន​រួច​រាល់​ហើយ​ដែរ​នៅ​ក្នុង​ប្រទេស​ថៃ​និង​វៀតណាម​កាល​ពី​ឆ្នាំ​២០១៣​កន្លង​ទៅ​នេះ​​។

 

​​​​​គួរ​រំលឹក​ផង​ដែរ​​ថា ​ខណៈ​ដែល​វិនិយោគិន​ជប៉ុន​មក​វិនិយោគ​កាន់​តែ​ច្រើន​នៅ​កម្ពុជា​ ​​​​​​​​​​​ធនាគារ​ Shiga Bank​ របស់​ជប៉ុន​នឹង​​ពង្រីក​​ការ​វិនិយោគ​របស់​ខ្លួន​មក​កាន់​ទីផ្សារ​កម្ពុជា​ តាម​រយៈ​​​ការ​ចង​សម្ព័ន្ធ​ភាព​ជា​មួយ​ធនាគារ​កាណាឌីយ៉ា​ ក.អ ​នៅ​ចុង​ឆ្នាំ​២០១៤​នេះ​ដើម្បី​ទទួល​បាន​ព័ត៌មាន​ពី​ការ​វិវត្ត​​សេដ្ឋកិច្ច​​ និង​ការ​វិនិយោគ​ចុង​ក្រោយ​​​នៅ​ក្នុង​ប្រទេស​​កម្ពុជា​សម្រាប់​ផ្ដល់​ឱ្យ​​ ក្រុម​​ហ៊ុន​​​និង​វិនិយោគិន​​​របស់​ជប៉ុន​៕​

សំឡេងទីក្រុង!

សំឡេងទីក្រុង!