កម្ពុជា មាន​មជ្ឈមណ្ឌល​បង្រៀន​បើក​បរ​រថយន្ត​ធុន​ធ្ងន់​ជា​លើក​ដំបូង​
Posted On : November, 16, 2018 | By សំឡេងទីក្រុង

Sorry, this entry is only available in Khmer. For the sake of viewer convenience, the content is shown below in the alternative language. You may click the link to switch the active language.

នៅព្រឹក​ថ្ងៃពុធ ទី ៣១ខែតុលានេះ ក្រសួងសាធារណការ និង​ដឹកជញ្ជូន បាន​សម្ពោធ ដាក់​ឲ្យ​ប្រើប្រាស់​ជាផ្លូវការ មជ្ឈមណ្ឌល​បណ្តុះបណ្តាល​បើកបររថយន្តធុនធ្ងន់។ ជាមជ្ឈមណ្ឌល ដែល​ក្រសួង​សាធារណការ អះអាង​ថា​ជាមជ្ឈមណ្ឌល​ដំបូង ដើម្បី​បណ្តុះបណ្តាល​ ពង្រឹងគុណភាព អ្នក​បើក​បររថយន្តធុនធ្ងន់ ឲ្យ​យល់ដឹងពីច្បាប់​ចរាចរណ៍ និង​ទ្រឹស្តីនៃការ​បើកបរពិតប្រាកដ ដើម្បីកាត់បន្ថយ​គ្រោះថ្នាក់​ចរាចរណ៍ផ្លូវគោក។ គ្រោះថ្នាក់ចរាចរណ៍ផ្លូវគោក ដែល​ជារៀងរាល់ឆ្នាំ មានមនុស្សស្លាប់​ទ្រង់ទ្រាយ​ធំ បង្កឡើងដោយ​រថយន្តប្រភេទធុនធំនេះតែម្តង។

មជ្ឈមណ្ឌល​បណ្តុះបណ្តាល​បើកបររថយន្តធុនធ្ងន់នេះ មានទីតាំងក្នុង​អគ្គនាយកដ្ឋាន​ដឹកជញ្ជូន​ផ្លូវគោក ស្ថិតនៅលើ​ផ្លូវលេខ ៥៩៨ សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ។ តាម​ក្រសួងសាធារណការ និង​ដឹកជញ្ជូន មជ្ឈមណ្ឌល​នេះ មាន​ស្តង់ដារបង្រៀន​ត្រឹម​ត្រូវ ដោយ​មានគ្រូជំនាញ​ ឆ្លងកាត់ការបណ្តុះបណ្តាលពីប្រទេសថៃ និង​មាន​ការបំពាក់កុំព្យូទ័រ ដើម្បីសម្រួល​ដល់ការបង្រៀន។ ចំពោះការបង្រៀន​វិញ មាន​តម្លៃ ៣៥០ដុល្លារ មួយចេះ ដោយ​រួមមាន​ការបង្រៀន​ទ្រឹស្តីរយៈពេល ៣០ម៉ោង និង​ការអនុវត្តដៃចង្កូត ២០ម៉ោង។

រដ្ឋមន្ត្រីក្រសួងសាធារណការ និង​ដឹក​ជញ្ជួន លោក ស៊ុន ចាន់ថុល បានថ្លែងលើកទឹកចិត្តឲ្យ​ពលរដ្ឋ ចូលរួ​មកាត់បន្ថយ​គ្រោះថ្នាក់ចរាចរណ៍ តាមរយៈការ​ឆ្លងកាត់​វគ្គបណ្តុះបណ្តាលនៅមជ្ឈមណ្ឌលនេះ។ លោក​រដ្ឋមន្ត្រី ប្រកាស​ថា នឹង​បញ្ចុះតម្លៃ ៥០​ភាគរយ ពោលនៅត្រឹមតែ ១៧៥ដុល្លារ ចំពោះ​ពលរដ្ឋ ៥០នាក់ដំបូង ដែលចុះឈ្មោះចូលរៀន​នៅមជ្ឈមណ្ឌល​បណ្តុះបណ្តាលបើកបររថយន្តធុនធ្ងន់នេះ។

តាមការ​ឲ្យ​ដឹងពី លោក ​ស៊ុន ចាន់ថុល នាពេលបច្ចុប្បន្ន មាន​រថយន្តធុនធ្ងន់ ២៣០,០០០គ្រឿង បាន​មក​ចុះបញ្ជីនៅក្រសួងសាធារណការ។ ប៉ុន្តែក្នុងចំណោម​នោះ មាន​តែ ៦០ភាគរយនៃអ្នក​មក​ចុះបញ្ជី ដែល​មាន​ប័ណ្ណបើកបរ ហើយមានប្រមាណតែ ២៥ភាគរយ ដែល​មានប័ណ្ណបើកបរប្រភេទរថយន្តធុនធំត្រឹមត្រូវ ខណៈ ២៥ភាគរយទៀត ​មិន​មាន​ប័ណ្ណបើកបរតាមប្រភេទរថយន្ត និង​ ១០ភាគរយ មាន​ប័ណ្ណបើកបរក្លែងក្លាយ ឬ គ្មាន​ប័ណ្ណបើកបរ។

លើសពីនេះ សាលារៀន​បើកបរប្រមាណ ២៩​ ដែល​ស្មើនឹងជាង ១៨០សាខា នៅទូទាំងប្រទេស ដែល​ក្រសួងសាធារណការ បាន​ចេញ​អាជ្ញាប័ណ្ណឲ្យនោះ ពុំ​មានរថយន្តធុនធំ និងការបង្រៀន​បើកបររថយន្តធុនធំនោះទេ។

លោក​ ស៊ុន ចាន់ថុល ស្នើឲ្យ​មានការ​ស្រាវជ្រាវចំពោះរឿងនេះ ហើយ​ទាមទារដកហូតអាជ្ញាប័ណ្ណមក​វិញ ប្រសិន​បើ​សាលាទាំងនោះ មិន​បង្រៀន​តាមអាជ្ញាប័ណ្ណដែលទទួលបាន។

គួរជម្រាបជូនថា កាលពីឆ្នាំ ២០១៧ មាន​មនុស្សជិត ២០០នាក់ ដែល​ស្មើនឹង ១០ភាគរយ បានស្លាប់ ដោយគ្រោះថ្នាក់​ចរាចរណ៍ផ្លូវគោកបង្កឡើងដោយ​អ្នក​បើកបររថយន្តធុនធំ។ គ្រោះថ្នាក់ចរាចរណ៍ ដែល​ក្នុង​មួយឆ្នាំៗ បាន​ធ្វើឲ្យខាតបង់​ទ្រព្យសម្បត្តិ និង​សេដ្ឋកិច្ចជាតិ ប្រមាណពី ២០០ ទៅ ៣០០លានដុល្លារ។ នេះបើតាមការឲ្យ​ដឹងពីរដ្ឋមន្ត្រីក្រសួងសាធារណការ៕

ប្រភព៖ វិទ្យុបារាំង (rfi)

Urban Voice Cambodia

Urban Voice Cambodia