ការ​ផ្គត់ផ្គង់​លំនៅឋាន​នៅ​ភ្នំពេញ​មាន​កំណើន​ ១៥ ​%
Posted On : November, 19, 2015 | By សំឡេងទីក្រុង

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

ប្រភព៖ phnompenhpost.com | ១៩ វិច្ឆិកា ២០១៥

Content image - Phnom Penh Post

ខណៈដែលប្រទេសនេះរក្សាបាននូវកំណើនសេដ្ឋកិច្ច និងពិសេសការកើនទ្បើងប្រាក់ចំណូលរបស់ប្រជាពលរដ្ឋបានធ្វើឲ្យចំនួនលំនៅឋានផ្គត់ផ្គង់ចូលទីផ្សារសម្រេចបានកំណើន ១៥ ភាគរយធៀបរយៈពេលដូចគ្នាកាលពីឆ្នាំមុន។

យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុបដែលបានបញ្ចប់កាលពីពេលថ្មីៗនេះបានរកឃើញថាគិតត្រឹមដំណាច់ត្រីមាសទី ៣ ឆ្នាំនេះចំនួនបុរីនៅកម្ពុជាបានកើនទ្បើងពី ៧៤ កាលពីឆ្នាំមុនដល់ ១១០ បុរីនៅឆ្នាំនេះ និងមានគម្រោងលំនៅឋានសរុបចំនួន ១៥១ គម្រោង និងចំនួនលំនៅឋានផ្គត់ផ្គង់ចូលទីផ្សារបានកើនរហូតដល់ ៤៧០០០ ខ្នងធៀបនឹងឆ្នាំមុនមានលំនៅឋានប្រមាណពី ៤១០០០ ទៅ ៤២០០០ ខ្នងប៉ុណ្ណោះ។ ពោលគឺលំនៅឋានថ្មីដែលបានផ្គត់ផ្គង់ចូលទីផ្សារឆ្នាំនេះមានអត្រាចន្លោះពី ៥០០០ ទៅ ៦០០០ ខ្នង។ ការសិក្សាក៏បានរកឃើញផងដែរថាអត្រានៃការលក់ចេញនៃលំនៅឋានទាំងនោះបានកើនទ្បើងរហូតដល់ ៨០ ភាគរយធៀបទៅនឹងឆ្នាំមុនដែលអត្រាលក់លំនៅឋានមានចំនួនទាបជាងនេះ។

លំនៅឋានដែលលក់ដាច់ជាងគេគឺប្រភេទផ្ទះល្វែងដែលមានតម្លៃជាមធ្យម ៤៤០០០ ដុល្លារដល់ ១៩ ម៉ឺនដុល្លារអាមេរិក។ ចំណែកប្រភេទផ្ទះវីទ្បាក៏មានការកើនទ្បើងផងដែរ ដែលផ្ទះវីទ្បាមានតម្លៃចាប់ពីជាង ៦០០០០ រហូតដល់ជាង ១ លានដុល្លារអាស្រ័យលើប្រភេទផ្ទះ ទំហំ និងរចនាប័ទ្មរបស់ផ្ទះនីមួយៗ។

ការសិក្សាដដែលបានរកឃើញថាតំបន់ដែលមានបុរីច្រើនជាងគេមាននៅខណ្ឌសែនសុខដែលមានបុរីចំនួន ៣៥ គម្រោង ខណ្ឌប្ញស្សីកែវ មានបុរីចំនួន ២៦ គម្រោង និងតាមពីក្រោយដោយខណ្ឌពោធិ៍សែនជ័យដែលមានបុរីចំនួន ២២ គម្រោង។ បុរីដែលលេចធ្លោជាងគេមានបុរីប៉េងហួតដែលផ្តោតលើលំនៅឋានសម្រាប់អ្នកមានជីវភាពមធ្យមទ្បើង បុរីពិភពថ្មីជាបុរីដែលផ្តោតលើអតិថិជនទូទៅ និងបុរីជីបម៉ុងលែនដ៍ក៏កំពុងមានភាពលេចធ្លោផងដែរ។

លោក ហ៊ិន សុជាតិ នាយកផ្នែកស្រាវជ្រាវអចលនទ្រព្យនៃក្រុមហ៊ុនប៊ុណ្ណារៀលធីគ្រុបបានថ្លែងថា៖ «កំណើននៃតម្រូវការលំនៅឋាននៅរាជធានីភ្នំពេញគឺត្រូវបានជំរុញដោយឥណទានលំនៅឋានពីធនាគារ និងឥណទានពីម្ចាស់បុរីនានាដែលមានអត្រាការប្រាក់កាន់តែទាប»។

លោកបន្តថា៖ «ការនិយមរស់នៅឯករាជ្យពីគ្រួសារវ័យក្មេងការកើនទ្បើងរបស់ប្រជាជនមានប្រាក់ចំណូលមធ្យម និងលំហូរចេញរបស់ប្រជាជនមានលំនៅឋានក្នុងក្រុងមករស់នៅតាមបុរីក៏ជាចំណែកមួយផងដែរ»។

យោងតាមរបាយការណ៍របស់ធនាគារជាតិនៃកម្ពុជាបានឲ្យដឹងថា ១៩ ភាគរយនៃឥណទានរបស់ធនាគារសរុបនៅកម្ពុជាបានផ្តោតលើវិស័យអចលនទ្រព្យដែលមានទំហំទឹកប្រាក់សរុបប្រមាណ ២០០០ លានដុល្លារអាមេរិក។

លោក ហ៊ិន សុជាតិ បានបញ្ជាក់ថា៖ «ការផ្តល់ឥណទានពីធនាគារបានក្លាយជាផ្នែកដ៏សំខាន់ក្នុងការជំរុញកំណើនវិស័យអចលនទ្រព្យនៅកម្ពុជា និងជាការផ្តល់ភាពអនុគ្រោះកាន់តែច្រើនដល់ការវិនិយោគក្នុងវិស័យនេះ»។

លោកបន្តថា «តម្លៃលំនៅឋានក្នុងឆ្នាំនេះក៏បានកើនទ្បើងផងដែរធៀបរយៈពេលដូចគ្នាកាលពីឆ្នាំមុនប៉ុន្តែការសិក្សានេះមិនបានបញ្ជាក់លម្អិតពីបញ្ហានេះទេ»៕

Urban Voice Cambodia

Urban Voice Cambodia