ក្រុម​ហ៊ុន​​នៅ​ពីក្រោយ​គម្រោង​អភិវឌ្ឍន៍​តំបន់បឹង​កក់​​លើក​ឡើង​ថា ការ​លក់​ដី​ស្ថិត​ក្នុង​ភាព​មិន​ច្បាស់​លាស់​
Posted On : ធ្នូ, 8, 2014 | By សំឡេងទីក្រុង

ដោយ ខេមបូឌាដេលី ថ្ងៃទី ០៥ ខែធ្នូ ឆ្នាំ ២០១៤

ក្រុម​ហ៊ុន​​ដែល​នៅ​ពីក្រោយ​គម្រោង​​អភិវឌ្ឍន៍​​ដ៏ចម្រូងចម្រាស​នៅ​តំបន់ ​បឹង​កក់​​បាន​លើក​ឡើង​ថា ការ​លក់​ដី​រាប់​លាន​ដុល្លារ​ដែល​មិន​ទាន់​ដាច់​ស្រេច​ទៅ​ឲ្យ​ក្រុម​ហ៊ុន​ សិង្ហបុរី​មួយ​ទំនង​ជា​មិន​កើត​ឡើង​ទេ ដោយ​សារ​​ការ​លំបាក​ផ្នែក​ហិរញ្ញវត្ថុ​របស់​អ្នក​ដែល​មាន​គម្រោង​ទិញ​ដី​ នេះ។

កាលពី​ខែ​មិថុនា ក្រុម​ហ៊ុន​ HLH Group បាន​ប្រកាស​ថា ក្រុម​ហ៊ុន​បុត្រសម្ព័ន្ធ​ថ្មី​របស់​ខ្លួន​គឺ​ក្រុម​ហ៊ុន D’Lottus Development បាន​យល់ព្រម​​ផ្ដល់​ប្រាក់​ចំនួន​១៤,៩លាន​ដុល្លារ ដើម្បី​ទទួល​បាន​ដីទំហំ​១,៣៥​ហិកតា​ពី​​ក្រុមហ៊ុនស៊ូកាគូអុីន ដែល​គ្រប់​គ្រង​ដោយ​លោក ឡាវ ម៉េងឃិន សមាជិក​​ព្រឹទ្ធសភា​មក​ពី​គណបក្ស​ប្រជា​ជន​កម្ពុជា។

ដោយ​មាន​ជំនួយ​ពី​​សាលា​រាជ​ធានី​ ក្រុម​ហ៊ុន​ស៊ូកាគូអុីនបាន​បណ្ដេញ​អ្នក​ភូមិ​ប្រមាណ​៣.០០០គ្រួសារ​ពី​តំបន់​ បឹង​កក់​ ដើម្បី​បើក​ផ្លូវ​សម្រាប់​គម្រោង​របស់​ក្រុម​ហ៊ុន​នេះ​។ ការ​បណ្ដេញចេញទ្រង់ទ្រាយ​ធំនេះ​ បាន​ធ្វើ​ឲ្យ​ធនាគារ​ពិភព​លោក​​ផ្អាក​ការ​ផ្ដល់​ប្រាក់​កម្ចី​ថ្មី​ទាំង​អស់ ​មក​ឲ្យ​កម្ពុជា​ភ្លាមៗ។

មិន​យូរ​ប៉ុន្មាន​បន្ទាប់ពី​ក្រុម​ហ៊ុន​ HLH Group បាន​បង្ហាញ​គម្រោង​ទិញដី​ជា​សាធារណៈ​​នៅ​លើ​ផ្សារ​មូលបត្រ​សិង្ហបុរី​ លោក Johnny Ong Bee Huatនាយក​ប្រតិបត្តិ​របស់​ក្រុម​ហ៊ុននេះ​​បាន​លើក​ឡើង​ថា លោក​មិន​ដឹង​អ្វី​នោះ​ទេ​ចំពោះ​ភាព​ចម្រូង​ចម្រាស​ដែល​ល្បី​សុះសាយ​ជុំវិញ​​ ​ដីមួយ​ផ្នែក​ ដែល​លោក​​​​គ្រោង​​ទិញ​។ លោក​បាន​លើក​ឡើង​ទៀត​ថា ក្រុម​ហ៊ុន HLH Group ប្តេជ្ញា​គោរព​ច្បាប់​ក្នុង​ស្រុក​ទាំង​អស់​ ហើយ​កំពុង​តែ​ធ្វើ​ការ​ត្រួត​ពិនិត្យ​តាម​ផ្លូវ​ច្បាប់​មួយ​ក្នុង​​រយៈ​ពេល​ ៦ខែ​ចំពោះ​គម្រោង​ទិញ​ដី​នេះ​ មុន​ពេល​សម្រេច​ថា តើ​ត្រូវ​​ទិញ​ពិត​ប្រាកដ​ឬយ៉ាង​ណា។

អង្គការ​សិទ្ធិ​លំនៅដ្ឋាន​​បាន​សាកសួរ​ថា តើ​ក្រុម​ហ៊ុន​ស៊ូកាគូអុីន​អាច​លក់​ដី​ដែល​ខ្លួន​​ជួល​ពី​សាលា​រាជធានី​​មក​ ​ត្រឹម​ត្រូវ​តាម​ផ្លូវ​ច្បាប់​ឬក៏អត់​។

កាលពី​ម្សិលមិញ លោកស្រី អាមូ ពីឡៃ អ្នក​នាំពាក្យ​ក្រុម​ហ៊ុន​ស៊ូកាគូអុីន​បាន​លើក​ឡើង​​ជា​លើក​ដំបូង​ថា ការ​លក់​ដី​នេះ​ទំនង​ជាមិន​កើត​ឡើង​ទេ​ បន្ទាប់ពី​មាន​ការ​សិក្សា​លើ​ប្រវត្តិ​ហិរញ្ញវត្ថុ​របស់​ក្រម​ហ៊ុន​ HLH Group។

លោកស្រី​ ពីឡៃ បាន​មាន​ប្រសាសន៍​ថា “យើង​មិន​រំពឹង​ថា រឿង​នេះ​នឹង​កើត​ឡើង​នោះ​ទេ​ ព្រោះ​​​ភាគី​ខាង​គេ​​កំពុង​មាន​បញ្ហា​ហិរញ្ញវត្ថុ​។ យើង​​មិន​ដឹង​ទេ​ថា តើ​ពួកគេ​អាច​​រ៉ាប់រង​គម្រោង​នេះ​បាន​​ឬក៏អត់​”។

ហើយ​ដោយ​ក្រុមហ៊ុន​ស៊ូកាគូអុីន​ទំនង​ជា​មិន​លក់​ដី​នេះ​ទៅ​ឲ្យ​ក្រុម​ ហ៊ុន HLH Group នោះ​ លោកស្រី​បាន​បន្ថែម​ថា “យើង​ត្រូវ​តែ​ប្ដូរ​ដៃគូ​ដែល​សាកសម​ជាង​នេះ​”។ ក្រុមហ៊ុន HLH Group បាន​បដិសេធមិន​ធ្វើ​អត្ថាធិប្បាយ​លើ​គម្រោង​នេះ​ឡើយ​ ប៉ុន្តែ​ថា ​ប្រាក់​មិនមែន​​ជា​បញ្ហា​នោះ​​ទេ។

លោក Shane Goh ជំនួយការ​ផ្ទាល់​របស់​​លោក Ong បាន​ឆ្លើយ​តប​នឹង​អុីម៉េល​មួយ​ដែល​ផ្ញើ​មក​ឲ្យ​ថៅកែ​របស់​ខ្លួន​ថា “ជា​ក្រុម​ហ៊ុន​ដែល​មាន​ការ​ចុះ​បញ្ជី​ជា​សាធារណៈ​លក្ខណៈ​អន្តរ​ជាតិ​ យើង​ពិត​ជា​មាន​សមត្ថភាព​​ផ្នែក​ហិរញ្ញវត្ថុ​ដើម្បី​សម្រេច​ការ​ទិញ​​ ឬគម្រោង​ណាមួយ​”។ លោក​បាន​មាន​ប្រសាសន៍​ថា “ស្រប​ពេល​ជាមួយ​គ្នា​នេះ​ដែរ យើង​នៅ​តែ​រង់ចាំ​ភាគី​ខាង​[ក្រុម​ហ៊ុន​ស៊ូកាគូអុីន] បំពេញ​បែប​បទ​​ឯកសារ​ផ្លូវ​ច្បាប់​មុន​ពេល​យើង​អាច​ចាត់​វិធានការ​បន្ត​។ បាល់​មិន​មែន​នៅ​ក្នុង​ដៃ​របស់​យើង​នោះ​ទេ​”។

នៅ​ក្នុង​សេចក្ដី​​ប្រកាស​របស់​ខ្លួន​ទៅ​ទាន់​​ផ្សារ​មូលបត្រ​សិង្ហបុរី​ ក្រុម​ហ៊ុន​ HLH Group បាន​លើក​ឡើង​ថា ខ្លួន​​កំពុង​មាន​ផែន​ការ​​ប្រើ​ប្រាស់​ដី​នៅ​តំបន់​បឹងកក់​ ដើម្បី​សាង​សង់​អគារ​ការិយាល័យ​ខ្ពស់​ៗ ខុនដូ​ដ៏​ប្រណីត កន្លែង​លក់​ទំនិញ និង​ភោជនីយដ្ឋាន​។ ក្រុម​ហ៊ុន​នេះ​បាន​លើក​ឡើង​ទៀត​ថា តម្លៃ​ចំនួន​១៤​,៩លាន​ដុល្លារ​សម្រាប់​ដី​នៅ​​តំបន់​បឹងកក់​គឺ​វា​តិច​ជាង​ ១ភាគ៣​នៃ​​តម្លៃ​ភាគហ៊ុន​​របស់​ក្រុម​ហ៊ុន​ ដែល​មាន​​តម្លៃ​​៥១,២​លាន​ដុល្លារ​នៅ​ពេល​នេះ​។

ក្រុម​ហ៊ុន HLH Group នឹង​ជា​ក្រុម​ហ៊ុន​ដំបូង​គេ​ដែល​ទិញ​ផ្នែក​ខ្លះនៃ​ដី​តំបន់​បឹងកក់​ពី​ ក្រុមហ៊ុន​ស៊ូកាគូអុីន ដែល​បាន​បង់​ប្រាក់​ចំនួន​៧៩​លាន​ដុល្លារ​​ទៅ​ឲ្យ​សាលា​រាជ​ធានី ដើម្បី​ជួល​ដី​​ទំហំ​១៣៣ហិកតា​នៅ​តំបន់​បឹង​កក់​នេះ​ក្នុង​រយៈ​ពេល​៩៩​ឆ្នាំ ​កាលពី​ឆ្នាំ​២០០៧។ តំបន់​អភិវឌ្ឍន៍​នេះ​ចាប់​តាំង​ពី​ពេល​នោះ​មក​​ត្រូវ​បាន​កាត់​បន្ថយ​មក​ ត្រឹម​​ប្រហែល​១២០​ហិកតា​ តាម​បទ​បញ្ជា​របស់​លោក​នាយក​រដ្ឋមន្ត្រី ហ៊ុន សែន។

ក្រុម​ហ៊ុន​ចិន​យ៉ាង​តិច​ចំនួន​ពីរ​​ដែល​ចាប់​ដៃគូ​ជាមួយ​ក្រុម​ហ៊ុន​ ស៊ូកាគូអុីន ដើម្បី​អភិវឌ្ឍ​តំបន់​នេះ​បាន​ដក​ខ្លួន​​ចេញ​រួច​ហើយ។ តំបន់​បឹង​កក់​នេះ​ ឥឡូវ​​​ទើប​តែ​មាន​ផ្លូវ​​ប៉ុន្មាន​ខ្សែ​​ប៉ុណ្ណោះ។ ក្រុមហ៊ុន​​ចុង​ក្រោយ​គឺ​ក្រុម​ហ៊ុន Erdos Hongjun Investment Corporation ដែល​បើ​​យោង​តាម​របាយការណ៍​របស់​រដ្ឋាភិបាល​ មាន​គម្រោង​បណ្ដាក់​ទុន​ជាង​២ពាន់​លាន​ដុល្លារ​ ដើម្បី​ប្រែ​ក្លាយ​តំបន់​នេះ​ជា​តំបន់​ដែល​មាន​ភូមិគ្រឹះ​ប្រណីត​ៗ ខុនដូ អគារការិយាល័យ​ខ្ពស់ៗ និង​សណ្ឋាគារ​ផ្កាយ៥។

កាលពី​ម្សិលមិញ លោកស្រី ពីឡៃ បាន​លើក​ឡើង​ថា ក្រុម​ហ៊ុន​ស៊ូកាគូអុីន​នៅ​មិន​ទាន់​រក​ឃើញ​អ្នក​ផ្សេង​​មក​ជំនួស​​ក្រុម​ ហ៊ុន Erdos នៅ​ឡើយ​ទេ​ ប៉ុន្តែ​ទោះ​ជាយ៉ាង​ណា​​ក្រុម​ហ៊ុន​នៅ​តែ​ឆ្ពោះ​ទៅ​មុខ​ជា​និច្ច​ ដែល​​ប្រើ​មូលនិធិ​ផ្ទាល់​ខ្លួន​​ ដើម្បី​សាង​សង់​ប្រព័ន្ធ​លូ និង​អគារ​ការិយាល័យ ដែល​មាន​កម្ពស់​ប្រាំជាន់​ ដោយ​គ្រោង​នឹង​ចាប់​ផ្ដើម​នៅ​ដំណាច់​ឆ្នាំ​នេះ​។ លោកស្រី​បាន​លើក​ឡើង​ទៀត​ថា ក្រុម​ហ៊ុន​ស៊ូកាគូអុីន​ក៏រំពឹង​ថា នឹង​ទទួល​បាន​​ការ​យល់​ព្រម​​ក្នុង​ពេលឆាប់​ៗ​ពី​សាលា​រាជ​ធានី​​ដើម្បី​ បង្កើត​សួន​សាធារណៈ​មួយ​​ផង​ដែរ​។

លោកស្រី​បាន​លើក​ឡើង​បន្ថែម​ទៀត​ថា ផែន​ការ​មេ​ថ្មី​​សម្រាប់​គម្រោង​នេះ​​ត្រូវ​បាន​អនុម័ត​​យល់​ព្រម​ដោយ​សាលា ​រាជ​ធានី​កាលពី​ដើម​ខែ​នេះ។

ការ​បណ្ដេញ​ចេញ​ដោយ​បង្ខំ​​​ដែល​បើក​ផ្លូវ​សម្រាប់​គម្រោង​នេះ​ បាន​ធ្វើ​ឲ្យមាន​ការ​តវ៉ា​រាប់​សិប​​បាន​ផ្ទុះ​ឡើង​ក្នុង​ចំណោម​អ្នក​ភូមិ​​ ​​​ ដែល​មាន​កំហឹង​​យ៉ាង​ខ្លាំង​​កាល​ពី​ប៉ុន្មាន​ឆ្នាំ​កន្លង​មក​នេះ​ ហើយ​អ្នក​តវ៉ា​ភាគច្រើន​​​ត្រូវ​បាន​បំបែក​ដោយ​ហិង្សា​​ពី​សំណាក់​នគរ​បាល​ និង​កង​សន្តិសុខ​របស់​រដ្ឋាភិបាល​។

កាលពី​ខែមុន នគរ​បាល​​បាន​ចាប់​ខ្លួន​ស្ត្រី​សកម្មជន​មក​ពី​សហគមន៍​បឹងកក់​ចំនួន​ ប្រាំពីរ​នាក់​ ពីបទ​យក​គ្រែ​​ទៅ​ដាក់​ចំ​កណ្ដាល​មហាវិថី​ព្រះមុនីវង្ស ដើម្បី​តវ៉ា​ចំពោះ​ការ​​ជន់លិច​ម្ដង​ហើយ​ម្ដង​ទៀត​នៅ​តំបន់​របស់​ពួកគាត់​ ដោយ​ពួកគាត់​បាន​បន្ទោស​លើ​ក្រុម​ហ៊ុន​ស៊ូកាគូអុីន ដែល​បាន​បូម​ខ្សាច់​ចាក់​​លុប​បឹង​កក់​ដែល​ជា​កន្លែង​ស្តុក​ទឹក​ដ៏សំខាន់​ អំឡុង​រដូវ​វស្សា។

​សាលា​ដំបូង​រាជ​ធានី​ភ្នំពេញ​​បាន​ចោទ​ប្រកាន់​ពួកគាត់​ពីបទ​រាំង​ស្ទះ​ ចរាចរណ៍​នៅ​ថ្ងៃ​បន្ទាប់ ហើយ​បាន​ផ្តន្ទាទោស​ពួកគាត់​ឲ្យ​ជាប់​ពន្ធនាគារ​ម្នាក់ៗ​រយៈ​ពេល​១ឆ្នាំ។ មេធាវី​របស់​ពួកគាត់​បាន​ប្ដឹង​ទាស់​កាលពី​សប្ដាហ៍​មុន​៕

សំឡេងទីក្រុង!

សំឡេងទីក្រុង!