Brei-Keila-1

ការអភិវឌ្ឍទីក្រុង និងការបណ្ដេញចេញ

ទីក្រុងភ្នំពេញគឺ ជាទីក្រុងធំជាងគេនៅប្រទេសកម្ពុជា ហើយជាទីតាំងសំខាន់នៃវិស័យសេដ្ឋកិច្ច ​សេវាកម្ម និងហេដ្ឋារចនាសម្ព័ន្ធ។ នគរូបនីយកម្ម គឺជាសមិទ្ធផលធម្មជាតិ ដែលបានមកពីការអភិវឌ្ឍទី​ក្រុងយ៉ាងសន្សឹមៗ។​ ជាលទ្ធផល រូបរាងនៃទីក្រុងភ្នំពេញមានការផ្លាស់ប្តូរយ៉ាងឆាប់រហ័ស ដោយ​បង្កើត​ឱ្យមាននូវ ទីក្រុងរណប សំណង់អាគារខ្ពស់ៗ និងរចនាសម្ព័ន្ធផ្សេងៗទៀត។ ទោះជាយ៉ាងណាក៏ដោយ ការសម្របសម្រួលឲ្យមានការអភិវឌ្ឍទាំងនោះ វាបានបណ្តាលឱ្យមានការ​បណ្ដេញ​ប្រជាជនចេញពី​ទី​ក្រុង​​ភ្នំពេញ​​ ជាពិសេស ប្រជាពលរដ្ឋក្នុងតំបន់ក្រីក្រ។​ ទង្វើនេះបានក្លាយទៅជាបញ្ហាសង្គម ដែល​សាធារណជន​​បានយកចិត្ដទុកដាក់​និង​ផ្តោតយ៉ាងខ្លាំងទៅអនាគត។

ជាការពិតណាស់ ការអភិវឌ្ឍន៍ទីក្រុង និងនគរូបនីយកម្មវាមាន​ទំនាក់ទំនងនិងគ្នាយ៉ាងជិតស្និត។ ប៉ុន្តែ ប្រសិនមិនមានការធ្វើផែនការដ៏ល្អិតល្អន់ និងការ​ពិភាក្សា​ប្រកប​ដោយ​ប្រសិទ្ធភាពទេនោះ ភាពចម្រូងចម្រាស់​ទាក់ទងទៅនឹងតម្រូវការគម្រោងអភិវឌ្ឍន៍ និងតម្រូវការរបស់របស់ប្រជាពលរដ្ឋ​នឹង​កើតមានឡើង ។ ការអភិឌ្ឍន៍ ប្រកបដោយការ​ទទួលខុស​ត្រូវ ​មាន​ន័យថា បញ្ហានានាត្រូវបានដោះស្រាយ ​​​​​។ អ្វីដែលគួរឲ្យសោកស្តាយបំផុតនោះគឺថា នៅទីក្រុងភ្នំពេញការបណ្តេញចេញ​កើតឡើងដោយ​ការបង្ខិតបង្ខំ ក្រោមរូបភាពអភិវឌ្ឍន៍ទីក្រុង។

នៅក្នុងឆ្នាំ ២០១២ ការបណ្ដេញចេញប្រជាពលរដ្ឋជាទ្រង់ទ្រាយធំ នៅ បូរីកីឡា​ បានកើតឡើង។ ​ថ្ងៃទី៣ ខែមករា ឆ្នាំ២០១២លំនៅដ្ឋានប្រជាពលរដ្ឋជាច្រើន​នៅបូរីកីឡា ត្រូវបានបំផ្លាញ​ដោយមាន​សហប្រតិបត្ដិការរវាង​អាជ្ញាធរ​មូលដ្ឋាន កងប្រដាប់អាវុធ និងប៉ូលីស។ ការបណ្តេញចេញនេះ​កើត​ឡើងដោយសារ គម្រោងការអភិវឌ្ឍន៍ ដី ៤.៦ហិចតា នៅតំបន់នោះ របស់ក្រុមហ៊ុន ផានអ៊ីមិ

​គេបានប្រើប្រាស់ឧបករណ៍ដូចជា ឡានពន្លត់អគ្គីភ័យ គ្រឿងចក្រ​ឈូសឆាយ និងប៉ូលីសដែលបំពាក់ដោយបំពង់ឧស្ម័នបង្ហូរទឹកភ្នែក ដើម្បីទប់ស្កាត់កុំឲ្យប្រជាពលរដ្ឋរំខាន​ដល់​សកម្មភាពបណ្តេញចេញនេះ។ ទោះបីមានសង្ឃឹមតិចតួចនៅ​ក្នុងការការពារផ្ទះ​របស់ពួកគាត់​ក៏ដោយ ក៏ប្រជាពលរដ្ឋបាននាំគ្នាតវ៉ាពីការបណ្ដេញចេញនេះ។ ប្រជាពលរដ្ឋបានយកដុំថ្មគប់​ទៅ​លើ​អាជ្ញាធរ ដែលបង្ករឲ្យមានការប៉ះទង្គិចយ៉ាងខ្លាំងរវាងអាជ្ញាធរ និងប្រជាពលរដ្ឋ ហើយជាលទ្ធផល អ្នក​តវ៉ា១១ នាក់ត្រូវបានចាប់ខ្លួន។

នៅក្នុងកិច្ចសន្យាក្រុមហ៊ុនបានយល់ព្រម សាងសង​ចំនួនដប់អាគារ​ដើម្បីផ្តល់​ជា​សំណង​ជាលំនៅដ្ឋាន​ដល់គ្រួសារ​ដែលត្រូវបានបណ្ដេញចេញ។ ក៏ប៉ុន្តែ​ មកដល់ពេលនេះមាន​អាគារតែ​ប្រាំបី​ប៉ុណ្ណោះ​ត្រូវ​​បានសាងសង់ និងបានផ្តល់ដល់​ប្រជាពលរដ្ឋបូរីកីឡា ខណៈពេលដែល​មានប្រ​ជាពលរដ្ឋជាង ៣៨៤ គ្រួសារមិនទទួលបានសំណង។ ជំនួសមកវិញ ប្រជាពលរដ្ឋ​ទាំងនោះត្រូវបានបណ្តេញ ចេញឱ្យទៅរស់នៅ ទួលសំបូរ នៅក្នុងខណ្ឌ ដង្កោរ​ ជាយទីក្រុងភ្នំពេញ ដែលមានចំងាយ ៣០គ.ម ភ្មំបាត ស្រុកពញាឮ ខេត្តកណ្តាល និងខ្លះទៀតកំពុងតវ៉ា។ ប្រជាពលរដ្ឋមិន​យល់​ព្រមនឹងការសន្យានោះទេ ហើយបាន​បន្ដការតវ៉ាដោយការដាក់ញ្ញត្តិទៅស្ថាប័នដែលពាក់ព័ន្ធ ​ និងធ្វើបាតុកម្ម ​ដើម្បី​ទាមទាឱ្យក្រុម​ហ៊ុនសាងសង់ឱ្យគ្រប់ចំនួន១០អាគារតាមកិច្ចសន្យា និង ជួយដោះស្រាយ​លំនៅដ្ឋាន​ដល់ពួកគាត់។ ​

ការបណ្តេញចេញដ៏ធំមួយទៀតគឺ​ប្រជាពលរដ្ឋនៅតំបន់បឹងកក់ ក្នុងហេតុ​ផលអភិវឌ្ឍន៍ ហើយដើម្បីសាងសង់​មជ្ឈមណ្ឌលពាណិជ្ជកម្ម លំនៅដ្ឋាន និងតំបន់ទេសចរណ៍។ ករណីនេះ វាស្រដៀងគ្នាទៅនឹងប្រជាពលរដ្ឋ​ករណីបូរី​ កីឡាដែរ។  រាជរដ្ឋាភិបាលបានធ្វើអនុប្រយោគដីតំបន់បឹងកក់ ហើយបានចុះកិច្ចសន្យាជួលដីតំបន់​នេះ​ទៅឲ្យក្រុមហ៊ុនអភិវឌ្ឍន៍មួយឈ្មោះ​ថា ស៊ូកាគូ អីន។ គម្រោងការអភិវឌ្ឍន៍បឹងកក់មានផ្ទៃដីសរុប ១៣៣ហិតា​ ដែលបានបណ្ដេញប្រជាពលរដ្ឋ​សរុបប្រហែលជាង៤,០០០គ្រួសារ​ ​។​ ខុសពីករណីនៅបូរីកីឡា សំណង​សម្រាប់គ្រួសារ​ដែលរស់នៅជុំវិញតំបន់បឹងកក់ មិនត្រូវបានកំណត់ និងយល់ព្រមឡើយ។

នៅ​ខែសីហា ឆ្នាំ២០០៨ ក្រុមហ៊ុន​បានចាប់​ផ្ដើម​បូម​ខ្សាច់​លុបបឹង និងក្នុងខែមេសា ឆ្នាំ២០១៤ ប្រជាពលរដ្ឋប្រមាណជាង ៣,៥០០គ្រួសារ ត្រូវបង្ខំឱ្យទទួលសំណងសម្រាប់ការខូចខាត និងបាត់បង់​លំនៅដ្ឋានរបស់ពួកគេ។ ទោះបីជាយ៉ាងណា មានប្រជាពលរដ្ឋដែលនៅសល់ បានបន្តទាមទារ​សំណង ដែលពួកគេគិតថាគេសមនឹងទទួលបាន។ ដោយ​ហេតុនេះ ​ការតវ៉ា និងការធ្វើបាតុកម្មជាច្រើនបានកើតឡើង​ទាក់ទង​នឹង​អភិវឌ្ឍន៍​គ្មាន​ការទទួលខុស​ត្រូវ​នេះ។ អាជ្ញាធរបានបង្ក្រាប និងចាត់វិធានការក្តៅៗលើអ្នក ប្រឆាំងតវ៉ា មានដូចជា ការវាយដំ​ និង​ការ​ប្រើប្រាស់ដំបងឆក់ មកលើប្រជាពលរដ្ឋ​ ជាដើម។ ពេលនោះដែរ សំណើសុំផ្សេងៗពីអ្នកអ្នកតវ៉ា ក៏ដូចជា សំណើរស្នើសុំសម្រាប់ការតាំងទីលំនៅថ្មី​គឺត្រូវបានបដិសេធ។

ការបណ្ដេញចេញប្រជាពលរដ្ឋនៅតំបន់បឹងកក់ ត្រូវបានមើលឃើញថាជាការបណ្ដេញចេញដ៏ធំ​ដែលមិនធ្លាប់​កើតមានសម្រាប់ការអភិវឌ្ឍន៍នៅទីក្រុងភ្នំពេញ។ ករណីនេះមិនទាន់ចប់ទេ ហើយ ការតវ៉ានឹង​​​មាន​បន្តពីព្រោះពលរដ្ឋមួយចំនួនមិនទាន់ទទួលបានការដោះស្រាយនៅឡើយ។

About សំឡេងទីក្រុង

Urban Voice is a map-based visualisation of developments in the urban space that allows anyone to contribute. The citizens of Phnom Penh have many different interests, and Urban Voice is the place where these can be brought together. Urban Voice is a source of information, as well as a site for civic engagement. Check here for information on news, events, urban issues and many other developments that concern the city.

Leave a Reply